सरकारय् नेतृत्वय् याना च्वपि माओवादी केन्द्रनाप प्यंगु दलं समाजवादी मोर्चा घोषणा याःगु दु।

राष्ट्रियसभा गृहय् जूगु उगु ज्याझ्वलय् प्यंगु दलया प्रमुखपिन्स न्ह्यगू बुँदाया घोषणापत्रय् ल्हाःचिं तःगु खः।

उगु समाजवादी मोर्चाय् माओवादी केन्द्र, जनता समाजवादी पार्टी (जसपा), एकीकृत समाजवादी व नेपाल कम्युनिस्ट पार्टी खः। सहमतिपत्रय् मोर्चाय् नेतृत्व पालंपाः याइगु जुगु दु।

नीतिगत निर्णय यायेत अध्यक्षपि नाप संयोजन समिति दइ धासा स्थानीय तहतक विस्तार याइगु जुगु दु।

कालीमाटी तरकारी बजारय् व्यापारीपिन्स गोलभेंडा सतकय् वानछ्वया बिःगु दु।

थौं बजारय् किलोया प्यतका तक मवयेवं गोलभेंडा सतकये वानाछ्वःगु खः।

कालीमाटी बजार विकास समितिं थौं आइतवाःया लागि टनेल चिग्वःगु गोलभेंडाया भाः किलोया च्यातका तोके याःगु खः।

मुटुमा समस्या खने दय्वं उपचार यानाच्वम्हल राष्ट्रपति रामचन्द्र पौडेलया स्वास्थ्य अवस्था स्थिर दु धका अस्पतालं धाःगु दु।

महाराजगञ्जस्थित मनमोहन कार्डियो थोरासिक भास्कुलर नाप ट्रान्सप्लान्ट सेन्टरं छगू विज्ञप्ति जारीयासे राष्ट्रपति पौडेलया स्वास्थ्य अवस्था स्थिर दु धका जानकारी बिःगु दु।

सेन्टरया कार्यकारी निर्देशक प्राध्यापक डाक्टर मणि गजुरेलं जारी याःगु विज्ञप्तिइ राष्ट्रपतिया मुटु याःगु चाल मनिटरिङ यायेमाःगुलि थौं सुथय अस्पतालय् भर्ना यानागु धका धाःगु खः।

राष्ट्रपतिया मुटुइ समस्या खनेदुगुलि थौं शनिवाः सुथय् ५ बजे उपचारया लागि भर्ना यानागु धका राष्ट्रपतिया स्वकीय सचिव चिरञ्जीवी अधिकारीं जानकारी बिःगु खः।

स्वकीय सचिव अधिकारीया कथं राष्ट्रपतिया स्वास्थ्य सामान्य दु ।

नेपाल नागरिक उड्डयन प्राधिकरणं येँ महानगरपालिकाया मेयर बालेन (बालेन्द्र) साहयात स्पष्टीकरण न्यःगु दु। विमानस्थलया निषेधित क्षेत्र दुने निर्माणाधीन भवनया निर्माण ज्या दिकेत निर्देशन बिइगु बारे उड्डयन प्राधिकरणं मेयरयात स्पष्टीकरणया माग याःगु खः।

येँ–९ पाखे दुगु जग्गाय् दयकाच्वंगु कम्प्लेक्सया नक्सा पास मयासे दयकूगु धासे बिहीवाः येँ महानगरया नगर प्रहरी उखेपाखे वःगु खः। महानगरया पुचलं भवन दुने दयका च्वथाय् तयातःगु तारबार चिइकूगु खःसा अन ज्या दिकेत धाःगु खः।

उड्डयन प्राधिकरणं धाःसा निर्माण ज्या दिकेत महानगरं छु न जानकारी मबिउगु धका धाःगु खः। नाप लिखित पत्र व आधिकारिक जानकारी माग याःगुलि नगर प्रमुखं आदेश बमोजिम ज्या यानागु खः अने वना लिसः बिःगु खः। उड्डयन प्राधिकरणं नेपाल नागरिक उड्डयन प्राधिकरण ऐनया दफा २५ (१) बमोजिम सजाय छाय् मयाःगु? धका बालेनयात स्पष्टीकरण न्यःगु खः।

उगु कथं कारवाही जुल धाःसा मेयर बालेनयात ५० हजार तक जरिबाना जुइफु। प्राधिकरणं महानगर नगर प्रहरी प्रमुख राजुनाथ पाण्डे व वडा नम्बर ९ या वडाध्यक्ष रामजी भण्डारीयात न स्पष्टीकरण न्यःगु दु।

प्रधानन्यायाधीशय् हरिकृष्ण कार्की नियुक्त जूगु दु। वयकःयात थौं हे राष्ट्रपति भवन शीतलनिवासय् जूगु ज्याझ्वलय् राष्ट्रपति रामचन्द्र पौडेलं पद लिसे गोपनीयता शपथ याकूगु खः।

संसदीय सुनुवाइ समितिं निन्हु लिपा सुनुवाइ याये धुका थौं शुक्रवाः हे कार्कीया नां प्रधानन्यायाधीशय् अनुमोदन याःगु खः।

वया लिपा राष्ट्रपति पौडेलं वयकःयात प्रधानन्यायाधीशय् नियुक्त याःगु खः। वंगु च्यालानिसे कायममुकायम प्रधानन्यायाधीशया जिम्मेवारीइ दुम्ह कार्की थ्व हे वइगु साउन २० गते सेवा निवृत्त जुइ।