झोछेँ लागाय् नं म्हिगःनिसें पार्किङ बन्द याःगु दु। झोछेँनिसे बसन्तपुर तक म्हिगः येँ महानगरपालिकां माइकिङ यानाः पार्किङ बन्द याःगु खः ।

नगर प्रहरीतय्सं झोछेँनिसें ओमबहाः तक हे पार्किङ बन्द याकेगु धकाः माइकिङ याःगु खःसां आःयात ओमबहाःपाखे धाःसा पार्किङ याये दइगु व्यवस्था याःगु दु ।

पार्किङ चीकेगु ज्या येँ महानगर २३ वडा ज्याकू, झोछेँ सामुदायिक समाज व स्थानीय व्यवसायीं याःगु खः । झोछेँ लागा नेपाःया हे न्हापांगु पर्यटकीयस्थल खः ।

बाराया जीतपुरसिमरा उपमहानगरपालिका–२२ चुरियामाईलय् तीर्थयात्री ज्वःना वंगु बस दुर्घटना जुगुलि न्ह्यम्ह सीउगु दु।

येँपाखे महोत्तरीया लोहारपट्टी वनाच्वंगु मधेस प्रदेश–०३–००१ ख ७९९४ नम्बरया बस बुधवाः चान्ह्यः १ बजेति दुर्घटना जूगु खः।

उगु दुर्घटनाय् प्यम्ह मिसा, स्वम्ह मिजंपि, खुम्ह भारतीय नागरिक व छम्ह नेपाःमि दुगु धका इलाका प्रहरी कार्यालय सिमराया प्रहरी नायब उपरीक्षक डीएसपी प्रदीपबहादुर क्षेत्रीं जानकारी बिःगु दु।

चालकनाप २७ म्ह यात्रु च्वना वःगु उगु  बस चुरियामाई द्यःपाखे १०० मिटर दक्षिणपाखे च्वंगु खुसिइ कुतुवंगु खः। दुर्घटना जूगुलि १९ म्ह घाःपाः जूगु दु।

घाःपाः जूपिनिगु हेटौंडाया चुरेहिल अस्पताल व हेटौंडा अस्पतालय् वासः यानाच्वंगु दु। दुर्घटना जूगु बसया चालक धाःसा बिस्यू वःगु दु।

आक्रमणयात किपूया थापागामय् चितुवाया आक्रमणं छम्ह मनू घाःपाः जूगु दु।

घाःपाः जूम्ह मनूयात इतेको अस्पतालय् वासः यानाच्वंगु दु। खा लहिइगु थासय् चान्ह्याय् पाःच्वनाच्वम्ह उम्ह मनूयात चितुवां आक्रमण याना घाःपाः याना बिःगु खः।

वयाःगु अवस्था धाःसा सामान्य दु।

कोशी प्रदेशया मुख्यमन्त्री उद्धव थापां गैरसंवैधानिक तरिकां विश्वासया मत काःगु धासे नेकपा एमालें दायर याःगु रिटय् थौ सुनवाइ जुइगु दु।

सभाध्यक्षया मतनापं विश्वासया मत काःगुलि थापा नेतृत्वया सरकार बर्खास्त यायेत अन्तरिम आदेशया माग यासे दायर याःगु रिटय् थौ सुनुवाइ जुइत्यःगु खः।

कोशी सरकारया पूर्व मुख्यमन्त्री तक जुयादीम्ह नेकपा एमाले संसदीय दलया नेता हिक्मतकुमार कार्कीं दायर याःगु रिटय् सर्वोच्च अदालतय् थौ हे सुनुवाइ याना पेशी तोके याःगु खः।

प्रदेशसभाया सभाध्यक्षं तक मतदान याना विश्वासया मत काःगुलि संविधान व सर्वोच्च अदालतया आदेश अःखः ज्या जूगु धासे एमाले कोशी प्रदेशसभा संसदीय दलया नेता कार्कीं परमादेशया माग यासे बुधवाः सर्वोच्च अदालतय् रिट दर्ता याःगु खः।

कोशी प्रदेश सरकारया मुख्यमन्त्री उद्धव थापां संविधान अःखः व प्रचलित कानुन अःखः विश्वासया मत काःगु इलय् सभाध्यक्ष जूयाच्वंम्ह इस्राइल मन्सुरीयात मतदान याकां विश्वासया मत काःगु धका एमाले न धाःगु खः।

नेपाल नागरिक उड्डयन प्राधिकरण विरुद्ध येँ महानगरपालिकाया मेयर बालेन शाहं तःगु रिट खारेज जूगु दु। वंगु असार १ गते न्ह्यन्हुया दुने स्पष्टीकरण पेश यायेत धाःगु खःसा प्राधिकरणं पौ च्वंगू पौ कारवाही बदरया माग यासे मेयर शाहं प्राधिकरणविरूद्ध उच्च अदालत यलय् रिट दर्ता याःगु खः।

अदालतं माग दाबी कथं अन्तरिम आदेश बिइत अस्वीकार याये धुका अल्पकालीन आदेश जक जारी याःगु खः। अदालतं अन्तरिम आदेशबारे थप सहलहया लागि असार १२ गते सःतूगु खः। तर, बुधवाः अदालतं बालेन शाह न तःगु रिट खारेज याना बिःगु दु। रिट खारेजी नापं मेयर बालेनं प्राधिकरणयात न्ह्यन्हुया दुने लिखित स्पष्टीकरण बिइमाःगु दु।

प्राधिकरणया कथं स्पष्टीकरण मबिउसा नागरिक उड्डयन प्राधिकरण ऐन, २०५३ या दफा २५ (१) कथं ५० हजार रुपैयाँ जरिवाना जुइफु । वंगु जेष्ठ ३२ गते येँ महानगरया नगर प्रहरीं सिनामंगलय् च्वंगु कार्गो बिल्डिङ न्ह्यने च्वंगु फेन्सिङ तारबार चानाबिःगु खः।

तर थःगु स्वामित्वय् दुग धका तारबार महानगरं नियमविरीत थुनाबिःगु दु धका धासे प्राधिकरणं मेयर शाहयात स्पष्टीकरण न्यःगु खः। वडा ९ नम्बय् वडां कार्गो विल्डिङ न्ह्यने सरकारी जग्गाय् पार्क दयकेगु योजना कथं जग्गा खाली यायेत महानगरं नगर प्रहरी खटे याःगु खः।

प्राधिकरणं महानगरया मेयर शाह नाप नगर प्रहरी प्रमुख राजुनाथ पाण्डे व येँ महानगरपालिका वडा नं ९ या अध्यक्ष रामजी भण्डारीयात न्ह्यन्हुया दुने स्पष्टीकरण बिइत धाःगु खः। तर, मेयर शाह स्पष्टीकरण मबिउसे प्राधिकरण विरुद्ध अदालत वंगु खः।