नेपालभाषाया बरिष्ठ च्वमि नाप संस्कृतिविद् ज्ञानकाजी मानन्धर थौं मन्त ।

ताः ई न्ह्यवंनिसें जलस्येँया ल्वचं कयाः उसाँय् मदयाच्वंम्ह वय्कः ८९ दँय् थौं सुथय् भ्वँतया थःगु हे छेँय् मदुगु खः । भ्वँतया कला, संस्कृति व सम्पदाया बारे अध्ययन यानाः वय्कलं तःगू सफू च्वयादीगु दु ।

अथे हे वय्कलं भ्वँतया थीथी धार्मिक, सांस्कृतिक बाखंयात नाट्य रुपान्तरण यानाः नाटक सफू नं च्वयादीगु दु । कपिलवस्तुस भगवान्, कुमारी, खड्गजोगिनी, बनेपा स्तवन, अरनिकोया श्वेतचैत्य, मानन्धरतय्गु विषय छुं खँ वय्कःया नांजाःगु सफूत खः ।

अथे हे वय्कलं अंग्रेजी भासं ‘द लिजेण्ड अफ नेपाल’ नांगु सफू नं च्वयादीगु दु । वय्कलं भ्वँतया चण्डेश्वरी, येँया कुमारी, ख्वपया नवदुर्गा, पन्तिया इन्द्रेश्वर महाद्यः, किपूया बाघभैरव, गोर्खाया गोरखनाथ आदि बारे नं अनुसन्धान यानाः च्वसुत च्वयादीगु दु ।

मदुम्ह मानन्धरया अन्त्येष्टि थौं हे भ्वँतय् यायेत्यंगु दु । वय्कः जहान लिसें निम्ह काय् व निम्ह म्ह्याय् दी ।

विश्व आदिबासी दिवस हनेगु झ्वलय् नेपाल सरकार आदिवासी जनजाति आयोगं “प्रस्तावना लिसे प्रतिवेदन लेखन तालिम” ज्याझ्वः याःगु दु।

आदिवासी जनजाति चलचित्र महासंघया लिसे जाना याःगु उगु तालिम ज्याझ्वःया उलेज्या जनजाति आयोगया अध्यक्ष राम बहादुर थापां यानादीगु खः। ज्याझ्वलय् नुगःखँ तयेगु झ्वलय् आदिवासी जनजाति तयेगु  संघ संस्थायात न्ह्याकेत आर्थिक स्रोतया अभाव दुगु खँ वःम्ह वाःचाः धका धयादिसे आर्थिक स्रोतया निंतिं सरकारी व गैर सरकारी संघसंस्था याके ग्वाहालि कायेगु निति प्रस्तावना व प्रतिवेदन बाँलायेमा धका नं धयादिल।

अथेहे जुउगुलिं थ्व लेखन तालिम तसकं ज्या वइगु खँ न्ह्यथना दिल। उलेज्या झ्वलय् आदिवासी जनजाति चलचित्र महासंघया अध्यक्ष पुर्खाजित राइं लसकुस यानादीगुलि महासंघया निवर्तमान अध्यक्ष अमृत सुनवार, पूर्व अध्यक्ष प्रतिमाया पुन मगर व संस्थापक उपाध्यक्ष विजयरत्न तुलाधरपिन्सं आदिवासी जनजाति मातृभाषी संकिपाया थीथी पक्ष कुलादिसे थ्व प्रस्तावना व प्रतिवेदन लेखन तालिमया महत्वयात कया नुगःखँ तयादीगु खः ।

मायालु तामाङ्ग मयजुं प्रशिक्षण बियादीगु तालिम ज्याझ्वलय् आदिवासी जनजाति मातृभाषी संकिपालिसे स्वापु दूगु संघ संस्थापाखें ४० म्हेसियागु ब्वति दुगु खः ।

शाक्य महाविहार संघया न्हयदँ फुना च्यादँ क्यंगु दु । संघ च्यादँ क्यंगु लसताय् विहिवाः छगू ज्याझ्वः दथुइ च्याक्वःगु बुदिं हंगु खः ।

संघया नायः शुभकाजी शाक्यया सभाध्यक्षताय् जूगु उगु ज्याझ्वलय् बागमति प्रदेशया सांसद शैलेन्द्र बज्राचार्य मूपाहाँ कथं झायादीगु खः। मूपाहाँ बज्राचार्यं थःगु नुगःखँ तयेगु झ्वलय् बौद्ध बहाः बहिलय् ल्यायम्ह पुस्ताया सकृयता म्हो जुया वंगु खँ न्ह्यःथंसे इमिगु नुगः त्याके फइगु ज्या यायेमाल धका धयादिल ।

थ्वहे झ्वलय् ल्यायम्ह पुस्तायात उद्यमशील ख्यलय् छ्यलेमाःगु व उकिया निंतिं माःकथं या तालिम बिइगु ग्वसाः ग्वया च्वनागु दु धका धासे अजागु ज्या ख्यलय् वइगु उद्यमशील तालिमय् संघलिसे आबद्ध बहाःया ल्यायम्ह पुस्तायात ब्वति कायेकेगु निंतिं संघं पलाः ल्ह्वने माःगु खँय् बःबियादिल ।

ज्याझ्वलय् लसकुस न्वचु तयेगु झ्वलय् संघया मूछ्यान्जे संघरत्न शाक्यं संघ स्थापना जूसां निसें आःतकया गतिविधि कनादीगु खः ।

परराष्ट्रबिद नाप बरिष्ठ पत्रकार हिरण्यलाल श्रेष्ठया स्वयास्थ्यय् जुयावःगु दु। बरिष्ठ पत्रकार श्रेष्ठया जँय् नसा च्यापे जुया अस्पतालय् निवाः न्ह्यः भर्ना जुयादीगु खः।

जँय् नसा च्यापे जुया वयकः येँया स्वयम्भुइ च्वंगु मनमोहन मेमोरियल मेडिकल कलेज लिसे शिक्षण अस्पतालय् जुयादीगु खः। वयकःयागु छु दिं न्ह्यः जकः अप्रेशन यायेगु ज्या जुगु खः।

वयकःया काय् डा. मुजः श्रेष्ठया कथं आः छन्हु निन्हुया दुने डिस्चार्ज जुइ धका लहनान्युजयात धयादीगु दु।

सर्वोच्च अदालतं कोशीया मुख्यमन्त्री उद्धव थापां संविधानकथं विश्वासया मत काःगु माने यायेमज्यु धका न्हापांगु निष्कर्ष पिकाःगु दु।

एमाले संसदीय दलया नेता हिक्मतकुमार काकी न बिःगु रिटया सुनुवाइ यासे न्यायाधीश ईश्वरप्रसाद खतिवडाया एकल इजलासं प्रदेशसभाया अध्यक्षता याना च्वम्ह मनूखं विश्वासया मत बिइगु संविधान, संसदीय अभ्यास, संवैधानिक नैतिकता व सर्वोच्चं थ्व स्वया न्ह्यः प्रतिपादन याःगु सिद्धान्त अःखः धका धाःगु दु।

वंगु भदौ ४ गते मुख्यमन्त्री थापां विश्वासया मत कःगु इलय् सभाया अध्यक्षता यानाच्वम्ह इस्राइल मन्सुरी व गीता तिम्सिनां तक मत बिःगु खः। विश्वासया मतसम्बन्धी प्रस्तावय् मतदान जूयाच्वंगु इलय् मन्सुरीं सभाया अध्यक्षता यानाच्वंगु खः। मतदान व मत भिंकेगु ई क्वचाय् धुका मन्सुरीं सभाया अध्यक्षता यानाच्वम्ह तिम्सिनायात सःता थःम्हेसिया मतदान याःगु खः।

उपि निम्हसिया बिःगु मतया आधारय् थापां ९३ म्ह सदस्यीय प्रदेशसभाय् बहुमत प्रदेशसभा सदस्यया ४७ म्हेसिगु समर्थन काःगु खः।