थेरबादी भन्तेपिं व गुरुमापिं निर्वाण जुइगु इलय् अन्तिम संस्कार याइगु येँया स्वयम्भू आनन्दकुटी बिहारया मू लँुखाया न्ह्यःने च्वंगु थेरबादी दीपय् सुचु पिचु ज्याझ्वः याःगु दु ।

थौं शनिवाः सदाचारि गूरुमा व येँ महानगरपालिका १५ वडाया वडाअध्यक्ष ईश्वरमान डंगोलया नेतृत्वय गूरुमापिं, उपासक उपासिका व १५ वडा भुइख्य युवा पुचःया सहभागिताय् थथे सुचु पिचु ज्याझ्वः जुगु खः ।

ताः ईनिसे अथे लानाच्वंगु दीप अतिकं फोहर मूनाच्वंगु व दीपय् जःखः दुगु जग्गाया अतिक्रमण जुयाच्वगुलि महानगरपालिका १५ वडाया ग्वहालिं जुगु सुचुपिचु ज्याझ्वलय् सदाचारि गुरुमां थेरबादी दीपय् सुचुपिचु यानातय्गु लिसें आः लय् छकः थुगु हे थासय् बुद्धपूजा यायेगु जानकारी बियातःगु खःसा नेवाः अभियन्ता सुजीब बज्राचार्य थेरबादी दीप संरक्षण यानाः थुगु थासय् बांलांगु पार्क निमार्ण यायेगु आजु दुगु खँ कनादिसें थुकिया नेतृत्व यानाच्वनादिम्ह सदाचारि गुरुमांयात सकसिया ग्वाहालि यायेत इनाप यानादिगु खः ।

सुचुपिचु ज्याझ्वः लिपा बुद्धपूजा ज्याझ्वः जुगु खः

येँया उत्तरी भेग तारकेश्वर नगरपालिकाय् चलः वया अबु व म्ह्याय् निम्ह सीउगु दु।

प्रहरी वृत्त बालाजुया कथं  तारकेश्वर नगरपालिका–५ य् शनिवाः चान्ह्यः गणेश तामाङया छेँय् दुनां तामाङ व वया म्ह्याय् निम्हं सीउगु दु धका धाःगु दु।

प्रहरी वृत्त बालाजुया कथं शनिवाः चान्ह्यः करिब ९ बजेतिं च्वं कुतुवाःगु चलखं ४१ दँ दुम्ह गणेश तामाङ व वया म्ह्याय् १५ दँ दुम्ह आसमा तामाङ मदुगु धका धाःगु दु।

उगु घटनाय् मामं सञ्जु तामाङ धाःसा घाःपाः जक जुगु दु।

यल महानगरपालिकां यलया दरबार स्क्वायरया देगलय् च्वने मदइगु ब्यवस्था याःगु दु। थौं शनिवाः निसे निगु देगलय् च्वने मदुगु याःगु दु।

देगलय् अनैतिक क्रियाकलाप याःगु धासे स्थानीयपिनिगु खँ वयेवं यल महानगर प्रमुख चिरीबाबु महर्जनया निर्देशनय् देगलय् च्वनेगु बन्द याःगु खः।

यलया दरबार स्क्वायरया निगु देगलय् जक थौं ‘नो इन्ट्री’ या ट्याग तःगु खः।

लुम्बिनी विकास कोषया उपाध्यक्षय् स्वम्हेसिगु नां चर्चा जूयाच्वंगु दु।

न्हुपि नियुक्ति सरकारं यायेत्यंगुलि प्रा.डा. बज्रमुनि बज्राचार्य, भिक्षु निग्रोध व भिक्षु कौडण्य नां चर्चाय् वयाच्वंगु दु।

झोछें सामुदायिक समाजया झीक्वःगु दँ मुज्या जूगु दु। झीक्वःगु दँ मुज्या छगु ज्याझ्वः दथुइ येँ महानगरपालिका २३ वडाया अध्यक्ष मचाराजा महर्जनं उलेज्या यानादीगु खः।

उगु ज्याझ्वलय् नेवाः देय् दबूया नायः पबित्र बज्राचार्य शार्दुल जङ्ग गुल्मया गुल्मपती पुर्ण प्रजापति, वडा सदस्यपि चन्द्रदेबि मानन्धर व गोपाल नापित, कानूनी सल्लाहकार ऋषी नेउपानेपि पाहाँ कथं ब्बति काःगु खः।