लोकह्वाम्ह रकगायक लिसे अभिनेता रविन तामाङ मन्त। म्हिगः मंगलवाः बहनि बुढानीलकण्ठय् थःगु छेँय् मदुगु धका वयकःया तता भगवतीं धाःगु दु। वन एण्ड द रिभोलुसन ब्याण्डया भोकलिस्ट तक जूयादीम्ह रविन लिपागु इलय् चलचित्र अभिनयय् तक यानादीगु खः।

वयकलं लिपागु इलय् फिल्म ‘छड्के २’ य् म्हितादीगु खः । नेपाली रक जनराया म्येया विकास यायेगुलि वयकःया तधःगु योगदान दु। सन् १९९६ य् ‘दम मारो दम’, ‘कल्पना’, ‘केटा केटी’, ‘मेरो माया’, ‘ठीकै छ’ म्ये तसकं लोकह्वागु खः।

वयकलं ‘जय पशुराम’, ‘बादशाह जुट’, ‘चिसो एष्ट्रे’, मुखौटा’, ‘छड्के’, ‘नाका’, ‘वान वे’ लगायत छगु दर्जन स्वया अप्पो नेपाली फिल्मय् अभिनय यानादीगु खः। लिपागु इलय् फिल्म ‘छड्के २’ य् ग्याङस्टरया रोल यानादीगु खः। वयकलं हिन्दी वेब सिरिज ‘दि लास्ट आवर’ य् न अभिनय यानादीगु खः।

बालुवाटारया ललिता निवासय् च्वंगु जग्गा हिनामिना प्रकरणय् अनुसन्धान यायेत प्रहरीं मेपि निम्हेसित ज्वंगु दु ।

केन्द्रीय अनुसन्धान ब्युरों समरजंग कम्पनीया पुलांम्ह अधिकृत रमेशकुमार पोखरेल व नक्कली मोही देवनारायण महर्जनयात येँय् ज्वंगु खः ।

सीआईबीं नं ललिता निवास जग्गा प्रकरणय् अनुसन्धानया नितिं स्वम्हेसित ज्वंगु खःसा थ्व स्वयां न्ह्यः न्हय्म्हेसित ज्वंगु खः । थुगु प्रकरणय् गुम्ह अभियुक्त सीबीआईया हिरासतय् दुसा स्वम्हेसित त्वःतेधुंकूगु दु ।

ललिता निवासया सरकारी जग्गा व्यक्तिया नामय् यंकेगु अनिमियतताय् सरकारी भ्वं किर्ते याःगु द्वपनय् सीआईबीं अनुसन्धान न्ह्याकाच्वंगु दु ।

स्वयम्भू महाचैत्यया गजू क्वसं च्वंगु त्रियोदश भुवनयात पुलुं भुनेगु ज्या यात।

दँय्दसं गुरु पुन्हि कुन्हु थुकियात पुलुं भुनीगु खः।म्हिगः भुनातःगु थ्व पुलु आः मोहनिया कूछिभ्वय् कुन्हु लिकायेगु याइ।

चैत्यया च्वय् दइगु त्रियोदश भुवनयात थथे पुलुं भुनेगु ज्या सीघः बहाः, यतखा बहाः व तुकं बहाःया चैत्यय् नं याइगु चलन दु।

स्वयम्भूया महाचैत्यय् गजू स्यंगु नं दयेकेगु ज्या जुयाच्वंगु दु।

नेपाल आयल निगमं पेट्रोलियम पदार्थया भाः क्वकाःगु दु।

थौं सोमवाः बहनि छगू विज्ञप्ति जारी यासे निगमं थौं चान्ह्यः १२ बजे निसे लागु जुइ कथं भाः क्वकाःगु दु।

निगमया कथं पेट्रोल व डिजेल÷मचिकनय् न्हापागु, निक्वःगु व स्वक्वःगु वर्गया लागि क्रमशः लिटरं ७ः५० रुपैयाँ, खुतका व न्यातका क्वकाःगु दु। थुगु न्हुगु भाः कथं पेट्रोल भारतनाप सीमाना स्वागू थाय् लिटरं १६७ रुपैयाँ ५० पैसानिसे येँ, पोखरा व दिपायल क्षेत्रय् १७० रुपैयाँतक कायम जूगु दु।

डिजेल व मचिकनय् १४७ रुपैयाँ ५० पैसानिसे १५० रुपैयाँतक भाः क्वछिगु दु।

लुँया भाः थौं न तोलां न्यासः थहावःगु दु। लुँ तोलां न्यासः थहावना १ लाख १० हजार १ सय रुपैयाँ न कारोवार जूगु दु धका नेपाल सुन चाँदी व्यवसायी महासंघं धाःगु दु।

अथेहे, वहः तोलां न झीतका थहावःगु दु। वहः तोलां झीतका थहावना थौं १ हजार ३ सय ७० रुपैयाँ न कारोवार जूगु दु धका महासंघं धाःगु दु।