नेपाल आयल निगमं डिजेल व मचिकंया भाः झीतका कुहावःगु दु। सोमवाः च्वंगु निगम सञ्चालक समितिया बैठकं डजेल व मचिकंया भाः झीतका क्वकायेगु निर्णय याःगु खः।

आः डिजेल व मचिकं लिटरं १५५ रूपैयाँ कायम जूगु दु। थ्व स्वया न्ह्यः डिजेल व मचिकं लिटर १६५ रूपैयाँ खः।

किपूया प्यंगःथामय् स्थापना याःगु मूर्तियात व्यवस्थापन मयातले ह्यागृब भैरबनाथ नाप ३२ पानेजु संघं याकःमिसायात स्वां तयेमयेकिइगु अडान मत्वःतूगु दु।

थौं विवाद ज्यकेगु निति यल महानगरपालिकां सरोकार पक्षपि नाप च्वंगु बैठकय् पानेजु संघं अथे थःपिनिगु अडान तःगु खः। पानेजु संघं मूर्ति व्यवस्थापनया लागि किपू नगरपालिकायात थ्व हे जेठ ४ गते तकया ई बिःगु दु।

सुखी गँछेः समाजं वंगु मंसिर १५ गते प्यंगःथामय् स्थापना याःगु मूर्तियात गुठी संस्थानय् मयकूतले बुगंद्यःया स्वां किपूलि मयकेगु अडान पानेजु संघं यायेवं थौं च्वंगु बैठक विनानिष्कर्ष क्वचाःगु खः। उगु बैठकय् किपू नगरपालिका व अनच्वपि स्थानीयपिन्स मूर्ति स्थापना याःगु थासं मुर्ति चिइके धुकुलि व बन्द कोठाय् तयातःगुलि स्वां तयेहया परम्परा कायम यायेमाःगु धका धाःगु खः।

तर, ३२ पानेजु संघया अध्यक्ष यज्ञरत्न मानन्धरं मूर्ति गुठी संस्थान, पुरातत्व विभाग वा राष्ट्रिय संग्रालयय् तयेगु विकल्प दु। अय्न, किपूलिइ स्थापना याःगु थासं नगरपालिकां मुर्ति बन्द कोठाय् तयाःगुलि गूठी संस्थानय् यकेम्वाः धका धाःगु खः।

संघया अध्यक्ष मानन्धरं नक्कली मूर्ति चिइकेमाःगु धका धासे स्वां तयेयकेत उगु मूर्ति किपूलि हे चिइकेमाः धा अडान तःगु खः। ‘धार्मिक महत्व व ऐतिहासिकतायात निरन्तरता यायेगु लागि पुरातत्व विभागय् परिपत्र तक यायेगु आधारय् किपूया प्यंगःथामय् स्थापना याःगु मूर्ति उगु थासं चिइकेमाः। तर, उगु मूर्ति थ्व हे जेठ ४ गते दुने व्यवस्थापन यायेमाःगु सहमति जुगु दु’ धका मंकाः बैठकय् निर्णय याःगु खः।

थौं च्वंगु बैठकय् याकःमिसाया धार्मिक महत्वयात राष्ट्रिय मान्यता कायम यायेत म्हति न ५ हजार १ सय १ रुपैयाँ वार्षिक दरबन्दी कायम यायेगु धका गुठी संस्थानं ज्या न न्ह्याकेगु निर्णय जूगु खः।

सरकारं म्वाःम्ह शहीद धका म्हसिउम्ह मुकेश कायस्थयात राष्ट्रिय शहीद घोषणा याःगु दु।

थौं मंगलवाः च्वंगु मन्त्रिपरिषदया बैठकं कायस्थयात राष्ट्रिय शहीद घोषणा याःगु दु धका सञ्चार लिसे सूचना प्रविधि मन्त्री रेखा शर्मां जानकारी बिःगु दु।

२०६२÷०६३ या निगुगु जनआन्दोलनया झ्वलय् घाःपाः जूम्ह काभ्रेया कायस्थ वंगु वैशाख २८ गते मदुगु खः।

सर्वोच्च अदालतं माओवादीया पूर्वलडाकुपिन्त निगु लाख ध्यवा राहत बिइगु निर्णय तत्काल कार्यान्वयन मयायेत सरकारया नामय् अल्पकालिन अन्तरिम आदेश जारी याःगु दु।

न्यायाधीश कुमार रेग्मीया इजलासं अल्पकालिन आदेश जारी यासे उगु विषय अन्तरिम आदेश जारी यायेगु कि मयायेगु धइगु खँय् सहलहया लागि निगु पक्षयात न झिके यायेगु आदेश बिःगु खः।

अधिवक्ता ज्ञानेन्द्र आरणं माओवादी अयोग्य लडाकुपिन्त राहत रकम उपलब्ध यायेगु निर्णय गैरकानूनी जूगु दावीयासे सर्वोच्च अदालतय् रिट निवेदन दर्ता याःगु खः। सरकारं माओवादी अयोग्य लडाकुपिन्त निगु लाख रुपैंया दरं राहत रकम उपलब्ध यायेगु निर्णय याःगु खः।

मन्त्रिपरिषदया निर्णय कथं गृह मन्त्रालयं रकम उपलब्ध यायेगु कार्यविधि तक दयके धुकुगु खः।

सेयर बजाः थौं भचा थहावंगु दु। सेयर बजाः परिसूचक नेप्से ३.३१ अंक थहावना १८२१.६२ विन्दुइ बन्द जूगु दु।

अधिकांश उपसूचक थहावंसा बजाः लिड याइगु बैंकिङ नाप मेमेगु उपसूचक धाःसा कुहावःगु दु। बैंकिङ उपसूचक ०.११ प्रतिशत व मेमेगु उपसूचक ०.८९ प्रतिशतं कुहावःगु दु।

अथेहे निर्जीवन बीमा उपसूचक ०.९९ प्रतिशतं थहावःगु दु सा लघुवित्त उपसूचक ०.८१ प्रतिशतं थहावःगु दु । थौं मंगलवाः नेप्सेय् १८ हजार ८८९ गु कारोबारं २० लाख ६३ हजार ७३७ कित्ता सूचीकृत धितोपत्र किनबेच जूगु खः।

थौं कारोबार जूगु मध्ये एनआईसी एशिया बैकया दकलय् अप्पो ५ करोड १ लाख रुपैयाँया सेयर कारोबार जूगुलि शिवम् सिमेन्टया करिब २ करोड ८९ लाख रुपैयाँ व नबिल बैंकया करिब २ करोड १७ लाखया कारोबार जूगु खः।

नेप्सय् थौं कुल २१६ गु सूचीकृत कम्पनीया सेयर कारोबार जूगुलि १३६ गू कम्पनीया सेयर भाः थहावःगु खः। अथेहे ६३ गु कम्पनीया सेयर भाः कुहावःगु खःसा १७ गु कम्पनीया भाः स्थिर जुगु दु।

थौं कारोबार जूगु कम्पनीइ आत्मनिर्भर लघुवित्तया सेयर भाः दकलय् अप्पो ९.९९ प्रतिशतं थहावना सकारात्मक सर्किट थहावना बन्द जुगुलि माया खोला हाइड्रोपावरया सेयर भाः ५.७० प्रतिशत व हिमालयन ऊर्जा विकास कम्पनीया सेयर भाः ५.३५ प्रतिशतं थहावःगु खः।