भारत भ्रमणय् वनाच्वंम्ह प्रधानमन्त्री पुष्पकमल दाहाल ‘प्रचण्ड’ न थौं भारतया राष्ट्रपति द्रौपदी मुर्मूयात नापलागु दु।

राष्ट्रपति भवनय् थौं नापलायेगु झ्वलय् निगु पक्षीय हितय् थीथी खँ जूगु दु।

वयकःपि दथुइ नेपाः–भारत सम्बन्धया थीथी आयामबारे सहलह जूगु धका परराष्ट्र मन्त्रालयं धाःगु दु।

वंगु २०५६ साल जेष्ठ १८ गते सर्वोच्च अदालतं तत्कालीन येँ महानगरपालिका, धनुषा व राजविराजया स्थानीय निकाय कामकाजी भाषा कथं स्थानीय मातृभाषा मछ्यलेत वा मछ्ययेकेत आदेश बिःगु खः ।

थ्व हे झ्वलय् थौं जेष्ठ १८ गते बिहिवाः येँया बसन्तपुरय् तःजिक हाकूगु न्हि हंगु दु।

उगु ज्याझ्वः कथं थीथी खलः पुचःया थःथःगु ब्यानर प्रदर्शन व नारा दूगु प्लेकार्ड ब्वज्या जूगु खःसा थीथी कवि कवयित्रीपिन्स भाषिक जागरणया चिनाखँ, म्ये न्ह्यब्वःगु खः ।

नेपाः व भारत दथुइ न्ह्यगू सम्झौताय् ल्हाःचिं तःगु दु। प्रधानमन्त्री पुष्पकमल दाहाल प्रचण्डं भारत भ्रमणया झ्वलय् विहीवाः उगु सम्झौताय् ल्हाःचिं तःगु खः।

तल्लो अरुण, फुकोट कर्णाली, पेट्रोलियम पाइपलाइन, क्रस बोर्डर पेमेन्ट, दोधारा–चाँदनी सुख्खा बन्दरगाह निर्माण लगायतया समझदारीइ ल्हाःचिं तःगु खः।

प्रधानमन्त्री प्रचण्ड व समकक्षी नरेन्द्र मोदीं मंकाः पत्रकार सम्मेलनपाखे समझदारी जूगु विषयया जानकारी बिःगु खः।

भारत व नेपाः दथुइ न्ह्यगू सहमति

१. नेपाः–भारत पारवहन सम्झौता नवीकरण

२. अमलेखगञ्जपाखे चितवन व सिलिगुडीपाखे झापाया चारआलीतक पेट्रोलियम पाइपलाइन दयकेगु सहमति ।

३. परराष्ट्र मामिला अध्ययन प्रतिष्ठान व सुषामा स्वराज इन्सटिच्यूट दथुइ सहकार्य यायेगु समझदारी ।

४. चाँदनी दोधाराय् एकीकृत जाँच चौकी दयकेगु

५. ६६९ मेगावाटया तल्लो अरुणया भारतीय कम्पनीनाप पीडिए

६. फुकोट कर्णाली भारतीय कम्पनीं दयकेगु सहमति

७. नेपाः व भारत दथुइ क्यूआर कोडपाखे वित्तीय कारोबार यायेगु सम्झौता ।

नेपाःया भैरहवाय् निर्माण जूगु एकीकृत जाँच चौकीया शिलान्यास जूगु दु।

भारत भ्रमणय् दुम्ह प्रधानमन्त्री पुष्पकमल दाहाल प्रचण्ड व भारतीय समकक्षी नरेन्द्र मोदीं उगु परियोजना निर्माणया लागि मंकाः कथं शिलान्यास याःगु दु। भारतया ग्वाहालि उगु परियोजना निर्माण सम्पन्न जूगु खः।

भारतीय नाका सुनौली व भैरहवा नाकाया व्यापार यायेत उगु व्यापार पूर्वाधारं ग्वाहालि याये त्यःगु खः।

उलेज्या भारत भ्रमणय् वनाच्वंम्ह प्रधानमन्त्री पुष्पकमल दाहाल प्रचण्ड व भारतीय समकक्षी नरेन्द्र मोदीं बिहीवाः भारतया बथनाहानिसे विराटनगरया बुधनगरतक रेलवे सेवाया उलेज्या याःगु दु।

बिहीवाः दिल्लीपाखे निगु देय् दथुइ प्रधानमन्त्रीपिन्स स्वीच तिया रलवे व कार्गो रेल उलेज्या याःगु खः। प्रचण्ड व मोदीं उलेज्या यायेवं बथनाहापाखे भारतीय पक्षया कार्गो रेलयात बिदाइ यायेगु व बुधनगरय् नेपाली पक्षं लसकुस याःगु खः।

विराटनगरया एकीकृत भन्सार जाँच चौकी (आईसीपी) तक वइगु मालवाहक रेलं आरती स्ट्रिप्स, स्वस्तिक रोलिङ, हुलास वायर व प्रिमियर स्टिल उद्योगया कच्चा सामग्री हइ।

भारतया बथनाहापाखे विराटनगरया आईसीपी रेलवे स्टेसनतक लानातःगु ८ किलोमिटर रेलमार्गया २०७५ कात्तिक ८ गते रेल सञ्चालनया लागि परीक्षण याःगु खः।

उलेज्या याये न्ह्यः म्हिगः बुधवाः न परीक्षण याःगु खः।