कोशीया मुख्यमन्त्री केदार कार्कीं प्रदेशय् सहमतिया सरकार जुइ धका धाःगु दु। थौं बुधवाः प्रदेशसभाय् विश्वासया मत काये धुका पत्रकारपि नाप खँ ल्ह्यायेगु झ्वलय् मुख्यमन्त्री कार्कीं सहमतिया सरकार गठनया लागि यक्को कुतः जुगु धका धयादीगु खः।

‘सहमतीय सरकारया लागि यक्को कुतः जुल, उकिया लागि संवाद व सहकार्य जुइ’ धका धयादीगु खः। मुख्यमन्त्री कार्कीयात सत्तारुढ गठबन्धनय् दुपि नेपाली कांग्रेस, नेकपा माओवादी केन्द्र, नेकपा एकीकृत समाजवादी व जनता समाजवादी पार्टीया नापनापं गठबन्धन मदुगु नेकपा एमाले न विश्वासया मत बिःगु खः।

मुख्यमन्त्री कार्कीं मन्त्रिपरिषदय् नेकपा एमालेया राम राना व कांग्रेसया शमशेर राईयात दुथ्याकूगु दु सा अय्न खुम्ह ल्यय् ल्यःदनिइ। सत्तारुढ गठबन्धनया शीर्ष नेतां कोशीइ एमाले बाहेकया सरकार दयकेगु खँ ल्हानाच्वंगु इलय् मुख्यमन्त्री कार्कीं एमाले नापं सरकार दय्केगु खँ न्ह्यथ्यःगु खः।

लुँ तोलां थौं १ हजार ३ सय रुपैयाँ थहावःगु दु। लुँ तोलां थौं झींस्वसः थहावना १ लाख १३ हजार २ सय रुपैयाँ न कारोवार जुयाच्वंगु दु धका नेपाल सुनचाँदी व्यवसायी महासंघं धाःगु दु।

अथेहे वहः तोलां न थौं स्वीन्यातका थहावंगु दु। वहः तोलां स्वीन्यातका थहावना थौं १ हजार ४ सय १० रुपैयाँ न कारोबार जुगु दु धका महासंघं धाःगु दु।

प्रधानमन्त्री पुष्पकमल दाहाल प्रचण्डं मुस्ताङ जिल्लाय् जलवायु ह्यूपाःपाखे वःगु क्षति रोके यायेगु लागि झण्डै ५० करोड ग्वाहालि यायेगु धका धाःगु दु।

थौं मुस्ताङय् जूगु छगु ज्याझ्वलय् सम्बोधन यानादीसे वयकलं अथे घोषणा यानादीगु खः। ‘छगू अन्तर्राष्ट्रिय संस्थापाखे झण्डै ५० करोड ग्वाहालि जुइत्यःगु दु, उगु ५० करोड मुस्ताङयात जिमिसं बिइत्यनागु दु,’ प्रधानमन्त्री प्रचण्डं धयादीगु दु।

थ्व नेपाल सरकार मुस्ताङ जिल्लाया ऐतिहासिकता, भौगोलिक विशिष्टता, संस्कृति, परम्परा व उत्पादनप्रति सरकार तसकं हे संवेदनशील दु धका धयादीगु खः।

जलवायु ह्यूपाः राष्ट्रिय जक मखु अन्तर्राष्ट्रिय हे हाथ्याः दु धका धयादीसे प्रधानमन्त्री प्रचण्डं मुस्ताङय् जलवायु ह्यूपातय् लाःगु क्षतियात रोके यायेगुलि नेपाल सरकार गम्भीर ढंगं ज्या याना च्वनागु दु धका धयादीगु खः।

प्रधानमन्त्री पुष्पकमल दाहाल ‘प्रचण्ड’ थौं मुस्ताङय् वःगु दु। राष्ट्रिय प्रकृति संरक्षण कोषअन्तर्गतया अन्नपूर्ण संरक्षण क्षेत्र आयोजना (एक्याप) या ग्वसालय् जुइत्यःगु जलवायु ह्यूपाः सम्बन्धी अन्तक्रियाय् ब्बतिइ कायेगु निति मुस्ताङय् वःगु खः।

नेपाली सेनाया हेलिकोप्टरं थौं सुथय् जोमसोमय् वम्ह प्रचण्ड कोरला नाका, खुसिइ बाः वया क्षति जूगु थाय् कागबेनीलगायत थासय् अनुगमन याइगु ज्याझ्वः दु धका मुस्ताङया  प्रमुख जिल्ला अधिकारी जनकराज पन्तं जानकारी बिःगु दु।

प्रधानमन्त्री दाहालनापं वन लिसे वातावरणमन्त्री डा वीरेन्द्रप्रसाद महतो, गण्डकी प्रदेशया स्वास्थ्य लिसे सामाजिक विकासमन्त्री सुशीला सिंखडा, भौतिक पूर्वाधार विकास लिसे यातायात व्यवस्थामन्त्री रेशमबहादुर जुग्जाली, प्रतिनिधिसभा सदस्य देवेन्द्र पौडेलपिनिगु ब्बति दुगु खः।

येँ महानगरपालिका दुने स्वंगू सतक खण्ड थौंनिसे वानवय् याःगु दु।

येँ महानगरपालिकाया ट्राफिक विज्ञ जगतमान श्रेष्ठया कथं कमलादी मोडपाखे प्रज्ञाभवन जुया घण्टाघर वनिइगु सतक व दरबारमार्गस्थित महेन्द्र शालिकपाखे कृष्णपाउरोटी चोक स्वया क्वय् (काठमाडौं प्लाजाने) वनिइगु लँ वानवय् याःगु दु। अथेहे त्रिपुरेश्वरं येँ–यल स्वाःगु तुयुगु ताँ (न्हुगु ताँ) जुया गुसिङ्गाल पिहावनिइगु लँ न वानवय् याःगु दु ।

त्रिपुरेश्वरय् दुहावय् दु सा यलपाखें त्रिपुरेश्वरय् वयेत न्हुगु ताँय् जूइा देपाःपाखे वयेमाःगु जूगु दु । त्रिपुरेश्वरं यलय् वनिइगु मिलन त्वाः, न्हुगु ताँ जूया वनेमाःगु जूगु दु। अथेहे जमल व दरबारमार्गपाखे रत्नपार्क वनिइगु त्रिचन्द्र क्याम्पस न्ह्यने मोडे याना कमलादि गणेद्यः, प्रज्ञाभवन जूया कमलादीइ वये मदइगु जूगु दु व पुतलीसतकं काठमाडौं प्लाजा जूया हात्तीसारपाखे याःगु सतक खण्डय् आः काठमाडौं प्लाजापाखे देपाय् मोडे जूया महेन्द्र शालिकपाखे वने मदइगु जूगु दु।

सतक वान वय् जूगु जानकारी बिइत यथस सतकय् ट्राफिक प्रहरी व महानगरपालिकाया १०–१० म्ह टोली खटे याःगु दु।