सत्ता गठबन्धनपाखे राष्ट्रिय स्वतन्त्र पार्टी रास्वपाया इन्दिरा राना मगरं उपसभामुखय् उम्मेदवारी दर्ता याःगु दु।

थौं सुथय् च्वंगु रास्वपा संसदीय दलया बैठकं रानायात उपसभामुखय् उम्मेदवार दकेगु निर्णय याःगु खः।

मगरयात उपसभामुखय् रास्वपाया सोविता गौतमं प्रस्ताव याःगु दु सा नेकपा एमालेया कृष्णगोपाल श्रेष्ठ, नेकपा माओवादी केन्द्रया नारायणी शर्मा व राप्रपाया राजेन्द्र लिङ्देन समर्थक जूगु खः।

नेपाली कांग्रेसं उपसभामुख पदय् मुक्ता कुमारी यादवयात उम्मेदवार दयकिइगु जुगु दु।

थौं शुक्रबाः सुथय् पार्टी सभापति शेरबहादुर देउवा निवास धुम्बाराहीइलय् च्वंगु पदाधीकारीपिनिगु प्रभावशाली नेतापिनिगु बैठकं सांसद मुक्ता कुमारी यादवयात उम्मेदवार दयकेगु निर्णय याःगु खः।

कांग्रेस केन्द्रीय सदस्यतक जुयादीम्ह यादव समानुपातिकपाखे सांसद जूम्ह खः।

राष्ट्रिय स्वतन्त्र पार्टी न इन्दिरा राना मगरयात प्रतिनिधिसभाया उपसभामुखय् उम्मेदवार दयकिइगु जुगु दु।

नकतिनि क्वचाःगु रास्वपा संसदीय दलया बैठकं मगरयात न्ह्यने यकेगु निर्णय याःगु दु। झापाया मगर समानुपातिक सांसद खः।

थ्व स्वया न्ह्यः सोविता गौतमया नां न्ह्यने वयाच्वंगु खः। न्ह्यगु दलीय गठबन्धनया भागबन्डाय् रास्वपायात उपसभामुख बिइगु समझदारी जुइ धुकुगु खः।

प्रधानमन्त्री पुष्पकमल दाहाल प्रचण्डं थःगु म्हगःया सकतां अंग दान यायेगु घोषणा याःगु दु ।

थौं शुक्रवाः सुथय् प्रज्ञाभवन कमलादीइ जुगु छगु ज्याझ्वः शहीद धर्मभक्त माथेमा राष्ट्रिय प्रत्यारोपण केन्द्रं द्वःछिगू जलास्यँ (मिर्गौंला) प्रत्यारोपण क्वचायेकूगु लसताय् ग्वसाः ग्वःगु विशेष ज्याझ्वःलय् अथे घोषणा यानादीगु खः।

वयकलं सम्बोधन यायेगु झ्वलय् धयादीगु दु, ‘जि सीधुंकाः सकतां म्हगः दान यायेगु घोषणा यानाच्वना ।’ प्रधानमन्त्री प्रचण्डं धाःगु दु, ‘डायलासिस सेवा सर्वसाधारणया पहुँचय् मदु ।

थ्व थिके जूगुलिं नं आर्थिक अवस्था कमजोर जूपिं जलास्यँ ल्वगीपिन्सं सेवा कायेत थाकूगु खः । केन्द्रं विपन्न ल्वगिपिन्त ग्वाहालि जुइमाः धैगु आज्जुं २०६९ चैत्र १६ गतेनिसें निःशुल्क डायलासिस सेवा नं न्ह्याकल ।

केन्द्रय् जलास्यँ जक मजूसे कलेजो नं प्रत्यारोपण यायेगु जुयाच्वंगु दु । थुकियात थप आधुनिक व प्रभावकारी यायेगु झीगु जिम्मेवारी दु ।’

आत्मनिर्भर लघुवित्त वित्तीय संस्था लिमिटेडया धितोपत्र प्रारम्भिक सार्वजनिक निष्काशन (आईपीओ) जारी यायगु जुगु दु।

कम्पनीया सर्वसाधारण लगानीकर्ता नाप वैदेशिक रोजगारी यानाच्वंपि नेपाःमिपिनिगु लागि आईपीओ निष्काशन याइगु जुगु दु। लघुवित्तं थःगु जारी पूँजी ६ करोड २३ लाख ३८ हजार रुपैयाँया ३२.६२५ प्रतिशत जुइगु कथं २ करोड ३ लाख ३८ हजार रुपैयाँ बराबरया प्रतिशेयर १०० रुपैयाँ अंकित भाःया २ लाख ३ हजार ३८० कित्ता सेयर निष्काशन याइगु जुगु दु।

उकि मध्ये २० हजार ३३८ कित्ता शेयर वैदेशिक रोजगारीइ च्वनाच्वपि नेपाःमिपिन्त निष्काशन यायेत्यःगु दु। अथेहे ३ हजार ११७ कित्ता सेयर कर्मचारीपिन्त व १० हजार १७० कित्ता सामूहिक लगानी कोषया लागि सुरक्षित याःगु दु। ल्यःदनिइगु १ लाख ६९ हजार ७५५ कित्ता सेयरया लागि आवेदन बिइ फइगु जुगु दु । वैदेशिक रोजगारी यानाच्वपि नेपाःपिनिगु लागि माघ १६ गतेनिसे फागुन १ गतेतक व सर्वसाधारणया लागि फागुन ११ गतेनिसे १५ तक आईपीओ निष्काशन यायेगु कम्पनीया आह्वानपत्रय् उल्लेख याःगु दु ।

सर्वसाधारणपिन्स १५ फागुन तक माग कथं आवेदन मवसा आवेदन बिइत फागुन २५ गते तक थप याइगु जुगु दु। उगु आईपीओ लगानीकर्तापिन्स म्हो १० कित्तानिसे अप्पो १ हजार कित्तातक आवेदन बिइ फइ। कम्पनीया सेयर निष्काशन नाप बिक्री प्रबन्धक सनराइज लिमिटेड याइगु जुगु दु। वंगु आर्थिक वर्ष २०७८÷७९ या अपरिस्कृत वित्तीय विरण कथं लघुवित्तया प्रतिसेयर नेटवर्थ ५५६ रुपैयाँ ५९ पैसा व प्रतिसेयर आम्दानी १८५ रुपैयाँ ४३ पैसा दु।

लघुवित्तया सञ्चित नाफा १२ करोड ५४ लाख ९० हजार रुपैयाँ दु।