थ्व हे वइगु पोहेलाथ्व नवःमि शुक्रवाः कुन्हु जुइगु झिंप्यक्वःगु नेवाः एकता दिवसय् नेवाः संघर्ष समिति घोषणा यायेगु तयारी जूगु दु।

नेवाः देय् दबूया ग्वसालय् थीथी राजनीतिक पार्टीया नेवाः संगठन, नेवाः खलः पुचः नापं नेवाः देय् दबूया स्वनिगः विशेष प्रदेश, येँ, यल, ख्वप जिल्ला समिति नापं स्वनिगःया थीथी पालिका समितिया प्रतिनिधिपिं दुथ्याःगु देय् दबूया केन्द्रीय ज्याकुथिइ जूगु मुँज्यां झिंप्यक्वःगु नेवाः एकता दिवस तःजिक हनेगु नापं नेवाः एकता दिवसय् हे नेवाः अधिकारया नितिं सकल नेवाःत छप्पँ छधी जुयाः संघर्ष याना वनेगु नितिं नेवाः संघर्ष समिति घोषणा यायेगु निर्णय याःगु खः।

नेवाः एकता दिवसयात तःजिक हनेगु निंतिं नं माःगु कथं तयारी याना वनेमाःगु, सांस्कृतिक झाँकी सहित ब्वति कायेगु, नेवाः खलःपुचःनिसें नेवाः देय् दबूया थीथी कचायात नं ब्वति कायेकेगु धाःगु दु। नेवाः एकता दिवसया झ्वलय् पनौतीइ सांस्कृतिक झाँकी सहित जुलुस पिकयाः अनया लाय्कू लागाय् सभा यायेगु योजना दयेकूगु दु।

थुकिया नितिं पनौतीया स्थानीय खलः पुचःतपाखें माःगु कथंया व्यवस्थापन याइ धाःगु दु।

राष्ट्रिय समाचार समिति (राससं) समाचार सामग्रीया समावेशीकरण विविधीकरण यासें म्हिगःनिसें अवधि भाषाया समाचार शुरु याःगु दु। राससया केन्द्रीय ज्याकुथिइ सञ्चार लिसे सूचना प्रविधि मन्त्री रेखा शर्मां उगु सेवा न्ह्याकादीगु खः।

राससया कार्यकारी अध्यक्ष धर्मेन्द्र झा न थःगु नुँगः तयेगु झ्वलय् वयकलं स्वंगू तहया सरकारया अनुदान व सहकार्यं भविष्यय् मेमेगु राष्ट्रिय भाषाया समाचार सम्प्रेषण यायेगु जुइ धका धयादीगु खः।

अथेहे राससया महाप्रबन्धक सिद्धराज राईं नेपालगञ्ज उपमहानगरपालिकाया सहकार्यय् अवधि भाषाया समाचार सेवा शुरु यानागु जानकारी बियादिगु खः। वय्कलं मातृभाषाया समाचार सम्प्रेषण यानाः राससं राज्यया समावेशी नीतियात प्रवद्र्धन यानागु खँ नं धयादीगु दु।

संचाःकःमि नेवाः अनलाइनन्युजया प्रधान सम्पादक व प्रकाशक नापनापं नेवाः जागरण मञ्चया नायः, जनजाति खबर डटकमया प्रधान सम्पादकलिसें नेवाः यूट्युब च्यानलया पिकाकः सुजीव बज्राचार्यया मां तारादेवी बज्राचार्य मन्त।

थौं सुथसिया ६ः४५ ता इलय् ८७ दँय् तारादेवी बज्राचार्य मदुगु जानकारी वय्कःया छेँजःपाखें ब्यूगु दु।

मदुम्ह तारादेवी बज्राचार्ययात थ्यंमथ्यं लच्छितक अस्पतालय् तयाः वासः याकाः वंगु आइतवाः अस्पतालं डिस्चार्ज यानाः छेँय् यंकूगु खः।

थौं मंगलवाः मदुम्ह तारादेवी बज्राचार्यया अन्तिम संस्कार येँया शोभा भगवतीया कर्णदीपय् यायेत्यःगु दु।

न्यतभलु अजिमा (श्वेतकाली) या झिंनिदँ जात्राया झ्वलय् यलया कात्ति दबुलिइ प्याखं हुलाच्वँच्वं हे द्यः गणया प्याखंम्वःया भैरव जुयाः प्याखं हुलादीम्ह रामकाजी महर्जन मंत ।

वंगु विहिवाः अष्टमि कुन्हु यलया कात्ति दबुलिइ न्यतभलु अजिमाया प्याखं हुइकूगु खः । महर्जन हृदयाघात जूया मदुगु खः । वयां तुरुन्त लिपा वय्कःयात अस्पताल यंकूगु खःसा अन वय्कः मदुगु घोषणा जूगु खः । वय्कः ६२ दँ दुम्ह खः ।

मदुम्ह महर्जनया अन्तिम संस्कार म्हीगः यायेधुंकूगु दु । वय्कःया जहान लिसें काय छम्ह व म्ह्याय् प्यम्ह दी । वय्कः गुथिया थाकुलि मध्ये छम्ह खः । कात्ति दबुलिइ वकुन्हु हे प्याखं हुलाच्वंम्ह धर्म महर्जनयात नं तुतिइ ला थहां वनाः अस्पताल भर्ना यायेमाःगु खः ।

व्याघ्रिणी जुयाः प्याखं हुलीम्ह वय्कःया उसाँय् धाःसा आः बांलाना वःगु खँ धाःगु दु ।

महोत्तरी जिल्लाया मटिहानी नगरपालिकाय् च्वंगु मस्जिद मदरसाय् च्वना च्वपि इस्लाम धर्मया धर्म गुरु मोलबीतय्त छगू ज्याझ्वः दथुइ मटिहानी नगरपालिकाया नगर प्रमुख हरि प्रसाद मंडलं कम्बल लःल्हाःगु दु।

तराईलय् ख्वाउगु अप्पोया वयेवं ख्वाउगुलि बचे जुइत मोलबी तय्गु समस्यायात ध्यानय् तया राहत कथं कम्बल वितरण यानागु धका नगर प्रमुख मंडलं धयादीगु खः।

अथेहे ३५ दँ दुम्ह मोलबी तहसीन रेजां थःत कम्बल बिउगुलि नगरपालिकायात सुभाय् बिःगु दु।