लुम्बिनी प्रदेशया नवनियुक्त मुख्यमन्त्री लीला गिरीं थौं विश्वासया मत काःगु दु।

थौं बिहीबाः न्हिनय् च्वंगु प्रदेशसभाया न्हापागुं  अधिवेशनया प्यक्वःगु बैठकय् मुख्यमन्त्री गिरीं न्ह्यगु दलया विश्वास याःगु मत काःगु खः।

मुख्यमन्त्री गिरीं नेकपा एमाले नाप माओवादी केन्द्र, राष्ट्रिय प्रजातन्त्र पार्टी, नागरिक उन्मुक्ति पार्टी, जसपा, जनमत पार्टी, लोकतान्त्रिक समाजवादी पार्टी व स्वतन्त्रयाना ५७ मत काःगु खः।

गिरींया विपक्ष् २८ मत काःगु खः। नेपाली कांग्रेस व जनमोर्चा न गिरीयात विश्वासया मबिउगु खः। मुख्यमन्त्री गिरी पुस २७ गते ५६ म्ह व निम्ह स्वतन्त्र याना ५८ म्ह सांसदपिनिगु समर्थनय् मुख्यमन्त्री नियुक्त जूगु खः।

लुम्बिनी प्रदेशय् ८७ म्ह सांसदपि दु।

सभामुखय् नेकपा एमालेया देवराज घिमिरे निर्वाचित जूगु दु।

प्रतिनिधिसभाय् थौं बिहीबाः एमालेया घिमिरेयात सभामुखय् निर्वाचित यायेत तःगु प्रस्तावय् पक्षय् १६७ व विपक्षय् १०० मत वंगु खः।

प्रतिनिधिसभाया २७५ मध्ये २६८ म्ह मतदानय् सहभागी जूगु खः। छम्ह जक सांसद तटस्थ च्वंगु खः। घिमिरेयात सभामुख दयकेगु निति पक्षय् नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, जनमत पार्टी, नागरिक उन्मुक्ति पार्टी व स्वतन्त्र सांसदपि अमरेशकुमार सिंह, प्रभु साह व योगेन्द्र मण्डलं मतदान याःगु खः।

सभामुखय् नेपाली कांग्रेसया ईश्वरी न्यौपाने न उम्मेदवारी बिःगु खः। तर न्हापा हे घिमिरेया उम्मेदवारीय् मतदान जुगुलि बहुमत वयेवं ईश्वरीया उम्मेदवारीइ छलफल हे मजुगु खः। वयकःयात नेपाली कांग्रेस, एकीकृत समाजवादी, लोकतान्त्रिक समाजवादी व राष्ट्रिय जनमोर्चां समर्थन याःगु खः। घिमिरे झापा–२ पाखे सांसदय् निर्वाचित जूगु खः।

नेपाल मजदुर किसान पार्टी न थःपिन्त प्रमुख प्रतिपक्षी दल घोषणा यायेमाःगु माग याःगु दु।

प्रतिनिधि सभाया बिहीबाः च्वंगु बैठकय् विशेष ई कया न्ववासे नेमकिपाया सांसद प्रेम सुवालं पुस २६ गते प्रधानमन्त्रीयात विश्वासया मबियागुलि थःगु दलयात  प्रमुख प्रतिपक्षी दल घोषणा यायेमाःगु माग याःगु खः।

सुवालं धाःगु दु, कानुनी व्यवस्था कथं प्रमुख प्रतिपक्षी पार्टी नेमकिपा खः ।’ संघीय कानुन कथं विपक्षी दल क्वछिना जक संसद न्ह्याकेमाःगु वयकलं माग याः गु खः।

श्रीशान्तिघट बज्रधातु चैत्य महाविहार श्रीघलय् विराजमान जुयाच्वना बिज्याम्ह आराध्य देवी हारती अजिमाया देगःया पुनः निर्माण ज्या क्वचाःगु दु ।

दच्छि न्ह्यः २०७८ माघ ३ गतेनिसे निर्माण ज्या न्ह्याकुगु थुगु देगः दच्छिलिपा माघ ३ गते हे निर्माण क्वचायेका पलिस्था पुजा यायेखंगु धइगु लसताया खँ खः धका श्रीशान्तिघट बज्रधातु चैत्य महाविहार संरक्षण समितिया नायः व हारती अजिमा देगः पुनःनिर्माण उपभोक्ता समितिया संयोजक शुभकाजी शाक्यं धयादिगु दु।

अथेहे अजिमा देगः पुनःनिर्माण उपभोक्ता समितिया मेम्ह संयोजक पुरन शाक्यं येँ महानगरपालिकाया तत्कालिन मेयर विद्या सुन्दर शाक्यं देगः पुनःनिर्माणया निंतिं आर्थिक ग्वाहालि यानादीगु खँ कनादिल ।

येँ महानगरपालिकाया उपमेयर सुनिता डंगोल मूपाहाँ कथं झायादीगु उगु ज्याझ्वलय् श्रीशान्तिघट बज्रधातु चैत्य महाविहार श्रीघःया थकालि आजु कर्ण शाक्यया सभाध्यक्षताय् जुगु खः । मूपाहाँ उपमेयर डंगोलं बोधिमतय् मत च्याका उलेज्या यानादीगु उगु ज्याझ्वलय् देगः पुनःनिर्माण क्वचाःगु लसताय् पिहावःगु लुमन्ति पौ या नं पितब्वज्या जुगु खःसा ज्या तालाकेत ग्वाहालि याःपिन्त सम्मान नं याःगु खः ।

यँे वडा नं २५ या पुलांम्ह वडा अध्यक्ष नीलकाजी शाक्यया नं विशेष उपस्थिति दुउगु खः । 

नारायणगढ–मुग्लिन सतक थौंनिसे लच्छितक ज्या जुइगुलि बन्द यायेत्यःगु दु। वंगु पुस ५ गतेनिसे ३० तक सुथय् ११ बजेनिसे न्हिनय् ३ बजेतक सतक ज्या यानाच्वंगु खः।

थौंनिसे न्हिनसिया १२ बजेनिसे ४ बजेतक थप ३० दिं सतक बन्द यायेत्यःगु दु। चितवनया प्रमुख जिल्ला अधिकारी अश्मान तामाङं गाडी रोकेमयासे पखालय् जाली तयेफइ मखुलि मेगु लच्छि बन्द यायेमाःगु धका धाःगु दु।