नेपाल प्रहरीइ १३ म्ह नायव महानिरीक्षकं फुली लगे याःगु दु। प्रहरी वरिष्ठ उपरीक्षकं डिआईजीइ बढुवा जूपिन्त बिहीबाः आईजीपी वसन्त कुँवरं फुली लगे यानाबिःगु खः।

डीआईजीइ बढुवा जूपि कुवेर कडायत, केदार ढकाल, विष्णु कुमार के.सी, भरत बहादुर बोहरा, रवीन्द्र के.सी, राजेशनाथ बास्तोला, चन्द्र कुवेर खापुङ, जनक भट्टराई, लालमणी आचार्य, सुरेन्द्र प्रसाद मैनाली, अर्जुन चन्द ठकुरी, यज्ञ विनोद पोखरेल, व विकाश राज खनालपि खः।

बुधवाः उपप्रधान नाप गृहमन्त्री नारायणकाजी श्रेष्ठं बढुवा समितिया सिफारिस कथं डीआईजीइ बढुवा नियुक्ति याःगु खः। २०७९ चैत २९ य् बढुवा समितिं एसएसपीपिन्त डिआईजीइ बढुवा यायेगु सिफारिस याःगु खः।

प्रधानमन्त्री पुष्पकमल दाहाल प्रचण्डयात कारबाही यायेत माग यासे तनहुँ–१ या निर्वाचन अधिकृतको कार्यालयय् उजुरी वःगु दु।

राष्ट्रिय स्वतन्त्र पार्टीया तनहुँ उपसंयोजक सूर्यमणि पौडेलं उगु उजुरी बिःगु खः। गठबन्धनया उम्मेदवारया प्रचारप्रसार यायेत बाहलवाला प्रधानमन्त्री हेलिकोप्टरं वया उम्मेदवारयात त्याकल धासा मन्त्री दयकेगु अभिव्यक्ति बिःगुलि कारावाही यायेमाः धका पौडेलं माग याःगु खः।

तनहुँ वना प्रचण्डं धाःगु दु– त्याका छ्वया हयादीसँ, गोविन्दयात मन्त्री दयकेगु जुइ। प्रधानमन्त्री प्रचण्डं बुधबाः जुगु सभाय् गठबन्धनया उम्मेदवार गोविन्द भट्टराई चुनाव त्यात धाःसा मन्त्री दयकेगु आश्वासन बिःगु खः।

वाःया शेयर बजाः कारोबार जुइगु लिपागु दिं थौं १६ अङ्क कुहावंगु दु। शेयर बजाः परिसूचक नेप्से थौं १५ दशमलव १३ अङ्कं कुहावया १ हजार ९ सय शून्य ४ विन्दुइ कुहावःगु दु।

थौं दक्को समूहया शेयर कुहावःसा बीमा, विकास बैंक, उत्पादन नाप प्रशोधन, लघुवित्त, जलविद्युत् व फाइनान्स समूहया शेयर तसकं थहावःगु दु। नेप्से घटे न थौं कारोबार रकम धासा म्हिगः स्वया थौं भचा थहावंगु दु। २६७ गु कम्पनीया ३२ लाख कित्ता शेयर ९८ करोड ३३ लाख रुपैयाँया कारोबार जूगु दु।

दकलय् अप्पो एनआईसी एसिया बैंकया ५ करोड ७५ लाख रुपैयाँ बराबरया शेयर किनबेच जूगु दु। एनएमबी सुलभ इन्भेस्टमेन्ट फन्ड–२ व आदर्श लघुवित्तया शेयर १० प्रतिशतं कुहावःगु दु। समग बजाः कुहावसा थौं कालिञ्चोक दर्शन लिमिटेडया शेयर १० प्रतिशतं थहावंगु दु।

लुँया भाः थौं तोलां न्यासः कुहावःगु दु। लुँ तोलां न्यासः कुहावया थौं १ लाख ९ हजार ८ सय रुपैयाँ न कारोवार जुगु दु धका नेपाल सुनचाँदी व्यवसायी महासङ्घं धाःगु दु।

अथेहे थौं वहःया भाः धाःसा स्थिर जूगु दु । वहः तोलां थौं न १ हजार ४ सय ४५ रुपैयाँ न कारोबार जूगु दु।

वंगु २४ घण्टाया दुने देयन्यक १०३ म्हेसित कोरोना संक्रमण पुष्टि जूगु दु।

स्वास्थ्य मन्त्रालयया कथं १ हजार ६४५ म्हेसिगु नमूना परिक्षण यागु खः।

उकि मध्ये ४५६ म्हेसिगु पीसीआर परीक्षण यागुलि ७२ म्ह व १ हजार १८९ म्हेसिगु एन्टीजेन परीक्षण यागुलि ३१ म्ह याना १०३ म्हेसित कोरोना सक्रमण पुष्टि जुगु दु।

थ्व नाप कोरोनाया संक्रिय संक्रमितपि ३९७ म्ह थ्यःगु दु ।