राष्ट्रिय प्रजातन्त्र पार्टीया अध्यक्ष राजेन्द्र लिङ्देनं नैतिकता ल्यःदुगु खःसा प्रधानमन्त्री पुष्पकमल दाहालं राजीनामा बिइमाः धका धयादीगु दु।

प्रतिनिधिसभा सदस्य नाप राप्रपाया अध्यक्ष लिङ्देनं थौं सदनय् थःगु खँ तयेगु झ्वलय् प्रधानमन्त्री दाहालया अभिव्यक्ति गम्भीर खः धका धयादीसे राजीनामा बिइमाः धका धयादीगु दु।

वयकलं धयादीगु दु तत्कालीन कानुनमन्त्री शेरबहादुर तामाङं न्ववागु गल्ती जुइवं राजीनामा बिःगु खँ लुमकादीगु खः। प्रधानमन्त्री दाहालं असार १८ गते छगु सफू विमोचन यायेगु ज्याझ्वलय् थःत प्रधानमन्त्री दयकेगु निति छम्ह व्यवसायी दिल्ली वःगु खँ धयादीगु खः।

प्रधानमन्त्रीया प्रेस सल्लाहकारं मिटरब्याज सम्बन्धी अध्यादेश प्रतिपक्षी दलपि विरोधय् दु धका धयादीसे भाष्य निर्माण यायेत स्वगु धका अध्यक्ष लिङ्देनं धाःगु खः।

राष्ट्रिय सभाया बैठक थौं मच्वनिइगु जुगु दु। थौं च्वने धका धाःगु बैठक कन्ह्यः जक च्वनिइगु जुगु दु।

बैठक थौं सुथय् ११ बजे सःता तःगु खः। तर, विशेष कारण धका धासे कन्ह्यः मंगलवाः जक च्वनिइगु जुगु दु।

शंखरापुर नगरपालिका सक्वय् श्री माधब नारायण स्वस्थानी व्रत तथा शालिनदि सुधार समितिया ल्याःचाः व हना ज्याझ्वः क्वचाःगु दु ।

उगु हे ज्याझ्वलय् सक्वय् दँय्दसं पौष शुक्ल पुन्हिनिसें माघ शुल्क पुन्हितक यानाः लच्छियंक धलं दंकेगु झ्वलय् आर्थिक व भौतिक ग्वहालि याःगु संघसंस्था, पुलिस, स्काउट, मिसा पुचः, ट्राफिक प्रहरी व थीथी ब्यक्तियात हनापौ लःल्हासें हंगु खः ।

ज्याझ्वलय् थःगु नुगःखँ तसें पूर्व नगर प्रमुख सुबर्ण श्रेष्ठं थः मेयर जुयाबलय् शंखरापुर नगरं जक मखसें कागेश्वरी मनहरा नगरपालिका व गोकर्ण नगरपालिका तकं वनाः धेबा हयाः मेलायात फ्यानाबियागु व आः नं प्रदेशपाखें बजेट हय्गु बचं बियादीगु ख ।

नगर प्रमुख रमेश नापितं नगरय् लाःगु धार्मिक सम्पदा संरक्षण याय्गु नितिं व बज्रयोगिनि, नारायणीश्वर, सलंम्बु देवी व ईन्द्रायणी देवीयात पर्यटकीय गन्तव्य दय्केगु कुत याय्गु प्रतिवद्धता प्वंकादिल ।

ज्याझ्वलय् ग्वसाः खलःपाखें श्री माधब नारायण स्वस्थानी व्रत तथा शालिनदि सुधार समितिया नायः बालकृष्ण श्रेष्ठ, महासचिब योगेशमान डंगोलं थःथःगु नुगःखँ तयादीगु खः ।

ज्याझ्वलय् शंखरापुर नगरपालिकाया मेयर रमेश नापित, उपमेयर समिता श्रेष्ठ, पुलांम्ह मेयर सुबर्ण श्रेष्ठ, वडाध्यक्षपिं, माधब नारायण स्वस्थानी व्रत तथा शालि नदि सुधार समितिया पुलांपिं नायःतय् उपस्थिती दुगु खः ।

ललिता निवासया सरकारी जग्गा हिनामिना प्रकरणय् मेम्ह सञ्चार लिसे सूचना प्रविधि मन्त्रालयया सचिव कृष्णबहादुर राउतयात ज्वःगु दु।

राउतयात त्रिभुवन अन्तर्राष्ट्रिय विमानस्थलय् आन्तरिक टर्मिनलपाखे ज्वःगु दु धका नेपाल प्रहरीया केन्द्रीय अनुसन्धान ब्युरो (सीआईबी) न धाःगु दु। उपित विराटनगर वनेगु निति बोर्डिङ पास कयाच्वंगु इलय् विमानस्थल दुने हे ज्वःगु खः।

ललिता निवासया जग्गा मनूया नामय् यायेगु झ्वलय् राउतया न संलग्नता खनेदु धका धासे सीआईबी न उपित थ्व स्वया न्ह्यः हे अदालतपाखे ज्वनेगु पुर्जी काःगु खः।

थ्व नाप ललिता निवास जग्गा प्रकरणय् भाटभटेनी सुपरमार्केटया सञ्चालक मीनबहादुर गुरुङ, निर्वाचन आयोगया पूर्वआयुक्त सुधीर शाहनाप झीनिम्हेसित ज्वने धुकुगु दु। थुगु प्रकरणय् प्यसः स्वया अप्पोसित ज्वने धुकुगु दु।

शेयर बजाः वाःया न्हापागु दिं निगु अङ्कं थहावःगु दु। शेयर बजाः परिसूचक नेप्से थौं आइतवाः २८ दशमलव ३८ अङ्कं थहावना २ हजार ७७ दशमलव ७६ विन्दुइ थ्यःगु दु।

थौं दक्को समूहया शेयर सामान्य थहावःगु दु। रावा इनर्जी कम्पनीया शेयर थौं १० प्रतिशत व सिटी होटलया शेयर साढे ९ प्रतिशतं थहावःगु दु।

समग बजाः थहावंसा थौं दकलय् अप्पो माथिल्लो तामाकोसी जलविद्युत् कम्पनीया शेयर साढे ६ प्रतिशत व बीपीडब्ल्यू लघुवित्तया शेयर साढे ४ प्रतिशत कुहावःगु दु।

२८७ गु कम्पनीया शेयर ८३ लाख ५२ हजार कित्ता शेयर ३ अर्ब ४ करोड २५ लाख रुपैयाँया कारोबार जूगु दु।

दकलय् अप्पो हिमालयन लाइफ इन्सुरेन्सया १८ करोड ६० लाख रुपैयाँया शेयर कारोबार जूगु खः।