बागमति प्रदेश सांसद शैलेन्द्र बज्राचार्यं आः याकनं हे बागमति प्रदेशय् नेपालभाषा व तामाङ भाय् कामकाजि भायया रुपय् छ्यलीगु धयादीगु दु।

यलय् कन्फराक्टीभ मिडिया सोलुसनया ग्वसालय् जूगु छगू ज्याझ्वलय् वयकलं थथे धयादीगु खः ।उगु ज्याझ्वलय् सांसद बज्राचार्यं कन्फराक्टीभ हलया उलेज्या लिसें ईबुखँया उजेज्या यानादीगु खः।

कन्फराक्टिभ मिडिया सोलुसनया नायः बिराजकाजि राजोपाध्यायं स्थानीय बिषयबस्तु ल्ह्वनेत व न्हूगु खोजीया नितिं कन्फराक्टिभ हलयात संवाद व अन्तरक्रियाया दबूया रुपय् बिकास यायेगु धयादिल । मूलधारया धयावःगु संचारमाध्यमया मिखाय् मलाःगु स्थानीय सः, स्थानीय मुद्दा व विषयवस्तु हे समाचारडेस्क व ईबुखँया मेन न्यूज जुइगु राजोपाध्यायया धापू खः।

ईबुखँया सम्पादक बिशाल राजभण्डारीं स्थानीय मुद्दा, विषयवस्तुयात सशक्त ढंगं सम्प्रेषण यायेत स्थानीय समाजया सक्रिय ग्वहालिया नितिं इनाप यानादिल ।‘थौं ईबुखँ न्ह्यात तिनि, थुकियात जिं धायेगु छुं हे मदुनि । झी सकलें जानाः थ्वयात न्ह्यःने यंके । झीगु सः, झीगु खँ झी हे जानाः सशक्त ढंगं ल्ह्वनेनु’ सम्पादक भण्डारीं धयादिल।

काठमाडौं मोडल स्कुल एकल वाद्यवादन धेंधेंबल्लाः कासा वंगु शनिवा येँया राष्ट्रिय नाचघरय् याःगु दु। उगु ज्याझ्वलय् मूपाहाँ न्हूछेबहादुर डंगोल झायादीगु खः।

काठमाडौं मोडल स्कुलय् ३ निसें ८ तगिंयापिं नच्चापिं मस्तय्सं एकल वाद्यवादन धेधेंबल्लाः कासाय् न्ह्यब्वगु थःथःगु प्रस्तुतिं सकल स्वकुमिपिंत मन्त्रमुग्ध याःगु खः । जुनियर व सिनियर यानाः निगू पुचः दयेकाः धेंधेंबल्लाः जूगु उगु कासाय् मुक्कं २४ म्ह ब्वनामिपिंसं ब्वति काःगु खः । ब्वनामिपिंसं बाँसुरी, पियानो, कीबोर्ड, मादल, धिमे व खिं थानाः क्यंगु खःसा मस्तय्त प्रवेश महर्जन, विधान श्रेष्ठ व कृतज्ञ महर्जनपिंसं थीथी बाजं संयोजन यानाः साथ बियादीगु खः ।

युविन महर्जनं जुनियरपाखे हःपाः सिरपाः त्याकादीगु खःसा सिनियरपाखे रोनिश महर्जनं हःपाः सिरपाः त्याकादीगु खः । जुनियरपाखे निर्वेश श्रेष्ठ न्हाप, सुप्रिमा नाय लिउ व एलन राज डंगोल लियांलिउ लाःगु खःसा सिनियरपाखे सिमसन श्रेष्ठ न्हाप, रेमन श्रेष्ठ लिउ व समर तण्डुकार लियांलिउ लाःगु खः । न्हाप, लिउ व लियांलिउ लाःपिंत खुद्वः, प्यद्वः व निद्वः दां सिरपाः नं लःल्हाःगु खः ।

निर्णायकय् नरेश प्रजापति, सविन मुनिकार व अनिल महर्जन च्वनादीगु खः । ज्याझ्वलय् काठमाडौं युथ अर्केष्ट्रापाखें नेवाः धूनया अर्केष्ट्रा नं न्ह्यब्वःगु खः । ज्याझ्वलय् स्कुलया निर्देशक राजेन्द्र महर्जन व प्रिसिन्पल रविन महर्जनं ग्वाहालि याःपिंत सुभाय्पौ लःल्हानादीगु खः ।

झी कलाकारपिं जनगायक भृगुराम श्रेष्ठ व वरिष्ठ म्येहालामि योगेश वैद्यया लुमन्तिइ सांगीतिक सांस्कृतिक सभा याइगु जूगु दु ।

नेवाः कलाकारपिं मुनाः याइगु थुगु ज्याझ्वलय् लोकं ययेकूपिं कलाकारपिन्सं वयकःपिनिगु म्ये हालादी । किपूया किर्तिपुर सिनेप्लेक्सय् जुइगु थुगु ज्याझ्वःया संयोजक जुजुकाजी रंजित खःसा आर्थिक कवः वयकःया हे नेतृत्वय् वरिष्ठ म्येहालामि संगीता शाक्य व म्येच्वमि शैलेश शाक्य बरेजु दुजः च्वनाः दयेकादीगु दु ।

ज्याझ्वः ग्वसाःया नितिं सकल कलाकारपिं छवाः जुयाः मुनादीत इनाप यासें संयोजक रंजितं बिनावंपिं कलाकारपिनिगु लुमन्तिइ थुगु ज्याझ्वः निरन्तर जुइगु जुयाः मन क्वसाःपिन्त ग्वाहालिया नितिं नं इनाप यानादीगु दु ।

ग्वसाः कमिटीइ ल्यू–संयोजक मनराजा नकर्मी, सचिव आर्यम नकर्मी व दुजःपिं नविन जोशी, विजयलाल डंगोल च्वनादीगु दु ।

नेपाल पत्रकार महासंघय् नेतृत्वयाःपिं अध्यक्षपिनि जीवनीयात कयाः च्वयातःगु सफू विमोचन ज्याझ्वः हे घाराघुरु जूगु दु।

थौ ‘अग्र अनुहार ः कथा अग्रजको, गाथा महासंघको’ नांया सफू बिमोचन याये न्ह्यः हे लाकाकयाः खुनाबिउगु खः। नेपाल आदिवासी जनजाति पत्रकार महासंघ (फोनिज) व नेवाः पत्रकार राष्ट्रिय दबुलिं थुगु सफूया विरोध यासें विमोचन याके मबिउगु खः।

सफुतिइ पत्रकार महासंघया संस्थापक अध्यक्षयाबारे गलत व्याख्या यानातःगु धासें विरोध याःगु खः। पत्रकार महासंघया प्रतिष्ठान प्रदेश शाखां पिकाःगु उगु सफुतिइ पत्रकार संघ वि.सं. २०१२ साल गठन जूगु न्ह्यथँसें उबलय्या अध्यक्ष कृष्णप्रसाद भट्टराई निसें आःतकया अध्यक्षतय् जीवनी न्ह्यथनातःगु खः। तर पत्रकार संघया स्थापना २००८ सालय् हे सत्यनारायण बहादुर श्रेष्ठं यायेधुंकूगु खः। महासंघं श्रेष्ठयात छखे लाकाः भट्टराईयात संस्थापक अध्यक्ष नाला वयाच्वंगु दु। थुकियात कयाः नेवाः पत्रकार राष्ट्रिय दबू व फोनिजं तःक्वः हे महासंघय् ज्ञापनपत्र बियाः श्रेष्ठयात संस्थापक अध्यक्ष कायम यायेत माग यायेधुंकूगु दु।

अथे खःसां महासंघं अटेरी जुयाः इतिहास हे स्यंकेगु कुतः याःगु धासें सफू व महासंघया विरोध जूगु खः। पयर्टन बोर्डय् थौ आइतवाः जूगु उगु विमोचन ज्याझ्वलय् महासंघया पुलांपिं अध्यक्षपिंसं सफू विमोचन यायेत्यंगु इलय् हे फोनिज व दबूया दुजःपिं दबुलिइ हे थहां वनाः विरोध याःगु खः। थ्व झ्वलय् विमोचन जुइत्यंगु सफू हे लाका कयाः अन हे खुनाबिउगु खः। लिसें अन हे ‘इतिहास स्यंकेगु कुतः याये दइमखु’, ‘सत्यनारायण बहादुर श्रेष्ठयात महासंघया संस्थापक अध्यक्ष कायम या’ धकाः नारा थ्वयेकूगु खः । थ्व झ्वलय् विरोध याःपिंसं सत्यनारायण बहादुर श्रेष्ठया किपा सहित वय्कःयात संस्थापक अध्यक्ष कायम यायेत माग यानाः पर्चा नं ब्वःगु खः।

विरोधया झ्वलय् न्ववासें फोनिजया महासचिव मिलन लिम्बुं महासंघं थःपिनिगु मागयात बेवास्ता यासें सिइक चायेकं सफू पिथनाः सत्यनारायण बहादुर श्रेष्ठया इतिहासयात हे हुइगु कुतः याःगु खँ धयादिल । थःपिंसं तःन्हु न्ह्यवनिसें थ्व बारे महासंघयात सचेत यासें वार्ताय् च्वनागु खःसां थुकियात बेवास्ता यासें सफू पिथनेगु कुतः याःगुलिं थःपिं थथे विरोधय् कुहां वयेमाःगु खँ धयादिल । वय्कलं महासंघं आः २४ घौ दुने थुकियात सच्चे मयात धाःसा फोनिजं देय् न्यंकं महासंघया विरोधय् आन्दोलन न्ह्याकी धयादिल।

अथेहे पत्रकार दबूया महासचिव केके मानन्धरं ‘नेपाल टुडे’ सत्यनारायण बहादुर श्रेष्ठं वि.सं. २००८ य् हे पत्रकारतय् हक हितया निंतिं पत्रकारतय्त संगठीत यानाः नेपाल पत्रकार संघ नीस्वंगु खँ न्ह्यथँसें थ्वयां प्यदँ लिपा २०१२ सालय् थ्व हे संघयात पुनर्गठन याःम्ह कृष्णप्रसाद भट्टराईयात संस्थापक नालाः पत्रकार महासंघं श्रेष्ठप्रति अन्याय यानाच्वंगु व इतिहासयात हे नामेत यायेगु कुतः यानाच्वंगु खँ धयादिल।