साल्ट ट्रेडिङ्ग कर्पोरेशन लिमिटेडया अध्यक्ष पदय् प्रदीपलाल श्रेष्ठ नियुक्त जूगु दु।

श्रेष्ठयात चैत २६ गते च्वंगु संचालक समितिया बैठकं ल्यःगु खः। श्रेष्ठं वंगु च्यादँनिसे कर्पोरेशनया संचालकया कथं थःगु ज्या याना वयाच्वंगु खः।

वयकः मोरङ्ग सुगर मिल लिमिटेडया सञ्चालक समितिया न अध्यक्ष खः।

कम्पनीया आइपिओ थौं मंगलबाःनिसे निष्कासन नाप बिक्री खुल्ला जूगु दु। कम्पनीं न्हापागु चरणय् आयोजना प्रभावित क्षेत्रया स्थानीय बासिन्दा नाप वैदेशिक रोजगारी वनाच्वपि नेपाःमिपिन्त आइपिओ निष्कासन याये धुका आः सर्वसाधारणया लागि निष्कासन याःगु खः।

कम्पनीं जारी पुँजी ५३ करोड ६४ लाख ८६ हजार रुपैयाँया २० प्रतिशत अर्थात् १ करोड ७ लाख २९ हजार ८०० रुपैयाँ बराबरया प्रतिसेयर १०० रुपैयाँ दरं १० लाख ७२ हजार ९७२ कित्ता आइपिओ सर्वसाधारणया लागि निष्कासन याःगु दु। उकि मध्ये १ लाख ७ हजार २९८ कित्ता साधारण सेयर वैदेशिक रोजगारीइ च्वपि नेपाःपिन्त लागि बाँडफाँट याये धुका ६८ हजार १७ कित्ता सेयर सामूहिक लगानी कोषया लागि सुरक्षित याःगु खः।

ल्यःदनिगु १२ लाख ७१ हजार ८६१ कित्ता सेयरया लागि सर्वसाधारणपिन्स आवेदन बिइ फइगु जुगु दु। उगु आइपिआ दकलय् कम १० कित्ताया लागि आवेदन बिइफइसा दकलय् अप्पो १० हजार कित्ताया लागि आवेदन बिइ फइ।

कम्पनीया आइपिओ २०८० वैशाख ३ गतेतक आवेदन बिइ फइ। उगु इलय् दक्को कित्ताया लागि आवेदन मवसा वैशाख १२ गते तक ई तयातःगु दु।

सेयर बजाः थौं मंगलबाः दोहोरो अंकं थहावःगु दु । २७.३१ अंकं थहावना बजाः १८७१.३३ विन्दुइ थहावःगु खः।

नेप्से १.४८ प्रतिशतं थहवंसा कारोबार १ अर्ब न मथ्य। २६२ गु धितोपत्रपाखे ३५ हजार २३७ गु कारोबारपाखे ३३ लाख १५ हजार ७२० कित्ता सेयर किनबेच जूगु खः।

कारोबार रकम ९४ करोड ५२ लाख ४९ हजार १७९ रुपैयाँ जूगु दु। मंगलबाः दक्को उपसूचक थहावःगु दु। दकलय् अप्पो उत्पादन व प्रशोधन थःहावंगु दु।

थौं कालिञ्चोक दर्शन प्रालि व आदर्श लघुवित्तया कारोबार सकारात्मक सर्किट लेबलय् थ्यःगु दु। श्रृजनशील लघुवित्त, युनिक नेपाल लुघवित्त, छ्याङ्दी हाइड्रोया धितोपत्र यक्को थहावःगु दु।

लुँ तोलां थौं न्यासः थहावःगु दु। लुँ तोलां थौं न्यासः थहावना १ लाख ९ हजार ८ सय रुपैयाँ न कारोवार जूगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न थौं न्यातका थहावःगु दु। वहः तोलां न्यातका थहावना १ हजार ४ सय ३५ रुपैयाँ न कारोबार जूगु दु।

मचातय्त लक्षित यानाः यल महानगरपालिका– १६ वडा बालअधिकार समितिं आईतबाः व्यक्तित्व विकास लिसें उद्घोषण तालिम याःगु दु ।

यलया हःबहाःस्थित रत्नाकर महाविहारया सामुदायिक भवनय् न्ह्याःगु तालिमया यल महानगरपालिका– १६ या वडाअध्यक्ष निर्मलरत्न शाक्यं उलेज्या यानादिल । थःगु नुगःखँ तय्गु झ्वलय् वडाअध्यक्ष शाक्यं न्ववाय्गु बानी, तरिका, व सम्बन्धी सैद्धान्तिक व व्यवहारिक ज्ञान व्यक्तित्व विकासया अनिवार्य तत्व खःगु धयादिल ।

समितिया कजि लिसें वडाया महिला सदस्य बबिता श्रेष्ठं मचातय्गु बाल विकासया अधिकार, सहभागिताया अधिकारयात केन्द्रबिन्दुइ तयाः ज्याझ्वःया ग्वसाः ग्वयावयागु जानकारी बियादिल । १२ दँनिसें १६ दँतक्कया २०म्ह लक्षित यानाः ज्याझ्वः याय्गु बिचाः दुगुलिइ सहभागीया ३५ हाराहारीइ थ्यंगुलिं मचा लक्षित ज्याझ्वःया आवश्यकता व महत्व अझ अप्वःगु सीदुगु कजि श्रेष्ठया धापू खः ।

व इलय् रत्नाकर महाविहार संरक्षण समितिया दुजः कर्ण बज्राचार्यं मचातय्के दुने सुलाच्वंगु प्रतिभा पिब्वय्त थुकथंया ज्याझ्वलं ग्वहालि जुइगु विश्वास प्वंकादिल ।

अथे हे, नेपाल समाचारपत्रका सहायक सम्पादक सुनील महर्जनं मचात स्वभावं हे यक्व सय्केगु क्षमता ज्वनावइगु जूगुलिं स्थानीय तहं बालमैत्री परिवेशय् व क्षमताया भरपुर सदुपयोग याय्गु नीति, कार्यक्रम हय्माःगुलिइ बः बियादिल । न्हय्न्हुतक्क जुइगु उगु तालिमया मुख्य प्रशिक्षक सरिता बज्राचार्य व ग्वहालिमिया रुपं प्रेरणा बज्राचार्य दु ।