अन्नपूर्ण हिमालय् निगु आधार शिविरपाखे तंम्ह छम्ह भारतीय आरोही प्यन्हु लिपा उद्धार याःगु दु।

भारतया राजस्थान किशनगढया ३४ दँ दुम्ह अनुराग मालु थौं बिहीवाः सुथय् अन्नपूर्ण हिमालया निगु आधार शिविरय् लूगु खः।

वंगु सोमवाःनिसे तंम्ह मालुयात प्रभु एअरया हेलिकप्टरं सुथय् १०ः३० बजे ७ हजार ५ सय मिटरया उचाइपाखे उद्धार याःगु खः। उद्धार याये धुका वयात पोखराया मणिपाल शिक्षण अस्पतालय् यकां लगेर उपचार यागु दु।

निर्वाचन आयोगं थौं निसे वैशाख १० गते जुइगु स्वंगु थासय् उपनिर्वाचनया लागि प्रचार प्रसार यायेत निषेध याःगु दु।

थौं वैशाख ७ गते चान्ह्यः १२ बजेनिसे वैशाख १० गते मतदान केन्द्र बन्द मजुतले प्रचारप्रसार निषेधया याये मदइगु धका निर्वाचन आयोगया सहायक प्रवक्ता सूर्यप्रसाद अर्यालं धाःगु दु।

उगु इलय् निर्वाचन प्रचारप्रसार लगायत छु न कथंया छलफल, अन्तक्रिया, सभा, सम्मेलन, कार्यशाला, गोष्ठी यायेत निषेध याःगु दु। अथेहे उम्मेदवारया पक्ष वा विपक्षय् छु न प्रकारया प्रचारप्रसार यायेगु, मत फ्वनेगु, एसएमएस, फेसबुक, भाइबरपाखे मत फ्वने दइ मखु।

बारा निर्वाचन क्षेत्र नं २, तनहुँ निर्वाचन क्षेत्र नं १ व चितवन निर्वाचन क्षेत्र नं २ प्रतिनिधिसभा सदस्यया लागि निर्वाचन जुइत्यःगु खः।

लुँ तोलां थौं स्वसः थहावःगु दु। लुँ तोलां थौं स्वसः थहावना १ लाख १० हजार ३ सय रुपैयाँ थ्यः धका नेपाल सुनचाँदी व्यवसायी महासंघं धाःगु दु।

अथेहे वहः तोलां न थौं झीतका थहावःगु दु। वहः तोलां स्वसः थहावना थौं १ हजार ४ सय ४५ रुपैयाँ न कारोबार जूगु दु धका महासंघं धाःगु दु।

ख्वपय् गुन्हु व च्यागु चाः यकं हनिइगु बिस्काः जात्रा क्वचाःगु दु।

वंगु चैत २७ गतेनिसे न्ह्यागु टौमढीइ भैरवया रथ सालां न्ह्यागु बिस्केट जात्रा म्हिगः मंगलबाः बहनि दक्को पूजा क्वचायेवं गःहिटीइ हाकन भैरवया रथ सालां टौमढी हया द्यःपिन्त देवगृहय् थ्यका क्वचागु दु।

भारतया न्हुगु दिल्लीइ अल इण्डिया इन्स्टिच्युट अफ मेडिकल साइन्सेस (एम्स) य् राष्ट्रपति रामचन्द्र पौडेलया उपचार सुरू जूगु दु।

वयकः थौं बुधवाः सुथय् श्रीएयरया एयर एम्बुलेन्सं भारतय् झागु खः। अल इण्डिया इन्स्टिच्युट अफ मेडिकल साइन्सेस (एम्स)य् थ्यनेवं हे वयकःयागु उपचार सुरू जूगु दु धका सचिवालयं धाःगु दु।