दरबारमार्गय् पार्किङ चिइकूगु विरोधय् अनच्वपि व्यवसायपि आन्दोलनय् पिहावःगु दु।

उपत्यका ट्राफिक प्रहरी कार्यालय व येँं महानगरपालिकां न्हापानिसे सञ्चालन जुयाच्वंगु छखेपाखे पार्किङ चिइकूगुलि व्यवसायपि आन्दोलित जूगु खः।

व्यवसायीपिन्स थःगु पसःया सटर बन्द याना हाकूगु ब्यानर तया सतकय् प्रदर्शन याःगु खः। महानगरं ट्राफिक प्रहरीनाप मिले जूया पुस १९ गतेनिसे दरबारमार्ग क्षेत्रये पार्किङ यायेत निषेध याःगु खः।

पार्किङ याये मजिइवं व्यवसायीपिन्स सटरया बाः तक पुलेमफया अथे विरोधय् कुहावःगु खः। व्यवसायीपिन्स महानगरनाप वार्ता याये धाःसा महानगरं बेवास्ता याःगुलि आन्दोलनय् कुहावःगु खः।

मगर समुदायया थौं ४१ क्वःगु मगर संघ स्थापना नाप मगर एकता दिवस हनेत्यःगु दु। दिवसया लसताय् मगर बाहुल्य दुगु पालिकाय् सार्वजनिक विदा न बिःगु दु।

२०३९ साल फागुन १५ गते तनहुँया दमौलीइ मगर संघ स्थापना जूगु दिंयात सम्मान यायेगु कथं मगर समुदायपिन्स थुगु दिं मगर एकता दिवस कथं हना वयाच्वंगु खः।

स्थापना दिवस परम्परागत भेषभुषानाप ¥याली प्रदर्शनी व सोरठी, कौडा, सालैजो नाप घाटु प्याखँया ज्याझ्वः दु धका नेपाल मगर संघया सचिव हेमन्त बुढाथोकीं धाःगु दु।

मगर समुदायपिन्स फागुन १५ गते सार्वजनिक विदा बिइमाःगु, नेपाःया न्हापाम्ह शहीद धका लखन थापायात राष्ट्रिय विभूति घोषणा यायेमाःगु माग तयावयाच्वंगु खः।

प्रधानमन्त्री पुष्पकमल दाहाल प्रचण्डया दोहा भ्रमण रद्द जूगु दु।

अल्पविकसित राष्ट्रपिनिगु न्याक्वःगु सम्मेलनय् ब्बति कायेगु निति प्रधानमन्त्री फागुन १९ गते शुक्रबाः कतार वनेगु ज्याझ्वः दुगु खः।

तर राष्ट्रपतिया निर्वाचन लगायतया राजनीतिक परिस्थितिया कारण भ्रमण रद्द जूगु दु धका प्रेस संयोजक सूर्यकिरण शर्मा न जानकारी बिःगु दु।

फागुन २१ गतेनिसे सुरु जुइगु अल्पविकसित राष्ट्रपिनिगु सम्मेलनय् ब्बति कायेगु निति प्रधानमन्त्री प्रचण्ड दोहा वनेत्यःगु खः।

यलया चिकंबहिलिया ऐतिहासिक सप्तपुर महाविहारया आजु, अजि नापं सर्वसंघया दुजःपिंत भोजन दान ज्याझ्वः जुगु दु।

चिकंबही सप्तपुर महाविहारया शाक्य पूर्वज नेपालय् बुद्ध जयन्ती हनेज्याया न्ह्यलुवाःया नापनापं नेपालभाषाया न्हापांम्ह पत्रकार धर्मादित्य धर्माचार्य जगतमान वैद्यया किपाःया उलेज्या नं जुउगु खः । उगु किपाः बुद्धरत्न शाक्यं कियादीगु खः ।

येँया लगं त्वालय् च्वंगु तःबहाःया संघ दुजः नापं मेत्तागार धम्म परिवारया दुजः शान्तरत्न शाक्य व वय्कः जहान लक्ष्मीदेवी शाक्यं उगु पंचदान व संघयात भोजन दान ज्याझ्वःया ग्वसाः ग्वयादीगु खः । वय्कःपिंसं थः पाजुबाज्यापिं (वैद्य खलः)या बरे छुइगु ऐतिहासिक महाविहारय् उगु ज्याझ्वः यानादीगु खः ।

थेरवाद बुद्ध धर्म पुनर्जागरणया न्ह्यलुवा, नेपालभाषालिसें मातृभाषाया न्हापांम्ह पत्रकार, महाविहारया संघ दुजः धर्मादित्य धर्माचार्य (जगतमान वैद्य)या बहाःकथं नं म्हसिउगु विहार सुधार समितिया नायःयात दातापिंसं भोजन दान लःल्हानादीगु खः ।

शाक्य महाविहार संघया नायः शुभकाजी शाक्यया मूपाहांकथं झायादीगु ज्याझ्वलय् बौद्ध विद्वान प्रा. डा. वज्रराज शाक्य, विहार संघया दुजः मानकाजी शाक्यं नुगःखँ तयादीगु खःसा लोककवि राजभाई जकःमिं धर्मादित्यया बारे चिनाखँ न्यंकादीगु खः ।मुक्कं शाक्यत जक दुथ्यानाच्वंगु थुगु विहारया सर्वसंघय् १४८ म्ह दुजःत दुथ्यानाच्वंगु दु । थुकथंया बौद्ध विहारया सर्वसंघया दुजःपिंत गृहस्थ भिक्षु धायेगु यानातःगु दु ।

प्रधानमन्त्री पुष्पकमल दाहाल प्रचण्डयात मेगु स्वंगु मन्त्रालयया जिम्मेवारी वःगु दु। राष्ट्रिय प्रजातन्त्र पार्टी पाखे सरकारय् दुथ्यापि मन्त्रीपिन्स राजीनामा बिइवं खाली जूगु मन्त्रालयया कार्यभार प्रधानमन्त्री प्रचण्डं कःघाःगु दु।

राष्ट्रपति विद्यादेवी भण्डारीं प्रधानमन्त्रीया सिफारिसय् थौं थीथी स्वंगु मन्त्रालयया कार्यभार प्रधानमन्त्रीं हे कःघायेगु कथं तोके याःगु दु धका राष्ट्रपति कार्यालयं पिकाःगु विज्ञप्तिइ उल्लेख याःगु दु।

राप्रपापाखे सरकारय् सहभागी जूपि मन्त्रीपिन्स म्हिगः शनिवाः प्रधानमन्त्री दाहालयात राजीनामा लःल्हाःगु खः। राजीनामा बिउपि मन्त्रीपि उपप्रधान नाप ऊर्जा, जलस्रोत नाप सिँचाइ मन्त्री राजेन्द्र लिङ्देन, सहरी विकास मन्त्री विक्रम पाण्डे, कानुन न्याय नाप संसदीय मामिला मन्त्री ध्रुवबहादुर प्रधानपि खः।