नक्कली भुटानी शरणार्थी प्रकरणय् नेपाली कांग्रेसया केन्द्रीय सदस्य नाप सांसद डा. आरजु राणा देउवाया नां कयातःगु अडियो सन्देश शर्माया सः नाप ज्व लाःगु दु।

नक्कली भुटानी शरणार्थी प्रकरणय् ज्वना तःम्ह दाङया शर्मा ठगी नाप संगठित अपराध कसूर मुद्दाय् अनुसन्धानया लागि कुनातम्ह खः। राणां थःगु नां स्वाना फेक अडियो सार्वजनिक याःगु धासे छानबिन याना दोषीयात कारबाही यायेत माग यासे नेपाल प्रहरीया साइबर ब्यूरोय् निवेदन बिःगु खः।

उगु निवेदनय् अनुसन्धान यासे उगु अडियो शर्माया सः नाप मिले जूगु व उगु अडियो टिकटकय् न्हापां सू नां तःगु धका टिकटक सिंगापुरयात जानकारी फ्वनागु दु धका नेपाल प्रहरीया प्रवक्ता कुवेर कडायतं जानकारी बिःगु दु। आरजुं छु सञ्चार माध्यम व सामाजिक सञ्जालय् सार्वजनिक जूगु उगु फेक अडियो बदनियत पूर्ण ढंगं थःत बदनाम यायेगु उद्देश्यं नियोजित कथं रेकर्ड याःगु धासे कारबाहीया दायराय् हयेत माग याःगु खः।

लुँ तोलां न्ह्यसः थहावःगु दु। थौं लुँ तोलां न्ह्यसः थहावना १ लाख ११ हजार ३ सय रुपैयाँ थ्यःगु दु धका नेपाल सुन चाँदी व्यवसायी महासङ्घं धाःगु दु।

अथेहे, वहः तोलां न नीतका थहावःगु दु। वहः तोलां नीतका थहावना १ हजार ३ सय ९५ रुपैयाँ न कारोवार जुगु दु धका महासङ्घं धाःगु दु।

प्रमुख प्रतिपक्षी नेकपा एमाले लिपागु विवादास्पद अभिव्यक्तिबारे प्रधानमन्त्रीया स्पष्टीकरण न्यनेत तयार जूगु दु।

तर आत्मालोचनासहित संसदय् आश्वस्त मयातले सदन अवरुद्ध जुइ धका धाःग दु। छगु सफू विमोचन ज्याझ्वलय् प्रधानमन्त्री प्रचण्डं थःत प्रधानमन्त्री दयकेत सरदार प्रितम सिंह यक्को दिल्ली वःगु धका विवादास्पद अभिव्यक्ति बिःगु खः।

उगु खँ न संसदया अपमान याःगु धासे एमालें प्रधानमन्त्रीया राजीनामा फ्वंगु खः। सहमतिया निति प्रधानमन्त्री प्रचण्डं आइतवाः एमाले अध्यक्ष केपी शर्मा ओली व नेपाली कांग्रेसया सभापति शेरबहादुर देउवानाप सहलह याःगु खः। 

वंगु मंगलवाः थःगु छेँय् सीनाच्वम्ह गायक नाप अभिनेता रविन तामाङयात थौं अन्त्येष्टि याइ। तामाङ परम्परा कथं स्वयम्भूइ अन्तिम संस्कार याइगु जुगु दु धका रविन व्यवस्थापन समूहया आशिष पराजुलीं जानकारी बिःगु दु।

अथेहे अन्तिम श्रद्धाञ्जलीया लागि रविनया पार्थिव शरीरयात थौं सुथय् नक्शालस्थित संगीत लिसे नाट्य एकेडेमी नक्शालय् तइगु जुगु दु। रविनया निम्ह म्ह्याय्पि दु।

६० दँ दुम्ह तामाङ रविन एण्ड द न्यु रिभोलुसनया गायक न खः । लिपागु इलय् फिल्मय् तक अभिनय यानादीगु खः।

गणेश साय्मी छम्ह इमान्दरम्ह मनू खः धका नेवाः न्ह्यलुवाः मल्ल के सुन्दरं धयादीगु दु।

थौं गणेश साय्मी हने ज्याझ्वलय् नुँगः खँ तयेगु झ्वलय् वयकलं धयादीगु दु, नेपालभाषा मंकाः खलः न नेपाल संवत ११०२ य् बाजं खलःपिन्त समय्बजि नकागु खँ लुमकादील।

उगु ज्याझ्वलय् समय्बजि नके धुका ल्यः दुगु चिं, चिकं, हलु, बजियात तक ल्याःचाः तयादीगु खँ कनादीगु खः। अथेहे, नेपाल संवतया क्यालेण्डर पिकायेगुलि योगदानया खँ न लुमकादीगु दु।