नेपाल सरकारं लोककल्याणकारी बिज्ञापन रकम कटौती यागुलि नेवाः पत्रकार राष्ट्रिय दबूया गम्भिर ध्यानाकर्षण याःगु दु।

पत्रकार दबूया महासचिव केके मानन्धरं थौं छगु बिज्ञप्ति जारीयासे गम्भिर ध्यानाकर्षण जुगु दु धका धाःगु दु। अथेहे थौं सुथय् नेपाल पत्रकार महासंघ उपत्यका प्रदेशया ग्वसालय् विज्ञापन बोर्डया कार्यलय धर्ना ज्याझ्वः जुगु खः।

छापा सञ्चार माध्यमयात मदिक्क बियावःगु लोककल्याणकारी विज्ञापन प्रणालीयात ई कथं थप परिमार्जन व व्यवस्थित यानाः यंकेमाःगुलिइ सूचं पितबियाः सञ्चार व सञ्चारकःमितयगु अहित जुइकथं बोर्डं निर्णय याःगु ठहर याःगु दु ।

कोरोना संक्रमणलिसे ब्वलंगु देयया असहज आर्थिक अवस्थाया कारणं नेपाली भाषा व मातृभासं प्रकाशित जुयावःगु व पत्रपत्रिकात आर्थिक रुपय् समस्याय् दु । उकिसन थीथी त्वहः चिनाः विज्ञापन बोर्डं लोककल्याणकारी विज्ञापन प्रकाशन वापतया ध्यबा मबीगु निर्णयया कारणं चिचिधंगु लगानी व स्वरोजगारमूलक छापा सञ्चार माध्यम थप धरासायी जुइगु पत्रकार दबूया ठहर यागु दु धका बिज्ञप्ति धयातःगु दु।

लोककल्याणकारी विज्ञापनया सम्बन्धय् बोर्डं पितब्यूगु उल्लेखित सूचं आपत्तिजनक व छापा सञ्चार माध्यमया हित अःखः दु । अथेजुयाः छापा सञ्चार माध्यमया हित अःखःया थन्यागु निर्णय थत्थें लितकयाः लोककल्याणकारी विज्ञापनयात निरन्तरता बिइत सम्बन्धित निकायया ध्यानाकर्षण यागु दु।

बागमती प्रदेशय् नवनियुक्त मन्त्रीपिन्स पद व गोपनीयताया शपथ काःगु दु।

नवनियुक्त मन्त्रीपिन्त प्रदेश प्रमुख यादवचन्द्र शर्मा न पद व गोपनीयताया शपथ याकूगु खः। बागमती प्रदेशया मुख्यमन्त्री शालिकराम जम्कट्टेलं नेपाली कांग्रेसपाखे स्वम्ह व नेकपा एकीकृत समाजवादीपाखे निम्ह मन्त्री दुथ्याका मन्त्रिपरिषद विस्तार याःगु दु।

कांग्रेसपाखे मसिना खड्का भण्डारी वन तथा वातावरण, पुकार महर्जन पर्यटन उद्योग तथा सहकारी, उत्तम जोशी स्वास्थ्य मन्त्री जूगु दु। कांग्रेसया रामकृष्ण चित्रकार विना विभागीय मन्त्री जूगु दु।

नेकपा एकीकृत समाजवादीपाखे लक्ष्मण लम्साल श्रम, रोजगार तथा यातायात मन्त्री जुगु दु सा राजेन्द्रमान श्रेष्ठ कृषि तथा पशुपक्षी विकास मन्त्री जूगु दु।

थौं आइतवाः मन्त्री नियुक्त जुइ धुका बागमतीइ मन्त्रिपरिषद १२ सदस्यीय जुगु दु।

लुँ वहःया भाः थौं थहावंगु दु। लुँ तोलां च्यासः थहावःगु दु सा वहः तोलां झीन्यातका थहावःगु दु।

लुँ तोलां च्यासः थहावना १ लाख १० हजार रुपैयाँ न कारोवार जुगु दु धका नेपाल सुनचाँदी व्यवसायी महासंघं धाःगु दु।

अथेहे वहः तोलां झीन्यातका थहावना १ हजार ३ सय ८५ रुपैयाँ न कारोवार जुगु दु धका महासंघं धाःगु दु।

शेयर बजाः थौं आइतवाः न थहावःगु दु। वाःया न्हापागु दिं थौं शेयर बजाः परिसूचक नेप्से ५ दशमलव ८८ अङ्कं थहावना १ हजार ८ सय ८३ दशमलव २० विन्दुइ थ्यःगु दु।

थौं विकास बैंक, फाइनान्स, जलविद्युत् व उत्पादन समूहया शेयर सामान्य कुहावःगु दु सा दक्को समूहया शेयर थहावःगु दु। होटल व बीमा समूहया शेयर तसकं थहावःगु दु।

बजाः नाप थौं कारोबार रकम न सुधार वःगु दु। थौं २७३ गु कम्पनीया ४८ लाख २८ हजार कित्ता शेयर १ अर्ब ६० करोड ४ लाख रुपैयाँ कारोबार जूगु दु।

दकलय् अप्पो शिवम् सिमेन्टया ६ करोड १७ लाख रुपैयाँया शेयर न्यायेगु मिइगु जुगु दु। दकलय् अप्पो थौं राष्ट्रिय बीमा संस्थान व आत्मनिर्भर लघुवित्तया शेयर १० प्रतिशतं थहावंगु दु।

समग्र बजाः थहावंसा थौं आदर्श लघुवित्तया शेयर दकलये अप्पो साढे ६ प्रतिशतं कुहावःगु दु।

गणेशदेवी मानन्धर स्मृति प्रतिष्ठानया ग्वसालय् नेपालभाषा ख्यलय् योगदान यानाच्वंपिं स्वम्ह व्यक्तित्वपिन्त छगू ज्याझ्वःया दथुइ हनेज्या याःगु दु ।

उगु ज्याझ्वलय् जनगायक भृगुराम श्रेष्ठ, वरिष्ठ सिनेपत्रकार बिजयरत्न असंबरे व न्हूगु प्रतिभा कथं म्येहालामि सिद्धार्थ बज्राचार्ययात छगू ज्याझ्वः दथुइ मरूहिति ब्यांक्वेटय् लःल्हागु खः।

प्रतिष्ठानया नायः बिजय कुमार मानन्धरया सभाध्यक्षताय् जुगु उगु ज्याझ्वलय् बागमति प्रदेशया सांसद शैलेन्द्रमान बज्राचार्य, नेवाः देय् दबूया नायः पवित्र बज्राचार्य पाहां कथं व वरिष्ठ शिक्षाविद् हितकरवीर सिंह कंसाकार मूपाहांकथं झायादीगु खः।

ज्याझ्वलय् सिद्धार्थ बज्राचार्ययात हनापौलिसें न्याद्वः तकाया प्रतिभा सिरपा, बिजयरत्न असंबरेयात हनापौलिसें झिंन्याद्वः तकाया नेपालभाषा पत्रकारिता सिरपा व जनगायक भृगुराम श्रेष्ठयात हनापौ लिसें निंन्याद्वः तकाया दीर्घ सम्मान लःल्हाःगु खः।

मदुम्ह गणेश देवि मानन्धर समाजसेवी दिलबहादुर मानन्धरया जहान खःसा वय्कःया परिवारपाखें गणेशदेवी मानन्धर स्मृती प्रतिष्ठान गठन याःगु खः । अथेहे सांगीतिक ज्याझ्वलय् जनगायक भृगुराम श्रेष्ठं नं छपू म्ये न्ह्यब्वयादीगु खःसा जुजुकाजी रंजित, निशा देशार व सज्जु मानन्धर नापनापं सिरपा कयाःदिम्ह सिद्धार्थ बज्राचार्य व आपालं कलाकारपिन्सं नं सांगितिक प्रस्तुति न्ह्यब्वयाः दिगु खः।

उगु हे ज्याझ्वलय् सुरेन्द्र श्रेष्ठ, सबिना मानन्धर, सुरेश मानन्धर, राजेन्द्र डंगोल व पुचःपाखें जनगायक भृगुराम श्रेष्ठयात विशेष सांगितिक देछाः न्ह्यब्वःगु खः ।