ख्वप नगरपालिकाया १४क्वःगु नगरसभाया बैठकं आर्थिक दँ ०८०÷८१ या बजेट सर्वसम्मतं पारित जूगु दु ।

ख्वप नगरपालिकाया प्रमुख सुनिल प्रजापतिया अध्यक्षताय् च्वंगु बैठकं आर्थिक विधेयक २०८०, विनियोजन विधेयकलिसें आ.व. ०८०÷८१ या निंतिं पेश याःगु बजेट सर्वसम्मतं पारित जूगु खः । नगर उपप्रमुख रजनी जोशीं वंगु असार १० गते च्वंगु नगरसभाया बैठकय् वइगु आर्थिक दँया निंतिं निगू अर्ब नीखुगू करोड चय्न्यागू लख ग्वीप्यद्वःया बजेट न्ह्यब्वयादीगु खः ।

बैठकय् नगर प्रमुख प्रजापतिं ताःई न्ह्यःनिसें कुतः जुयाच्वंगु ख्वप विश्वविद्यालय स्थापनाया योजना संसदपाखें पारित याकेत नगरपालिकां जोड बियावयाच्वंगु जानकारी बियादिसें थुकिया निंतिं कुतः निरन्तर न्ह्यानाच्वनी धयादिल ।

बजेटयात कयाः सभासदपिंसं तयादीगु न्ह्यसः व जिज्ञासा लिसः बियादिसें नगर उपप्रमुख जोशीं नगरया दक्वं वडाय् शिशु स्याहार केन्द्र स्थापना व संचालन यायेगु व उकिया निंतिं अध्ययन जुयाच्वंगु दु धयादिल ।

अथे हे कृषि विकासया निंतिं कृषकया सूचीकरण यायेगु, करया दायरा समयसापेक्ष तचाः याना यंकेगु, संस्थागत क्षमता विकासया निंतिं आवश्यक व्यवस्था यानागु व शान्ति सुरक्षाया निंतिं नगरया थीथी थाय् सीसी क्यामरा जडान व सतक मतया व्यवस्था यायेगु ज्या जुयाच्वंगु जानकारी बियादिल ।

नेपालभाषा आन्दोलनया न्ह्यलुवा लिसें नांजाःम्ह कलाकार गणेश साय्मियात कन्ह्यः शनिवाः छगु ज्याझ्वः दथुइ तःजिकं हनीगु जूगु दु ।

वय्कःयात बाजं थानाः लसकुस यानाः यंकुसें नेपाः ब्यांक्वेटया हलय् हनेत्यंगु खः । थुकिया लागिं कलाकार राजेन्द्रमान शाक्यया अध्यक्षताय् छगू हना ग्वसाः खलः नं नीस्वंगु दु ।

वय्कःयात हनी कुन्हु छुं नं खलः पुचःतय्सं वय्कःयात व्यक्तिगत रुपं हनापौ वा छुं कथंया द्यछा देछाये फइगु खँ ग्वसाः खलकं धाःगु दु ।

गठबन्धनं प्रधानमन्त्री पुष्पकमल दाहाल प्रचण्डया राजीनामा फ्वनेगु प्रमुख विपक्षी दल नेकपा एमालेया पलाः असंसदीय जूगु ठहर याःगु दु।

प्रधानमन्त्री निवास बालुवाटार च्वंगु सत्ता गठबन्धनया बैठकं एमालेया उगु पलाः असंसदीय जूगु धासे प्रधानमन्त्री प्रचण्डं राजीनामा बिइम्वाः व संसदय् फेस यायेगु निर्णय याःगु दु।

सरदार प्रितम सिंहबारे च्वंगु सफू विमोचन ज्याझ्वलय् प्रधानमन्त्री प्रचण्डं नेपालय् सरकार निर्माण यायेत भारतनाप सहलह जूगु कथं सन्देश वनिइगु अभिव्यक्ति बिःगु खः।

उगु ज्याझ्वलय् प्रचण्डं धाःगु दु, ‘वयकः (प्रितम सिंह) राजनीतिइ न रुचि तयादीम्ह खः। वयकलं तकः जितः प्रधानमन्त्री दयकेत यक्को मेहनत यानादीगु खः। तकः मछि हे दिल्ली वःगु दु। येँ न पार्टी व नेतापि नाप तकः मछि हे सहलह यानादीगु खः।’ उगु भनाइयात कया नेकपा एमाले न प्रधानमन्त्री प्रचण्डया राजीनामा फ्वना संसद बैठक अवरुद्ध यानाच्वंगु खः।

बैठकय् सरकारया नेतृत्वकर्ता दल नेकपा माओवादी केन्द्रया अध्यक्ष नाप प्रधानमन्त्री पुष्पकमल दाहाल प्रचण्ड, नेपाली कांग्रेसया सभापति शेरबहादुर देउवा, जसपाया अध्यक्ष उपेन्द्र यादव, एकीकृत समाजवादीया उपाध्यक्ष राजेन्द्र पाण्डे, नागरिक उन्मुक्ति पार्टीया अध्यक्ष रञ्जिता चौधरी, लोसपाया अध्यक्ष महन्थ ठाकुर, जनमतया अध्यक्ष सीके राउत लगायतया नेतापिन्स ब्बति काःगु खः।

राष्ट्रिय परीक्षा बोर्डं थुगु दँया माध्यमिक शिक्षा परीक्षा (एसईई) या लिच्वः थौं सार्वजनिक याइगु जुगु दु। बोर्डं लिच्वः पिकायेगु तयारी यानाच्वंगु दु।

थौं बहनि तक सार्वजनिक यायेगु तयारी यानाच्वंगु दु। परीक्षा नियन्त्रणा कार्यालय कक्षा १० या परीक्षा नियन्त्रक विष्णुनारायण श्रेष्ठया कथं उत्तरपुस्तिका परीक्षणया ज्या सिधय् धुकुगु दु सा प्राविधिक ज्या न क्वचाये धुकुगु दु, नम्बर कम्प्युटरय् तयेगु, सम्परीक्षण यायेगु, रुजु यायेगु प्राविधिक ज्या जुइ धुकुगु धका धाःगु दु।

वंगु चैत १७ गतेनिसे २९ गते तक देयन्यक २ हजार ३७ परीक्षा केन्द्रय् सञ्चालित परीक्षाय् देयन्यक सामुदायिक व निजीयाना १२ हजार ८३ विद्यालयय् ४ लाख ८५ हजार ३ सय ९६ विद्यार्थीपि सहभागिता जूगु दु।

परीक्षाय् निगु लाख ४२ हजार ४ सय १२ म्ह छात्रा व निगु लाख ४२ हजार ६ सय ७४ म्ह छात्रपिन्स परीक्षा बिःगु दु। प्राविधिक धारपाखे १५ हजार ४ सय ६१ म्ह परीक्षार्थीपि एसईईपाखे सहभागी जूगु दु।

सासनधज धम्माचरिय अग्गमहाग्थकवाचक धम्मवती गुरुमांया ९० दँ बुदिंया लसताय् धर्मकीर्ति विहारय् वाःयक अभिधम्म पाठ यायगु ज्याझ्वः थौं क्वचाःगु दु।

थुगु ज्याझ्वलय् थीथी विहारय् विराजमान जुया विज्यापिं भन्ते गुरुमाजुपिन्सं अभिधम्म पाठ याना बिज्यागु खः ।

लामा भिक्षुपिं व बज्राचार्य गुरुपिं गुरुमापिन्सं श्रद्धेय धम्मावति गुरुमांया ताःआयु, भिं उसाँय् या कामना यासें गुरु प्रा.डा. नरेशमान बज्राचार्यया नेतृत्वय् अपरिमित पाठ, भद्रचरी पाठ व गुरुपाखें धर्मदेशना याना बिज्यागु खः ।

नापं वसपोलं धर्मदेशना यायगु झ्वलय् छपु बाखं नं कना बिज्यागु खः । अथेहे अभिधम्म पाठ यायगु झ्वलय् आपालं उपासक उपासिकापिं नं उपस्थित जुया पाठ यानादीगु दु।