नेवाः पत्रकार राष्ट्रिय दबू न थौं शिक्षा, विज्ञान नाप प्रविधि मन्त्री अशोककुमार राईयात भिंतुना बिइगु नाप ध्यानाकर्षण पौं लःल्हाःगु दु।

पत्रकार दबूया केन्द्रिय नायः नृपेन्द्रलाल श्रेष्ठं मन्त्रीराईयात नाप लाना भिंतुना व दबूया शिक्षा व मातृभाषा पत्रकारिता बिषया ध्यानाकर्षन याःगु खः।

उगु ध्यानाकर्षण याकेगु झ्वलय् पत्रकारपिनिगु हकहित, क्षमता अभिबृद्धि, मातृभाषा पत्रकारिता विकास, न्हापाम्ह मातृभाषा पत्रकार धर्मादित्य धर्माचार्य, नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठया योगदान यागु स्मरण याकूगु खः।

धर्मादित्य धर्माचार्यया नाप मातृभाषा पत्रकारिता विकासया योगदानया ब्यक्तित्व बारे अध्ययन नाप अभिलेखीकरण यायेमाः धका ध्यानाकर्षण याकेगु नाप वरिष्ठ पत्रकार, आःयापि क्रियाशील व न्हुपि प्रत्रकारपिन्त सिरपा व हना ज्याझ्वः सरकारपाखे यायेमाः धका धयातःगु खः।

मातृभाषा पत्रकारिता क्षेत्रयात सशक्त दयका क्षमता अभिबृद्धि याना प्रशिक्षण बिइमाःगु, मातृभाषा पत्रकारिता विकासया लागि माःगु नीति, नियम व ब्यवस्थाबारे सरकारयात ध्यानाकर्षण दबूपाखे याकूगु खः।

धम्मवती गुरुमा ९० दँ च्वनिइगु लसताय् मंकाः धम्मपूजा याइगु जुगु दु।

मंकाः धममपूजा यायेगु नितिं खेमावती गुरुमांया, संयोजक “श्रद्धेय धम्मवती गुरुमां विशेष सामुहिक धम्मपूजा आयोजक समिति २०७९” निस्वाना थीथी कथंया तयारी व मुज्यात न्ह्याकुगु दु।

आयोजक समितिं बिगु जानकारी कथं शुक्रवाः हिनय् २ ताः इलय् येँया क्षेत्रपाटी पार्टी प्याल्सय् बृहत सहलह मुज्या तःगु दु।

धम्मवती गुरुमांयात थथे मंकाः कथं धम्म्पूजा वइगु बैशाख १ गतेया हिनय् १ ताः इलय् येँया सभागृहया हलय् यायेत्यंगु खः।

बोडय् म्येप्वाः खनेगु जात्राय् सुजन बागः श्रेष्ठं म्येप्वाः खनीगु जूगु दु। बोडेया २७ दँया श्रेष्ठं न्हापांखुसी थथे म्येप्वाः खंकेत्यंगु खः।

वय्कः गुक्वःतक म्येप्वाः खंकेधुंकूम्ह बुद्धकृष्ण बाग श्रेष्ठया चिधिकःम्ह काय् खः। बुद्धकृष्णं २०६१ साल निसें २०६४ साल तक प्यक्वः व थ्वयां लिपा २०७३ सालं निसें निरन्तर म्ये प्वाः खंका वयाच्वंगु दु।

२०६५ निसें २०७२ तक यानाः च्याक्वःतक जुजुभाइ बाग श्रेष्ठं म्ये प्वाः खंकूगु खः।

शेयर बजाः परिसूचक नेप्से थौं ८ दशमलव २८ अङ्कं कुहावया १ हजार ८ सय ६६ दशमलव ७९ विन्दुइ कुहावःगु दु।

बैंक व निर्जीवन बीमा समूहया शेयर सामान्य थहावःग दु सा मेगु समूहया शेयर कुहावःगु दु।

२६९ गु कम्पनीया २८ लाख ७० हजार कित्ता शेयर ९२ करोड ६ लाख रुपैयाँ कारोबार जूगु दु। दकलय् अप्पो शिवम् सिमेन्टया ४ करोड ९२ लाख रुपैयाँया शेयर किनबेच जूगु दु।

थौं दकलय् अप्पो साम्लिङ पावर कम्पनीया शेयर साढे ७ प्रतिशत नाप खप्तड लघुवित्त व आदर्श लघुवित्तया शेयर झन्डै ६ प्रतिशतं कुहावःगु दु।

समग्र बजाः घटे जूसा दकलय् अप्पो कालिञ्चोक दर्शन लिमिटेडया शेयर १० प्रतिशतं थहावःगु दु।

राष्ट्रपति रामचन्द्र पौडेल अस्पतालं डिस्चार्ज जूगु दु।

प्वाथय् समस्या जुया वंगु शनिबाः  बहनि त्रिवि शिक्षण अस्पतालय् भर्ना जुयादीम्ह राष्ट्रपति पौडेल प्यन्हुलिपा शीतल निवासय् लिहाझागु दु।