नेपालय् न्हापांगु खुसिइ पत्रकारतय्गु हकहितया नितिं पत्रकारतय्त संगठितयासे नेपाल पत्रकार संघ स्थापना यानादीम्ह सत्यनारायण बहादुर श्रेष्ठयात सफुतिइ दुमथ्याकूसे कन्हय् नेपाल पत्रकार महासंघं “अग्र अनुहार, कथा अग्रजको, गाथा महासंघको” सफू पिकाय् त्यःगुयात कया नेपाल आदिवासी पत्रकार महासंघ व नेवाः पत्रकार राष्ट्रिय दबू न बिरोध याःगु दु।

थौं छगु बिज्ञप्ति पिकया इतिहास महुइत धाःगु दु। २००७ सालया प्रजातन्त्र बहाली लिपा तत्कालीन नेपाल टुडेया सम्पादक स्वर्गीय सत्यनारायण बहादुर श्रेष्ठं २००८ साल जेठय् नेपाल पत्रकार संघ स्थापना याना उकिया सभापति जुया नेपाःया पत्रकारतय्गु नेतृत्व यानादीगु खः । वि सं २००९ साल वैशाख २२ य् आर्यसमाज मन्दिर भोटाहिटीइ जूगु नेपाल पत्रकार संघया निक्वःगु सभां हाकनं सभापति जुयादीगु खः।

उगु बिषययात कयां नेवाः पत्रकार राष्ट्रिय दबुलिं पटक पटक नेपाल पत्रकार महासङ्घयात ध्वाथुइकुसें इतिहास भिंकेत व वइगु दिनय् संस्थापकया विषय क्वःजिइकेगु नितिं ध्यानाकर्षण यानावयाच्वंसां थुगु बिषययात गम्भीरतापूर्वक कयाच्वंगु मदु । संस्थापक अध्यक्षया बिषय सार्वजनिक बहसया विषय याःगु खः। नेपाल पत्रकार संघया संस्थापक सभापति श्रेष्ठया जीवनी दुमथ्याकूगु, वय्कःया योगदानयात अबमूल्यन याःगु, वय्कःया बारे सफुलिइ गनं हे न्ह्यमथनेगु थें जाःगु ज्यां गम्भीर न्हयसः ब्वलंगु दु । गल्ती शुरूइ याःम्ह स्वयां उकियात हाकनं हाकनं यानाच्वनेगु झन् मुर्खताया ज्या जुइ ।

छु महासंघ सम्बद्व पक्ष कन्हय्या दिनय् थुगु पलाःयात मूर्खता साबित यायेत स्वःगु खःला ? छु महासंघ ईतिहासया तथ्ययात स्वीकार याये चाहे मजूगु खःला ? पत्रकार महासंघयात पत्रकारतय्गु संगठन दयेकेत मस्वःगु खःला ? थ्वहे न्हयसःया नापनापं गलत तथ्ययात हे निरन्तरता बिइगु महासङ्घया पलाः प्रति नेवाः पत्रकार राष्ट्रिय दबूया गम्भीर ध्यानाकर्षण जूगु दु । जिपिं थ्वहे विज्ञप्ती पाखें थुगु पिथना दिकेत जोडदार माग यानाच्वना ।

थुगु सफु प्रकाशन जुलधाःसा पत्रकार महासङ्घया इतिहास व गरिमाय् गम्भीर न्ह्यसः ब्वलनीगु जुगुलि उगु प्रकाशन तुरुन्त दिकेत इनाप यानागु दु।

न्यू जेनिथ इंग्लिश मोडेल स्कुल नीन्यादँ क्यंगु लसताय् तजिक हनेगु कथं रजत जयन्ती ज्याझ्वः याइगु जूगु दु।

कन्ह्यः आइतवाः माघ २८ गते प्रज्ञा प्रतिष्ठान कमलादीइ रजत जयन्ती ज्याझ्वः तःजिक हनेगु खँ बिहिवाः छगू पत्रकार भेटघाट ज्याझ्वः याना स्कुलया प्रिन्सिपल राज महर्जनं जानकारी बिउगु खः।

येँ महानगरपालिकाया उपप्रमुख सुनिता डंगोलया मूपाहाँसुइ जुइगु उगु ज्याझ्वलय्  स्कुल स्थापना जूसांनिसें आःतकया गतिविधि न्ह्यब्वइगु व थीथी सांस्कृतिक, खेलकुद ब्वज्या जुइगु खँ प्रिन्सिपल  महर्जनं कनादिगु दु । वयकलं धयादीकथं ख्वीम्हसिबें अप्वः विद्यार्थीपिन्सं म्यूजिकल ओरस्चेस्ट्रा, म्युजिकय् अधारित तेक्वाण्डो सो, स्काउट पिरामिट, म्ये, हुलाप्याखं व नाटक न्ह्यब्वइगु जुगु दु।

अथेहेतुं प्रिन्सिपल महर्जनं थः शिक्षण पेशाय् च्वनाः मुनागु अनुभव व भोगाई आधारित छगू सफूया नापनापं  ‘थर्ड युनिभर्स अफ न्यू जेनिथ स्कुल’ नांयागु स्मारिका म्यागेजन नं पितब्वज्या याइगु जूगु उगु ज्याझ्वलय् स्कुलय् २५ दँया दुने सेवारत शिक्षक, शिक्षिका व कर्मचारीपिन्त नं सम्मान याइगु जूगु दु।

न्हू सतकय् च्वंगु महर्जन कम्प्लेक्सय् नगर प्रहरीत दुहां वनाः अन तयातःगु लाकां पसः चीकेगु ज्या यागु दु। म्प्लेक्सया क्वय्या तल्लाय् तयातःगु लाकां पसः फुक्क घाराघुरु यानाः लुटे यायेगु शैलीं न्हून्हूगु लाकां फुक्क ज्वना वंगु दु।

नाप अन च्वंगु लाकां तयातःगु ¥याली व दराज नं फुक्कं यंकूगु खः। कम्प्लेक्सया क्वय्या तल्लाय् पसः मखु पार्किङ तयेमाः धासें नगर प्रहरीतय्सं लुटपाट यायेगु शैलीं पसःया सामान ल्ह्वना यंकूगु खः। तर महर्जन कम्प्लेक्सया नक्साय् धाःसा क्वय्या तल्लाय् बेसमेन्ट जक च्वयाः पार्किङ तयेगु धकाः उल्लेख मदुगु खँ सीदुगु दु।

महर्जन कम्प्लेक्सय् थ्व घटनाया भिडियो खिचे याः वःपिं मेयर बालेन साह समर्थक युट्यूबरतय्सं धाःसा अन हे उपस्थित दुपिं स्थानीय मनूतय्त वास्ता मयासे पिनें वयाच्वंपिं छम्ह निम्ह मनूतय्त मात्तुमालाः पसः चीकूगु ठीक जू धकाः न्ववानाः भिडियो खिचे याःगु खः।

वहे इलय् अन थ्यंम्ह अभियन्ता यादवलाल कायस्थं थम्हं नं युट्युबरतय्गु भिडियो खिचे यानाः छिमित थन सुनां छ्वया हःगु, छिपिं बालेनभक्तत मखु ला धकाः न्ह्यसः तयाः कायल यानादीगु खः।

येँ महानगरपालिका वडा २२ या वडाध्यक्ष चिनीकाजी महर्जनं  छगु पत्रकारा सम्मलेनयासे न्हूसतकय् ठेक्कां पार्किङ याकेगु ज्यायात थम्हं न्हापांनिसें हे विरोध यानाच्वनागु खँ कँसें वय्कलं धयादिल, ‘थन सशुल्क मखु निःशुल्क व व्यवस्थित पार्किङ यायेमाः धइगु पक्षयाम्ह खः जि ।’ धका धयादीगु खः।

येँ महानगरपालिकायय् दुगु ध्यवाय् खर्च याये मफुगुलि अथे ध्यवा कया पार्किङ याकेम्वाः धका धयादीगु खः। अथे वयकलं धयादीगु दु, थ्व शहरया नां ‘काठमाडौं’ खः, बालेन सिटी मखु धासें मेयर बालेन साहं नगरया नां तकं हिलेगु कुतः यानाच्वंगु द्वपं बियादीगु दु ।

थःगु हे न्ह्यःने वयाः मनूतय्सं ‘बालेन सिटी’ धाइबलय् अथे धाये मजिउ धायेमाःम्ह मेयर साहं अःखतं मुसुमुसु न्हिलाच्वनीगु खँ नं वडाध्यक्ष महर्जनं कनादिल ।

छत्रपाटी निःशुल्क चिकित्सालयया ६७ क्वःगु वार्षिकोत्सव क्वचाःगु दु। उगु ज्याझ्वलय् मूपाहाँ कथं प्रतिनिधिसभाया सांसद व पुलांम्ह उपप्रधानमन्त्री प्रकाशमान सिंह झायादीगु खःसा येँ महानगरपालिकाया प्रवक्ता व १७ वडाया अध्यक्ष नवीन मानन्धरया पाहाँ कथं झायादीगु खः

चिकित्सालयया अध्यक्ष मनोजमान श्रेष्ठया सभाध्यक्षताय् जूगु उगु ज्याझ्वलय् न्ववासें मू पाहाँ सिंहं चिकित्सालयया इतिहास लुमंकुसें सेवा यायेगु भावनां हे थुगु चिकित्सालय चायेकूगु खँ न्ह्यथनादिल। अथेहे पाहाँ मानन्धरं चिकित्सालयं सुरुं निसें हे गरिब असहायपिंत सेवा याना वयाच्वंगु खँ न्ह्यथँसें चिकित्सालयया विकासया निंतिं थः न्ह्याबलें लगे जुयाच्वनेगु खँ कनादिल ।

ज्याझ्वलय् अध्यक्ष श्रेष्ठं छत्रपाटी निःशुल्क चिकित्सालयया सेवा विस्तारव भविष्यय् यायेगु ज्या बारे कनादीगु खः।

उगु ज्याझ्वलय् चिकित्सलयय् ३० दँ, २५ दँ व झिदँ सेवा याःपिं व उत्कृष्ट कर्मचारीतय्त सम्मान नं याःगु खः।कुमारदेव मानन्धरं लसकुस याःगु ज्याझ्वलय् मेडिकल डाइरेक्टर डा. सन्तोष मानन्धरं चिकित्सालयय् जूगु सुधारया बारे खँ तयादीगु खः ।