लगातार न्यान्हु लिपा कुहावया च्वंगु शेयर बजाः थौं सोमवाः सामान्य थहावःगु दु। शेयर बजाः परिसूचक नेप्से थौं ५ दशमलव ८४ अङ्कं थहावना २ हजार १ सय ६ दशमलव १८ विन्दुइ थ्यःगु दु।

थौं जलविद्युत्, माइक्रोफाइनान्स व म्युचल फन्डबाहेक दक्को समूहया शेयर थहावःगु दु। नेप्से थहावःसा थौं कारोबार रकम धाःसा २ अर्ब रुपैयाँ स्वया क्वय् कुहावःगु दु।

२ सय ६२ गु कम्पनीया ५५ लाख ३१ हजार कित्ता शेयर १ अर्ब ८५ करोड रुपैयाँया कारोबार जूगु दु। दकलय् अप्पो शिवम् सिमेन्टया ८ करोड ८ लाख रुपैयाँया शेयर कारोवार जूगु दु।

सनराइज ब्लुचिप फन्डया शेयर ७ प्रतिशत स्वया अप्पो थहावःगु दु। समग्र बजाः थहावःसा थौं विन नेपाल लघुवित्त व ग्लोबल आईएमई बैंकया शेयर ४ प्रतिशत स्वया अप्पो कुहावःगु दु।

नेवाः न्ह्यलुवाः लिसें पुलांम्ह स्वास्थ्य राज्यमन्त्री तीर्थराम डंगोल म्हिगः आइतवाः यलया धापाख्यलय् च्वंगु सुमेरु अस्पताल भर्ना जुयादीगु दु ।

पोस्टेड ल्वचं पीडित जुयाःच्वनादीम्ह डंगोलया उसाँय् स्यनेवं अथे अस्पताल भर्ना जुयादीगु खः । वयकः छुं दिं न्ह्यः सुमेरु अस्पतालय् हे पोस्टेड ल्वय् या वासः याकादीगु खः।

डंगोलयात क्षयरोग जुइवं म्हय् थीथी कथंया समस्या वयेवं थथे अस्पताल भर्ना यायेमाःगु खँ वय्कःया छेँजःपिन्सं धाःगु दु ।

आः वयकःया स्वास्थ्यय् सुधार जुयावःगु धका चिकित्सकं धाःगु दु। 

न्हू पुचःया झिंछक्वःगु ज्यासना पुचःया न्हूधाः जूगु दु । न्हुगु ज्यासना पुचः सर्वसम्मत कथं ल्यःगु दु।

उगु ज्यासना पुचलं मनरत्न शाक्ययात सर्वसम्मत कथं नायः ल्यःगु दु। अथेहे न्वकू धर्मरत्न बज्राचार्य, छ्याञ्जे नविन रंजित, दांभरी विजयकुमार रंजित व ल्यू छ्याञ्जेय् रितु स्थापितयात ल्यःगु खः।

दुजलय् सूर्यमान डंगोल, भरतरत्न तुलाधर, मंगला महर्जन, कपिल कपाली, ललिता महर्जन व सुजन स्थापितयात ल्यःगु खः।

डेंगुया कारणं धरानय् च्याम्ह मनूत सीधुंकूगु दु। अथेहे आःतक २ हजार ३५३ म्ह डेंगु सक्रमण जूया च्वंगु दु ।

धरान उपमहानगरपालिकाया जनस्वास्थ्य अधिकृत उमेश मेहताया कथं ३ हजार ९८१ म्हेसिगु परीक्षण याःगुलि २ हजार ३५३ म्ह डेंगु संक्रमित खनेदूगु धका जानकारी ब्यूगु दु।

वयकःया कथं परीक्षण याःपिंमध्ये ५९ प्रतिशतय् डेंगु खनेदूगु खः । अथेहे, धरानया ११, १५, १७ व १८ नम्बर वडा अप्वः प्रभावित जूगु दु ।

बीपी कोइराला स्वास्थ्य विज्ञान प्रतिष्ठान धरानय् १५० म्हतक न्ह्यनेगु कथं डेंगुया ब्यागलं वार्ड संचालन याःगु दु । बीपीइ डेंगुया नितिं ब्यागलं क्लिनिक नं संचालन याःगु दु ।

छुं वाः न्ह्यः जक मदुम्ह कलाकार सारुक ताम्राकारया अबु बरिष्ठ कलाकार सानु ताम्राकार स्वास्थ्यय् समस्या वया नर्भिक अस्पताल भर्ना जुयादीगु दु ।

ताम्राकारया नर्भिक अस्पतालया आईसीयूलय् वासः याना वयाच्वंगु दु । चलचित्र कलकार संघया नायः मोहन निरौलाया कथं शनिवाः न्हिनय् कलाकार ताम्राकार अस्पताल भर्ना जुयादीगु खः ।