नेकपा एमालेया खुम्ह केन्द्रीय सदस्यं शपथ कागु दु। पार्टी मुख्यालय च्यासलय् छगु ज्याझ्वः दथुइ अध्यक्ष केपी शर्मा ओलीं न्हुपि दुजःतय्त पद नाप गोपनीयताया शपथ बिःगु खः।

सिरहाया रामअवतार यादव, संखुवासभाया तुलसीप्रसाद न्यौपाने, नुवाकोटया केशवराज पाण्डे, बैतडीया दामोदर भण्डारी, दैलेखया विनोद शाह व झापाया दीपक कार्कीयात वंगु पुस १० या सचिवालय बैठकं केन्द्रीय सदस्यय् मनोनीत याःगु खः।

मनोनीत खुम्ह मध्ये न्याम्ह पूर्वप्रदेश अध्यक्ष खःसा कार्की झापा जिल्लाया अध्यक्ष खः।

प्रधानमन्त्री पुष्पकमल दाहाल ‘प्रचण्ड’ न सचिवालयय् १३ म्हेसित चिइकूगु दु। उमित माघ १ गतेनिसे लागू जुइगु कथं चिकूगु दु धका प्रधानमन्त्रीया सचिवालयं जानकारी बिःगु दु।

प्रधानमन्त्रीया सचिवालयया स्वकीय सहसचिव जुयाच्वंम्ह नारायणप्रसाद ढुंगाना व स्वकीय उपसचिव रमेशप्रसाद गुरागईयात बिदा बिःगु दु। अथेहे स्वकीय उपसचिव ओमकुमारी पौडेल, स्वकीय उपसचिवय् जुयाच्वंम्ह सावित्रीकुमारी अधिकारीयात न चिइकूगु दु।

स्वकीय उपसचिव कलबहादुर नाथ, स्वकीय शाखा अधिकृत लाले कुमाल, प्रशासन सहायक युवराज शाहयात न चिइकूगु दु। अथेतु, प्रशासन सहायक रामलाल पराजुली, कम्प्युटर सहायक बासुदेव शर्मा कम्प्युटर सहायक, कम्प्युटर सहयोगी खड्क योगी, कार्यलय सहायक अविनाश वाइवा, हलुका सवारी चालकपि रमेशप्रसाद घिमिरे पवित्रबहादुर शाहीयात बिदा बिःगु दु।

प्रधानमन्त्रीया मन्त्रिपरिषद् कार्यालय च्वनाच्वपि कर्मचारी कटौती यासें आः सचिवालय चिधकूगु दु। आः सचिवालयय् १३ म्ह कर्मचारी कटौती याःगु खः।

प्रधानमन्त्रीया सचिवालयय् ५२ म्ह दरबन्दी दुगु खः। उकि मध्ये प्रधानमन्त्रीं ३५ म्ह सचिवालयय् नियुक्ति बिःगु खः। उकिइ मध्ये २० म्ह चिइकेगु तयारी दु धका सचिवालयं जानकारी बिःगु दु।

शेयर बजाः थौ तसकं थहावंगु दु। शेयर बजाः परिसूचक नेप्से थौं ५४ दशमलव ५४ अङ्कं थहावना २ हजार १ सय ७५ दशमलव १७ विन्दुइ थ्यःगु दु। नेप्से झन्डै खुल्ला लिपा दकलय् अप्पो थहावंगु दु।

थ्व स्वया न्ह्यः वंगु साउन ८ गते नेप्से २२ सय विन्दुइ थ्यःगु खः। थौं दक्को हे समूहया शेयर थहवःगुलि बीमा, उत्पादन लिसे प्रशोधन, माइक्रोफाइनान्स, विकास बैंक, हाइड्रोपावर, फाइनान्स समूहया शेयर तसकं थहावःगु दु।

झीनिगु कम्पनीया शेयर सकारात्मक सर्किटय् वंगु दु। समग्रमा बजाः थहावंगु दु सा ज्योति विकास बैंक बोन्ड २०८७ या शेयर नकारात्मक सर्किटय् वंगु दु। २ करोड ३३ लाख कित्ता शेयर ८ अर्ब २ करोड रुपैयाँया कारोबार जूगु दु।

थुगु कारोबार रकम निदँलिपा हे दकलय् अप्पो खः। थ्व स्वया न्ह्यः २०७८ साल माघ २० गते ८ अर्ब ६१ करोड रुपैयाँया कारोबार जूगु खः। थौं दकलय् अप्पो सोनापुर मिनरल्स एन्ड आयल कम्पनीया २८ करोड रुपैयाँया शेयर कारोवार  जूगु दु।

नेपाल प्रज्ञा प्रतिष्ठान न २०८० सालया ‘प्रज्ञा साहित्यिक पत्रकारिता पुरस्कार’ वरिष्ठ साहित्यिक पत्रकार रोचक घिमिरे व रुक्मिणी श्रेष्ठयात लःल्हागु दु।

प्रज्ञा प्रतिष्ठानं ‘रचना द्वैमासिक’ या सम्पादन प्रकाशन याना वयाच्वंम्ह घिमिरे साहित्यिक पत्रकारिताय् वंगु खुगु दशक स्वया न्ह्यःनिसे क्रियाशील जुयाच्वंगु उगु सिरपाः लःल्हागु खः।

अथेहे साहित्यिक पत्रकार श्रेष्ठ वि.सं.२००८ सालनिसे प्रकाशनय् वयाच्वंगु ‘थौंकन्ह्य लय् पौ’ या सम्पादक खः । वयकलं वंगु २०४५ सालनिसे उगु पत्रिकाय् ज्या यानाच्वनादीम्ह खः।

सिरपा त्याकादीपि निम्ह साहित्यिक पत्रकारतय्त हनापौ नाप नगद ५० हजार रुपैयाँ लःल्हागु खः।

नेपालभाषा मिसा खलःया स्वीप्यक्वःगु दँमुँज्या क्वचाःगु दु।

स्वयम्भूइ खलःया थःगु हे भवनय् जूगु उगु दँमुँज्या खलःया नायः धर्मशोभा तुलाधरया सभाध्यक्षताय् जूगु खः । वंगु दच्छिया दुने दिवंगत जुयादीपिं खलःया जः व जःपिनि छेँजःया लुमन्तिइ छगू मिनेट मौनधारण यासे न्ह्याःगु ज्याझ्वलय् खलःया लिउछ्याञ्जे पद्मलक्ष्मी ताम्राकारं लसकुस यानादीगु खः ।

खलःया छ्याञ्जे प्रेमहिरा तुलाधरं आर्थिक दँ ०७९÷८० या वार्षिक प्रतिवेदन व भावी कार्ययोजना न्ह्यब्वयादीगु दँमुँज्याय् दांभरिं पूर्णिमा डंगोलं वंगु आर्थिक दँया आर्थिक प्रतिवेदनलिसें लेखा परीक्षण प्रतिवेदन न्ह्यब्वयादीगु खः । निगुलिं प्रतिवेदनय् खलःया जःपिंसं व्यापक सहलह यासें थःथःगु सुझाव बियादीगु खः ।

दँमुँज्याय् खलःया निवर्तमान नायः मंगला कारंजित, संरक्षक सुवर्णकेशरी चित्रकारं नं थःथःगु नुगःखँ तयादीगु खः । वय्कःपिंसं भाषा, साहित्य, संस्कृतिया ख्यलय् खलकं याना वयाच्वंगु ज्यायात कयाः च्वछासे खलकं याइगु थुकथंया ज्याझ्वलय् अझ अप्वः मिसातय्त सक्रिय रुपं सहभागि यायेत इनाप यानादिल ।