मन्त्रिपरिषदं काभ्रेया बनेपाय् अत्याधुनिक फिल्म छायांकन स्टुडियो निर्माणया लागि साढे २ हेक्टर वन क्षेत्रया जग्गा छ्यलेत स्वीकृति बिइगु निर्णय याःगु दु।

वंगु मंगलवाः च्वंगु मन्त्रिपरिषदया बैठकं उगु निर्णय जूगु दु धका सञ्चार लिसे सूचना प्रविधि मन्त्रालयं धाःगु दु।

बनेपा नगरपालिकाया वडा नम्बर १० व १३ य् च्वंगु बाहुनडाँडा सामुदायिक वनया उगु थासय् च्वंगु जग्गा छ्यलेत स्वीकृति बिइगु निर्णय सरकारं याःगु दु ।

आर्थिक २०८०–०८१ या बजेटं बनेपाय् अत्याधुनिक फिल्म छायांकन स्टुडियो निर्माण यायेगु योजना समावेश याःगु खः।

सरकारं सहकारी क्षेत्र सुधार सुझाव कार्यदलया म्याद लच्छि थप याःगु दु।

असार २६ गते निसे लागु जुइगु कथं लच्छिया निति कार्यदलया म्याद थप जूगु दु धका सरकारया प्रवक्ता लिसे सञ्चार नाप सूचना प्रविधि मन्त्री रेखा शर्मां जानकारी बिःगु दु।

असार २६ गते कार्यदलया संयोजक जयकान्त राउतं प्रधानमन्त्री पुष्पकमल दाहाल प्रचण्डयात प्रारम्भिक प्रतिवेदन लःल्हाना लच्छिया निति म्याद थपे यायेत माग याःगु खः।

उगु आधारय् असार २६ गते च्वंगु मन्त्रिपरिषदया बैंठकं कार्यदलया म्याद लच्छिया निति थपे यायेगु निर्णय याःगु खः।

कार्यदलं प्रारमिभक प्रतिवेदन लःल्हासे सहकारी क्षेत्र सुधारया लागि तत्काल यायेमाःगु २७ बुँदे सुझाव पेश याःगु खः।

नेपालभाषा आन्दोलनया न्ह्यलुवा नाप जनकवि दुर्गालाल श्रेष्ठ थौं बिहिवाः गुइदँ क्यंगु दु ।

नेपालभाषा मंकाः खलःया नायः जनकवि दुर्गालाल श्रेष्ठया बुदिं नेवाः परम्परा कथं ख्येँ सगं कया थःगु छेँ भुइजःसिइ हंगु दु।

बुदिं हना च्वंगु किपाः थौं सामाजिक संजालपाखे जानकारी बिःगु खः।

जहान मदुगु शोकय् लानाच्वम्ह प्रधानमन्त्री पुष्पकमल दाहाल प्रचण्डया औपचारिक ज्याझ्वः स्वन्हुया लागि स्थगित याःगु दु।

म्हिगः बुधवाः जहान सीता मदुगुलि शोकय् लानाच्वम्ह प्रधानमन्त्री प्रचण्ड असार ३० गते तक छु न औपचारिक गतिविधिइ सहभागी मजुइगु जूगु दु।

‘स्वन्हु तक दक्को औपचारिक ज्याझ्वः स्थगित याःगु दु’ धका प्रधानमन्त्रीया प्रेस सल्लाहकार गोविन्द आचार्यं धाःगु दु।

वयकःया कथं, बिचा हाय्केगु निति सुथय् ८ निसे ११ व बहनि ४ निसे ६ बजे तक ई बियातःगु दु।

हुम्लाया कालिका जःखः केन्द्रबिन्दु जूया भुखाय् ब्बःगु दु।

राष्ट्रिय भूकम्पमापन नाप अनुसन्धान केन्द्र लैनचौरया कथं थौं सुथय् ११ बजे जूया १७ मिनेटय् हुम्लाया कालिका जःखः केन्द्रबिन्दु जूया ४.६ म्याग्निच्यूडया भुखाय् ब्बःगु दु।