नेवाः पत्रकार राष्ट्रिय दबू यलया ग्वसालय् नेपाःया मातृभाषाय् न्हापांम्ह पत्रकार धर्मादित्य धर्माचार्यया १२१ क्वःगु जन्म जयन्ती छगु ज्याझ्वः दथुइ तजिक हंगु दु। यलया पूच्वःय् च्वंगु झ्वाताय् स्वामां देछाना छगु र्याली नाप यलया सप्तपुर महाबिहारय् छगु ज्याझ्वः जुगु खः।

उगु ज्याझ्वलय् मूपाहा यल महानगरपालिकाया मेयर चिरिबाबु महर्जनं धर्मादित्य धर्माचार्य सिरपा नरेशबीर शाक्य लःल्हानादीगु खः सा पत्रकार दबूया नायः नृपेन्द्रलाल श्रेष्ठं दोसल्ला, नेवाः देय् दबूया नायःपाखे स्वामा व पत्रकार दबू यल जिल्लाया नायः मन्जु बज्राचार्यं खादा न्ययेका हंगु खः।

यलया नायः मन्जु बज्राचार्यया सभाध्यक्षताय् जुगु उगु ज्याझ्वलय् नेपाल आदिबासी जनजाति पत्रकार महासंघया नायः गजुरधन राई, पत्रकार दबूया केन्द्रिय नायः नृपेन्द्रलाल श्रेष्ठ, निवर्तमान नायः सुरजबीर बज्राचार्य, संस्थापक नायः श्रीकृष्ण महर्जन, सल्लाहकारपिं सुरेश प्रधान, गुथि संस्थानया प्रमुख कार्यकारी किरण शाक्य, यल महानगर ९ वडाध्यक्ष राजु महर्जन, नेवाः देय् दबूया नायः पवित्रं बज्राचार्य लिसेलिसें थीथी व्यक्तित्वपिं विशेष पाहाँ कथं झायादीगु खः । 

सत्ता गठबन्धनया बैठक थौं च्वनिइगु जुगु दु। उगु बैठक थौं न्हिनसिया ३ बजे प्रधानमन्त्री निवास बालुवाटारय् च्वनिइगु जुगु दु धका प्रधानमन्त्रीया सचिवालयं धाःगु दु।

प्रधानमन्त्री पुष्पकमल दाहाल प्रचण्डं मन्त्रिपरिषद् विस्तार, सरकारया नीति तथा कार्यक्रम, बजेट लगायत समसामयिक विषयमा छलफल यायेत बैठक आह्वान याःगु खः।

प्रधानमन्त्री प्रचण्डं आः खानेपानी, वन तथा वातावरण, युवा तथा खेलकुद व स्वास्थ्य तथा जनसङ्ख्या मन्त्रालय थम्हेसिया हे कः घाना वयाच्वंगु खः।

लुँया भाः थौं तोलां १ हजार ८ सय रुपैयाँ थहावंगु दु। लुँ तोलां थौं १ हजार ८ सय रुपैयाँ थहावना १ लाख १० हजार ६ सय रुपैयाँ थ्यःगु दु धका नेपाल सुनचाँदी व्यवसायी महासंघं धाःगु दु।

अथेहे, वहः तोलां न नीतका थहावंगु दु। वहः तोलां थहावना १ हजार ४ सय २५ रुपैयाँ न कारोबार जूगु दु धका महासंघं धाःगु दु।

थौं विश्व प्रेस स्वतन्त्रता दिवस हलियकं हनिइगु जुगु दु। अथेहे नेपालय् न थीथी ज्याझ्वः याना हनिइगु जुगु दु।

“भविष्यया अधिकार सुनिश्चितता : मानव अधिकारया संवाहक अभिव्यक्ति स्वतन्त्रता” धइगु नारा ज्वना थौं विश्व प्रेस स्वतन्त्रता दिवस हनेत्यःगु दु।

युनेस्कोया ग्वसालय् अफ्रिकी राष्ट्र नामिबियाया विन्डहक शहरय् जूगु पत्रकार सम्मेलनय् ‘बहुलवादी व स्वतन्त्र प्रेसया लागि विण्डहक घोषणापत्र’ जारी याःगु खः।

उकियात हे लुमन्तिइ सन् १९९३ निसे संयुक्त राष्ट्रसङ्घं थुगु दिवस हनिइगु निर्णय याःगु खः। राष्ट्रसङ्घया थुगु निर्णयनाप थौं उगु दिंया प्रेस व अभिव्यक्ति स्वतन्त्रताया पक्षधरपिन्स महत्वपूर्ण दिं कथं कयावया च्व.गु खः ।

येँ महानगरपालिका १८ वडाय् मदुम्ह पुलांम्ह वडाअध्यक्ष चन्द्रानन्द नेवाःया झ्वाताः पलिस्था याःगु दु ।

वयकः २०१९ सालनिसें २०५९ सालतक येँ महानगरपालिका १८ वडाय् वडाअध्यक्ष जुयादीम्ह खः।

चन्द्रनन्द नेवाःया पूर्णकदया झ्वाता वय्कःया दकिला पुण्य तिथिइ येँ महानगर १८ वडाया ज्याकुथिइ उपप्रमुख सुनिता डंगोलं उलेज्या यानादिगु खः।

येँ महानगर १८ वडाध्यक्ष न्हुछेकाजी महर्जनया सभाध्यक्षताय् जूगु उगु ज्याझ्वलय् मूपाहां येँ महानगरया उपमेयर सुनिता डंगोल, येँ महानगरया पुलांम्ह प्रमुख विद्यासुन्दर शाक्य, २७ वडाया पुलांम्ह अध्यक्ष चिनियामान वज्राचार्य, १८ वडाया पुलांम्ह वडा सदस्य हरिकृष्ण डंगोलपिन्सं वय्कःया लिसेया थःपिनिगु अनुभवया बारे नुगःखँ प्वंकुसे श्रद्धाञ्जली देछानादीगु खः ।

उगु ज्याझ्वलय् मूर्तिकार श्याम तुलाधरयात उपप्रमुख डंगोलं सम्मानपत्र बियाः सम्मान नं यायेगु ज्या जूगु खः ।