कौलाथ्व पारु आइतवाः बेल्जियम केन्द्र यानाः महाकबि सिद्धिदास महाजुया १५६ दँ बुन्हि हनाज्या जूमय् पाखे हंगु दु।

हलिंया थीथी देय् नेपाः, बेल्जियम, बेलायत, नेदरल्याण्ड, अमेरिका, पोर्चुगल, क्यानाडा च्वपि साहित्यकारपिन्सं ब्वति काःगु उगु ज्याझ्वःया मुँज्यानायः बेल्जियमया सुरेन्द्र मान अमात्यं यानादीगु खः।

मूपाहाँ कथं नेवाः देय् दबू, ख्वपया नायः नरेश नेवाः न सुकुन्दाय् मत च्याकाः उलेज्या यानादिइगु खःसा उगु ज्याझ्वः अमेरिकाय् च्वनादिइम्ह केशर मान ताम्राकारं न्ह्याकादीगु खः। बेल्जजियमयाु रुक्मिणी अमात्यं लसकुस न्वचु बियाः न्ह्याःगु उगु ज्याझ्वः बिशेष पाहाँ कथं प्रा.डा. प्रेम शान्ति तुलाधरं महाकबि सिध्दिदासया बासलं मल्याक सफूतय्गु बिबेचना यासे सिद्धिदासया दर्शनया खँ न्ह्यथ्यनादीगु खः।

मूपाहाँ नरेश नेवाः न महाकबि सिद्धिदासया बारे बिबिध पक्षया खँ कनादीगु खः। नेदरल्याण्डया प्राडा बाल गोपाल श्रेष्ठं मून्वचुइ महाकबि सिद्धिदासया बारे बिस्तृत खँ कनादिगु खः।

बेल्जियमया कबयित्री रुक्मिणी अमात्य, साहित्यकार श्रीलक्ष्मी श्रेष्ठ, मोक्ष बहादुर अमात्य, कबिन्द्र लाल प्रधान, रिता देवी प्रधान, लुमिन ताम्राकार व बिद्या श्रेष्ठ, ज्ञानी शोभा तुलाधर नेवाः, मय्जु मिमला शर्मा व डा शान्त वीर सिंह तुलाधरं थःथःगु साहित्य न्ह्यब्बयादीगु खः।

मुँज्याया मूब्यबस्थापक डा शान्त वीर सिंह तुलाधरं सुभाय् बियादीगु उगु ज्याझ्वलय् ‘हलिं नेवाः दबू’ या नेपाः च्याप्टरया नायः सुरेन्द्र भक्त श्रेष्ठं न महाकबि सिद्धिदासया थःगु नुँगः खँ तयादीगु खः।

न्यायाधीश समाजया अध्यक्षय् सर्वोच्च अदालतया न्यायाधीश सपना प्रधान मल्ल निर्वाचित जूगु दु। समाजया थौं मंगलवाः साधारणसभां वयकःयात सर्वसम्मत कथं अध्यक्ष जूयादीगु खः।

साधारणसभां सर्वोच्च अदालतया न्यायाधीश तिलप्रसाद श्रेष्ठयात उपाध्यक्ष, उच्च अदालतया न्यायाधीश टेकनारायण कुँवरयात महासचिव, जिल्ला न्यायाधीश शिशिरराज ढकालयात सचिव, उच्च अदालतया पूर्वन्यायाधीश बालेन्द्र रुपाखेतीयात कोषाध्यक्षय् ल्यःगु खः।

समाजया कार्यसमिति सदस्यय् उच्च अदालतया न्यायाधीश तेजनारायण सिंह राई, राजेश्वर तिवारी, उच्च अदालतया पूर्वन्यायाधीश शेखरराज पौडेल व जिल्ला न्यायाधीश दुर्गा खड्कायात ल्यःगु खः ।

प्रधानमन्त्री पुष्पकमल दाहालया छातीइ मछिनिइवं अस्पतालय् भर्ना जूगु दु। मंगलवाः थौं बहनि थापाथलीस्थित नर्भिक अस्पताल भर्ना जूगु खः।

अस्पताल स्रोतया कथं प्रधानमन्त्री दाहालं ’कोरोनरी एन्जिओग्राम’ यायेगु तयारी जुयाच्वंगु दु धका धाःगु दु। वयकःयात वार्डय् भर्ना याःगु दु ।

डा. यादव भट्टपिनिगु चिकित्सक पुचलं प्रधानमन्त्री दाहालया उपचारय् लगे जूगु दु।

शेयर बजाः थौं मंगलवाः निगु अंकं थहावःगु दु । १३.१८ अंकं थहावना बजाः १८६४.६२ विन्दुइ थ्यःगु दु। थ्व धयाःगु ०.७१ प्रतिशतं थहावःगु खः ।

मंगलवाः व्यापार, निर्जीवन बीमा, होटल नाप पर्यटन उपसूचकया भाः कुहावःगुलि मेगु दक्को उपसूचकया भाः थहावःगु दु। उकि मध्ये दलकय् अप्पो फाइनान्स उपसूचक १.३० प्रतिशतं सेयर भाः थहावःगु दु। २८९ गु धितोपत्रय् ४५ हजार ४५६ कारोबारपाखे ३८ लाख १३ हजार २३३ कित्ता सेयर कारोवार जुगुलि १ अर्ब ८४ लाख रुपैयाँया कारोबार जूगु दु।

अथेहे एनआईबीएल प्रगति फण्डया लगानीकर्ता तय्सं दकलय् अप्पो ७.३५ प्रतिशत कमय् याःगु दु । नापं स्वेतगंगा हाइड्रोपावर, सिद्धार्थ इक्विटी फण्ड, मेगा म्युचुअल फण्ड, मिथिला लघुवित्त वित्तीय संस्थानापं धितोपत्रया सेयर भाः तक यक्को थहावःगु दु ।

हाथवे इन्भेष्टमेन्टया लगानीकर्ता तय्सं दकलय् अप्पो ८.५३ प्रतिशतं गुमे याःगु दु। उगु कम्पनीया शेयर २६.५० रुपैयाँ स्वया अप्पो कुहावया २८४ रुपैयाँय् थ्यःगु खः। सुपरमाइ हाइड्रो, हिमालयन लघुवित्त वित्तीय संस्था, प्रभु बैंक डिभेञ्चर, सानिमा ग्रोथ फण्डया लगानीकर्ता तय्सं गुमे याःगु दु।

सरकारं गैरआवासीय नेपाःमि तय्त नागरिकता लःल्हाःगु दु। प्रधानमन्त्री पुष्पकमल दाहाल प्रचण्डं बालुवाटारय् ग्वसाः ग्वंगु छगु ज्याझ्वः दथुइ थौं सुथय् गैरआवासीय नागरिकता लःल्हाःगु दु।

उगु ज्याझ्वलय् प्रधानमन्त्री प्रचण्डं एनआरएनए अन्तर्राष्ट्रिय समन्वय परिषदया अध्यक्षपि कुल आचार्य व बद्री केसीयात नागरिकता लःल्हासे गैरआवासीय नागरिकता इनेगु ज्या जूगु दु।

जिल्ला प्रशासन कार्यालय येँ असोज २९ गते कार्यकारी अध्यक्ष केसी व जिल्ला प्रशासन कार्यालय पर्वतें असोज २८ गते अध्यक्ष आचार्यया नामय् नागरिकता जारी याःगु खः।