ललितपुर उद्योग बाणिज्य संघ, यलया ग्वसालय् ब्यवसायीक सचेतना कार्यक्रम न्ह्यागू दु।

बाणिज्य, आपुर्ति लिसे उपभोक्ता संरक्षण बिभागया महानिर्देशक, नेपाल गुणस्तर लिसे नापतौल बिभागया महानिर्देशक व राष्ट्रिय उपभोक्ता मञ्चया नायःपिनिगु उपस्थिती न्ह्याकूगु उगु व्याझ्वलय् मूपाहाँ बाणिज्य, आपुर्ति लिसे उपभोक्ता संरक्षण बिभागया महानिर्देशक तीर्थराज चिलुवाल व विशिष्ट अतिथि उद्योग बाणिज्य महासंघया उपाध्यक्ष ज्योत्सना श्रेष्ठपिन्सं मंकाः कथं त्वादेवाय् मत च्याकाः उलेज्या यानादीगु खः।

अथेहे उगु ज्याझ्वलय् कन्ह्यः ११ः०० बजे यल मंगलबजारय् कात्तिदबुली मुनाः, यल जिल्लाया जातिय समाजतय्गु मंकाः मुज्यां क्वःछिनाः आह्वाण याःगु यल पुच्वःय् च्वंगु स्क्वायर होटेलया स्वमिग म्हितिइगु झ्वलय् गम्भीर घाःपाः जुम्ह ललितपुर उद्योग बाणिज्य संघया पुलांम्ह महासचिब पुष्करमान शाक्यया काय् सजिलमान शाक्ययात अबिलम्ब न्याय् बीकेत दोषीयात कारवाही यायेया नितिं जुइत्यःगु दबाबमूलक ज्याझ्वलय् संघनाप सकल ज्यासना पुचःपिन्स ऐक्यबद्धता प्वंकूसे ज्याझ्वलय् ब्वति कायेत सकलसित इनाप नं याःगु दु।

नेवाः पत्रकार राष्ट्रिय दबूया गुक्वःगु दँमुज्या क्वचाःगु दु। मूपाहाँ कथं पत्रकार दबूया केन्द्रिय नायः नृपेन्द्रलाल श्रेष्ठं छगु ज्याझ्वः दथुइ त्वाः देवाय् मत त्याका नाप सत्यनारायण बहादुर श्रेष्ठ व धर्मादित्य धर्माचार्यया किपातय् स्वामा देछाना उलेज्या यानादीगु खः।

यल शाखाया नायः मन्जु बज्राचार्यया सभाध्यक्षताय् जुगु उगु ज्याझ्वलय् अथेहे बिशिष्टि पाहाँ कथं यल महानगरपालिका १६ वडाया अध्यक्ष निर्मलरत्न शाक्य व दबूया निवर्तमान नायः सुरवबीर बज्राचार्य, सल्लाहकार बिजयरत्न असंबरे व यल शाखाया सल्लाहकार सुरेश प्रधान पाहाँ कथं झायादीगु खः।

पत्रकार दबूया केन्द्रिय नायः नृपेन्द्रलाल श्रेष्ठं पत्रकार दबू न थ्व हे वइगु स्वाया पुन्हि कुन्हु नेपालय् दकलय न्हापां पिहावःगु मातृभाषाया पत्रिका पिहावःगु दिंयात लुमका मातृभाषा शताब्दी दिवस हनेगु धका धयादीगु खः। धर्मादीत्य धर्माचार्यं नेपाल संवत १०४३ य् बुद्ध धर्म नामय् पिकागु दिंयात कया पत्रकार दबू नं दच्छि यकं थीथी ज्याझ्वः याना हनिइगु जुइ धका धयादीगु खः। वयकलं सच्छि दँ दुने पिहावये धुकुगु पत्रिका संग्रह दुगु सफू नाप नेपाल भाषाया पत्रिका, रेडियो, टेलिभिजन व अनलाइन पत्रिकाया बिबरण नापं धर्मादित्यनिसे आःतक पत्रकार तयेगु धलः दुगु सफू पिकाय्गु ग्वसाः दु धका धयादीगु खः। थुगु ज्याझ्वःपाखे नेपालभाषाया इतिहास खने दइगु कथं छगु तःजिक ज्या जुइ धका धयादीगु खः, अथेतु वयकलं मातृभाषा पत्रकारितायात कया सार्क स्तरया अन्तराष्ट्रिय सम्मेलन यायेगु ग्वसाः न दु धका धयादीगु खः।

ज्याझ्वलय् बिशिष्ट पाहाँ यल महानगरपालिका १६ वडा अध्यक्ष निर्मल रत्न शाक्यं पत्रकार दबू न याना वयाच्वंगु ज्या तसक बालां जु धका धयादीसे दबू न हनेत्यः मातृभाषा शताब्दी दिवसया ग्वाहालि यायेगु बचं न बियादीसे दबू न याइगु राष्ट्रिय व अन्तराष्ट्रिय स्तर थःगु वडापाखे माःगु ग्वाहालि यायेगु जुइ धका धयादीगु खः।

अथेहे दबूया निवर्तमान नायः सुरवबीर बज्राचार्य, सल्लाहकार बिजयरत्न असंबरे व यल शाखाया सल्लाहकार सुरेश प्रधानपिन्स गुक्वःगु दँमुज्या सुथां लाक्क न्ह्याये फय्मा नापं दबूया न याइगु ज्याझ्वलय् थःपिन्स माःगु कथं ग्वाहालि यायेगु धका धयादीगु खः।

उगु दँ मुज्याय् केन्द्रपाखे बरिष्ठ उपाध्यक्ष सुनिल महर्जन, उपाध्यक्षपि रचना श्रेष्ठ व सुरेन्द्रभक्त श्रेष्ठ, सचिव राजु नापित नापं दुजःपि अनुप प्रधान, मिना बज्राचार्य, राजेश बज्राचार्य व बिकास मालीया न ब्बति दुगु खः।

यल शाखाया सचिव पुर्णिमा शाक्यं प्रगति बिबरण न्ह्य ब्बयादीगु खःसा कोषाध्यक्ष कल्पना महजंन आर्थिक प्रतिबेदन न्ह्यब्बयादीगु खः।

नेवाः पत्रकार राष्ट्रिय दबू काभ्रे जिल्ला शाखाया दँ मुँज्याया उलेज्या दबूया केन्द्रीय नायः नृपेन्द्र लाल श्रेष्ठं छगु ज्याझ्वः दथुइ उलेज्या यानादीगु दु।

उगु ज्याझ्वलय् श्रेष्ठं समावेशी सञ्चार, मातृभाषा पत्रकारितानिसे पत्रकार तयेगु क्षमता यकेमाःगुलि बःबियादीगु खः। व्यावसायिक पत्रकारिता नापं संस्थागत बिकासया खँय् बःबियादीगु खः। वयकलं धयादीगु दु, “धर्मादित्य धर्माचार्य नेपाःया न्हापाम्ह मातृभाषीया पत्रकार खः । करिव सच्छि दँ न्ह्यः बुद्धधर्म नांया पत्रिका प्रकाशन याःगु खः। थुगु तथ्ययात नेपाल आदिवासी जनजाती पत्रकार महासंघ तक स्वीकार याये धुकुगु दु। थ्व हे वइगु ०८१ सालया बुद्ध जयन्तीनिसे  न्हापाम्ह मातृभाषी पत्रकार धर्मादित्य धर्माचार्यया लुमन्ति मातृभाषा शताब्दी दिवस हनेत्यःनागु दु।” नायः श्रेष्ठं नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठ हे धका दाबी न यानादीगु खः।

अथेहे उगु ज्याझ्वलय् केन्द्रीय सल्लाहकार वरिष्ठ पत्रकार मोहन दुवालं थःम्हेसिया ४१ दँनिसे निरन्तर पत्रकारिता ख्यलय् ज्या याना वयाच्वनागु तर राज्यं पेन्सन बिइगु कार्यविधि यात संशोधन यायेमाःगु माग यानादीगु खः। जनमत साहित्यिक पत्रिकानिसे नेपाल समाचारपत्रय् तक ज्या यानागु दु। तर जि पत्रकार खः धका प्रमाणित यायेगु निति वडा कार्यालय सिफारिस जुइमाःगु धइगु मिले मजु धका धयादीगु खः।

पत्रकार राष्ट्रिय दबू काभ्रे जिल्लाया नायः सोमकाजी शाक्यया सभाध्यक्षताय् जुगु उगु ज्याझ्वलय् केन्द्रीय नायः नृपेन्द्रलाल श्रेष्ठ, केन्द्रीय सल्लाहकार लिसे वरिष्ठ पत्रकार मोहन दुवाल, सूर्यप्रसाद लाकोजु, पत्रकार दबूया उपाध्यक्ष सुरेन्द्र भक्त श्रेष्ठ, महासचिव केके मानन्धर, सहसचिव विजयराम कर्माचार्य, सदस्य अनुप प्रधान, नेपाल पत्रकार महासंघ काभ्रेया अध्यक्ष बद्री तिमिल्सिना, प्रेस युनियन काभ्रे, प्रेस चौतारी नेपाल काभ्रे, प्रेस सेन्टर काभ्रेया प्रतिनिधि, काभ्रे क्याम्पसया प्रमुख, प्राचार्य, हलिं नेवाः दबूया उपाध्यक्षपिनिगु न उपस्थिति दुगु खः।

धर्मोदय सभाया सह सचिब सागरमान बज्राचार्ययात लुम्बिनी बिश्वबिद्यालयया सदस्यय् मनोनयन याःगु दु।

वयकःयात बिश्वबिद्यालयया उपकुलपतिलिसें प्रधानमन्त्री पुष्पकमल दाहाल प्रचण्ड स्वदँया नितिं सदस्यय् नियुक्ति याःगु खः।

नेवाः पत्रकार राष्ट्रिय दबू ख्वप कच्चा ज्यासना पुचःया दुजः प्रकाश मल्लया मां जानकी मल्ल मन्त ।

वयकः न्ह्यय् निदँय् मदगु खः।