ल्यारक्याल लामायागु वंगु फागुन ३० गते २०७२ य् नेपाल इन्भेष्टमेन्ट बैंकया केन्द्रीय कार्यालय याःगु लकरय् १४ गः गोली लूगु खः।

अकुत सम्पत्ति दुगु द्धपनय् अख्तियार दुरुपयोग अनुसन्धान आयोगं छानबिन यायेगु झ्वलय् अभियुक्तया लकर चायकूगु खः। उगु लकरय् लुँ वहः थे जाःगु बहुमूल्य धातु मखुसे पेस्तोलया गोली तयातःगु मेपिनिगु मखु  संविधानसभा सदस्य नाप पूर्वराज्यमन्त्री ल्यारक्याल लामायाःगु खः।

आः व हे लामायात प्रधानमन्त्री पुष्पकमल दाहाल ‘प्रचण्ड’ न हलियकं च्वंपिनिगु शान्तिप्रेमीपिनिगु पवित्र केन्द्रय् म्हिगः च्वंगु मन्त्रिपरिषदया बैठकं लुम्बिनीया नेतृत्व लःल्हागु दु। आपराधिक पृष्ठभूमिइ दुम्ह लामायात राजनीतिक संरक्षण दयाच्वंगु दु।

लामा थौंकन्हय लामासत्तारुढ माओवादी केन्द्रया केन्द्रीय सदस्य न खः । निवर्तमान उपाध्यक्ष अवधेशकुमार त्रिपाठी (भिक्षु मैत्तेय) या कार्यकाल साउन १० गते पूरा जूगु खः । शान्तिक्षेत्र लुम्बिनी विकास कोषया नेतृत्वया लागि बौद्ध परम्पराया विशिष्ट व्यक्तित्वपिन्स इच्छा यानाच्वंगु खः। कोषया उपाध्यक्षया नेतृत्वय् गायिका आनी छोइङ डोल्मा, कोषया पूर्वउपाध्यक्ष सिद्धार्थ महर्जन (भिक्षु निग्रोध), सुमार्ग भिक्षु, भिक्षु कौन्डय न नां वयाच्वंगु खः।

तर, सरकारं कोषया नेतृत्वया लागि अज्यापि दय्का न आपराधिक पृष्ठभूमिकाया लामायात योग्य खकां नियुक्त याःगु खः। लामायात अख्तियार दुरुपयोग अनुसन्धान आयोगं २०७३ सालय् भ्रष्टाचार याना अकुत सम्पत्ति आर्जन याःगु द्धपनय् विशेष अदालतय् मुद्दा दायर तक याःगु खः।

लामायाके झण्डै १० करोड रुपैयाँ भ्रष्टाचारया द्धपः दु। २०५८ पुस १९ गते गुम्बा विकास समितिइ नियुक्त जूसानिसे नेपाल सरकारया राज्यमन्त्री, संविधानसभा सदस्य जुया व्यवस्थापिका संसद सदस्य तक जुइ धुकुम्ह खः। वास्तविक आय स्वया ९ करोड ४४ लाख रुपैयाँ स्वया अप्पो सम्पत्ति खनेदुगुलि अख्तियारं लामाविरुद्ध विशेष अदालतय् मुद्दा दायर याःगु खः। लामायात भ्रष्टाचार निवारण ऐन, २०१७ व २०५९ कथं जरिवाना व कैद सजाय माग याःगु खः।

वया लिपा लामा याःगु लकरय् १४ राउण्ड गोली लुगु व वैदेशिक रोजगारी ठगीया द्धपनय् जेल तक च्वने धुकुम्ह खः। अथेहे मकाउ छ्वया बिइ धका धासे २ करोड १९ लाख रुपैयाँ ठगी याःगु उजुरी वैदेशिक रोजगार विभागय् वयेवं प्रहरीं ज्वःगु खः । लामा मन्त्री जुगु इलय् दोहोरो नागरिकताया विवादय् न फसे जुम्ह खः। उगु इलय् लामां राजीनामा तक बिःगु खः।

लुम्बिनी विकास कोषया उपाध्यक्षय् डा. ल्हारक्याल लामा नियुक्त जूगु दु। विवादास्पद पृष्ठभूमि दुम्ह पूर्व राज्यमन्त्री नाप तत्कालीन संविधानसभा सदस्य न खः।

लामा ठगी लिसे हातहतियार सम्बन्धी अपराधय् पटक–पटक ज्वने धुकुम्ह खः। नेकपा माओवादी केन्द्रया केन्द्रीय सदस्य तक जुयादीम्ह लामा न्यादँया लागि मन्त्रिपरिषदं उगु पदय् नियुक्त याःगु खः।

थ्व स्वया न्ह्यः कोषया उपाध्यक्ष अवधेश कुमार त्रिपाठी (भिक्षु मैत्तेय) खः। वयकःया कार्यकाल साउन १० गते क्वचाःगु खः।

बागमती प्रदेशय् नेपाली कांग्रेसया रामकृष्ण चित्रकार उद्योग लिसे सामान्य प्रशासन मन्त्री जूगु दु।

वंगु जेठ ७ गते शपथ कया न विना विभागीय मन्त्री जुयाच्वनादीम्ह चित्रकारयात उद्योग लिसे सामान्य प्रशासन मन्त्रीया जिम्मा बिःगु खः ।

मन्त्रालय टछ्याना आः बागमती प्रदेशय् १२ गु मन्त्रालय थ्यःगु दु। कांग्रेसया पुकार महर्जनं पर्यटन, उद्योग लिसे सहकारी मन्त्रालययात टछ्याना चित्रकारयात जिम्मेवारी बिःगु खः।

चित्रकार कांग्रेसया संसदीय दलया उपनेता तक जुयादीम्ह खः।

शेयर बजाःया न्हापागु दिं नेप्से कुहावःगु दु। शेयर बजाः परिसूचक नेप्से थौं आइतवाः ३८ दशमलव ३७ अङ्कं कुहावया २ हजार ५१ दशमलव ४७ विन्दुइ थ्यःगु दु।

थौं दक्को समूहया शेयर कुहावःगुलि बीमा, होटल, माइक्रोफाइनान्स व उत्पादन समूहया शेयर यक्को कुहावःगु दु। दकलय् अप्पो प्रोग्रेसिभ फाइनान्सया शेयर साढे ९ प्रतिशत व अभियान लघुवित्त कम्पनीया शेयर ८ प्रतिशतं कुहावःगु दु।

आईएमई लाइफ इन्सुरेन्स व नेपाल रिपब्लिक मिडियाया शेयर १० प्रतिशत व कृषि विकास बैंकया शेयर साढे ६ प्रतिशतं थहावःगु दु। थौं ८० लाख ७ हजार कित्ता शेयर २ अर्ब ६८ करोड ७१ लाख रुपैयाँया कारोबार जूगु दु।

दकलय् अप्पो सानिमा बैंकया १२ करोड ६९ लाख व एभरेस्ट बैंकया १२ करोड २१ लाख रुपैयाँया शेयरया कारोवार जूगु दु।

लुँ तोलां थौ स्वसः थहावःगु दु। लुँ तोलां स्वसः थहावना १ लाख १२ हजार ५ सय रुपैयाँ न कारोबार जूगु दु धका नेपाल सुन चाँदी व्यवसायी महासङ्घं धाःगु दु।

वहःया भाः धाःसा स्थिर जूगु दु।