लच्छिया जुयाच्वंगु स्वस्थानी व्रत थौै क्वचाइगु जुगु दु।

हिन्दू धर्मावलम्बीपिन्स पुसया पून्हिनिसे माघया पून्हितक थुगु ब्रत यायेगु नाप स्वस्थानी व्रतया बाखं छेँ छेँ कनेगु याइ।

राष्ट्रियसभा उपाध्यक्ष पदय् थौं मनोनयन दर्ता जुइगु दु। मनोनयन दर्ताया ई थौं न्हिनय् १ बजेनिसे ४ बजेतक ई बियातःगु दु ।

सत्ता पक्षं नेकपा माओवादी केन्द्रया उर्मिला अर्यालयात उम्मेदवारया रुपं न्ह्यने यकूगु दु सा विपक्षी दलं थौं उम्मेदवार ल्ययेत्यःगु दु ।

तत्कालीन राष्ट्रियसभा उपाध्यक्ष शशीकला दाहालया कार्यकाल २०७८ य् क्वचागुलि आःतक खाली जुयाच्वंगु खः।

येँ १७ वडां महानगरपालिकां नागरिक विद्युतीय सुशासन सेवा संचालनय् हःगु दु येँ महानगरपालिकाया प्रवक्ता नापं १७ वडाअध्यक्ष नविन मानन्धरं डिटिनल सिग्नेचरया टोकन प्रयोग यानाः नागरिक विद्युतीय सुशासन सेवा शुभारम्भ यानादीगु खः ।

सेवाया शुरुवात यासें महानगर प्रवक्तानापं १७ वडाअध्यक्ष मानन्धरं थःपिनिगु लक्ष्य पेपरलेस याना यंकाः फेसलेस गभर्नेन्स खः धयादिल । ‘वडा ज्याकू धइगु महानगरया मखसे जनतायात सेवा बीगु जूगुलिं थ्व जनताया हे ज्याकू खः । थनं प्रवाह जुइगु सेवायात जनतानं थःगु हे खः धइगु महसुस याकेगु जिमिगु कुतः जुइ’, प्रवक्तालिसें १७ वडाअध्यक्ष मानन्धरं धयादिल ।’

‘विद्युतीय शासनया निंतिं दकलय् न्हापां थुकिया प्रयोगकर्ता ल्याय्म्हत जुइ, थुकियात अप्वयेका यंकाः सकसिगुं पहुँचय् तक थ्यंकेगु लक्ष्य दु’ वय्कलं धयादिल ’गुकुन्हुया दिंनिसें पूर्णरुपं विद्युतीय सुशासन सेवा संचालन जुइ व हे दिंनिसें भ्वंया प्रयोग यायेगु ज्या नं बन्द जुइ ।

प्रणाली संचालनया निंतिं विकासकर्ता विज्ञतय्सं ग्वाहालि याइगु जूगु दुसा वडां नियुक्त याःपिं वडास्तरीय परामर्शदातां वडाअध्यक्ष, वडासचिवलिसें सेवालिसे सम्बन्धित कर्मचारीयात सहजीकरण याइ । थुुगु प्रणालीइ ई–सिफारिस, दर्ता, चलानी सेवा दुथ्याकातःगु दुसा सेवा कायेत सेवाग्राहीं येँ महानगरपालिकाया मोबाइल एप ‘केएमसी’पाखें थःगु विवरण जायेका छ्वयेगु व प्राप्त तथ्यांक व सूचना वडा सचिवयाथाय् थ्यनेवं थुकिया प्रक्रिया न्ह्याइ ।

थुकिया प्रमाणीकरणया निंतिं वडा सचिवतय्त डिजिटल हस्ताक्षरया टोकन नं बीधुंकूगु दु ।आःयात येँ १७ वडां शुरु जूगु थुगु सेवा वइगु दिनय् मेमेगु वडाय् नं विस्तार याना यंकेगु ग्वसाः दुगु महानगरं न्ह्यथंगु दु ।

प्रधानमन्त्री पुष्पकमल दाहाल ‘प्रचण्ड’ न शहीदपिनिगु म्हगस पूरा यायेत सकसिया ल्हाः मिलेयाना न्ह्या वनेमाः धका धयादीगु दु।

चुनौतीपूर्ण परिस्थितिइ गठन जूगु न्हगु सरकार सामाजिक न्याय, सुशासन व समृद्धिया आजुइ थ्यकेत न्ह्यावनेगु दृढ सङ्कल्पित उल्लेख यासे वयकलं शहीदपिनिगु म्हगसः पूरा यायेत इनाप याःगु दु ।

प्रधानमन्त्री दाहालं सङ्घीय लोकतान्त्रिक गणतन्त्रयात संस्थागत यायेत व न्हुगु संविधानयात कार्यान्वयनपाखे देश समृद्ध व समुन्नत दयकेत शहीदपिनिगु म्हगसः नाप योगदान न्ह्यावलय् प्रेरणादायी जुइ धका भलसा कयादीगु दु।

वयकलं धयादीगु दु, ‘तानाशाही व निरङ्कुश व्यवस्थाया विरूद्ध सङ्घर्ष यायेगु झ्वलय् तधःगु बलिदानी यानादीपि महान् शहीदपिनिगु बलिदानी वःगु दिंयात झीसं शहीद दिवसया रूपं लुमंका वयाच्वनागु खः, थौं दिं नेपाः व नेपाःमिपिनिगु आत्मसम्मान व स्वतन्त्रताया लागि थःगु जीवन बलिदान यायेत शहीदपिन्त विशेष सम्मान यायेगु दिं खः।’

राष्ट्रपति विद्यादेवी भण्डारीं शहीद दिवस, २०७९ या लसाताय् नागरिक स्वतन्त्रता, लोकतन्त्रया स्थापना व राष्ट्रियताया रक्षा यायेगु लागि थःगु अमूल्य जीवन उत्सर्ग यापि शहीदपि शुक्रराज शास्त्री, धर्मभक्त माथेमा, दशरथ चन्द, गङ्गालाल श्रेष्ठ लगायत सकल ज्ञात–अज्ञात शहीदपिन्त श्रद्धाञ्जली देछागु दु।

वयकलं शहीद दिवसया लसताय् थौं छगु सन्देश जारी यानादीसे शहीद दिवस देश व जनताया लागि प्राण आहुति बिइपि महान् शहीदपिन्त विशेष लुमन्ति जुइगु दिं खः धका उल्लेख यानादीगु खः।

नेपाःमिपिनिगु जनतायात स्वतन्त्र व सार्वभौमसत्ता सम्पन्न नागरिक दयकेगु इतिहासय् थीथी इलय् निरंकुश व तानाशाही शासन व्यवस्थाविरुद्ध जूगु आन्दोलनय् थःगु जीवन बलिदान याःपि वीरपिन्त हनेगु दिं कथं माघ १६ गते शहीद दिवस हना वयाच्वंगु खः।