सभामुख देवराज घिमिरें थौं शपथ काःगु दु। राष्ट्रपति भवन शितल निवासय् छगु ज्याझ्वः दथुइ राष्ट्रपतिं वयकःयात शपथ याकूगु खः।

उगु शपथग्रहण ज्याझ्वलय् उपराष्ट्रपति नन्दबहादुर पुन, प्रधानमन्त्री पुष्पकमल दाहाल, राष्ट्रिय सभाया अध्यक्ष गणेशप्रसाद तिमिल्सिना, कार्वबाहक प्रधानन्यायाधीस हरिकृष्ण कार्की नाप उच्च पदस्थपिनिगु उपस्थिति दुगु खः।

नेकपा एमालेया घिमिरे सभामुख म्हिगः ल्यःगु खः। शपथ याये न्ह्य वयकलं पार्टीपाखे अलग्ग जुयागु घोषणा याःगु खः।

उपसभामुखया लागि निर्वाचन कार्यतालिका सार्वजनिक याःगु दु।

संघीय संसद सचिवालयं उपसभामुखया कार्यतालिका सार्वजनिक याःगु दु । कार्यतालिका कथं थौं माघ ६ गते शुक्रबाः न्हिनय् १ बजेनिसे ४ बजेतक उपसभामुख निर्वाचित यायेगु धका प्रस्ताव दर्ता निति कार्यतालिकाय् दु।

संघीय संसद भवन अन्तराष्ट्रिय सम्मेलन केन्द्र ल्होत्से हलय् दर्ता याकेत्यःगु खः। थौं शुक्रबाः ४ः१५ बजे उम्मेदवारया सूची प्रकाशन जुइगु धका प्रतिनिधि सभाया सचिव गोपालनाथ योगीं जानकारी बिःगु दु ।

वयकःया कथं माघ ७ गते शनिबाः न्हिनसिया १ बजे प्रतिनिधि सभाया बैठकं उपसभामुखया निर्वाचन याइगु जुगु दु।

येँ महानगरपालिकाया मेयर बालेन साह विरुद्ध जग्गाधनीया छेँजःपिनिपाखें थौं प्रदर्शन याइगु जूगु दु ।

वंगु पुस २८ गते येँया ३१ वडास्थित शंखमुलय् लँ तब्या यायेगु नामय् निजी जग्गाय् डोजर चले यानाः कब्जाया कुतः याःगुलिं अथे प्रदर्शन यायेत्यःगु खः। थौं सुथय् १०ः३० बजेनिसें थनया राष्ट्रिय सभागृह न्ह्यःने उगु प्रदर्शन यायेत्यंगु खः ।

राष्ट्रिय सभागृहय् थौंकन्हय् येँ मनपाया बोर्ड बैठक न्ह्यानाच्वंगु जूगुलिं बैठकय् ब्वति काः वःपिं मेयर, उपमेयर लिसें वडा अध्यक्षतय्त क्यने कथं थ्व प्रदर्शन यायेत्यंगु खँ धाःगु दु ।

वंगु पुस २८ गते शंखमुलय् च्वंगु वय्कःया जग्गा कब्जा यानाः लँ तब्या यायेगु कुतः जूगु व उकी मनपां वय्कःयात छुं कथंया पौ तकं मबिउगु खः । वय्कलं थःगु जग्गा कायेगु लागिं मनपां छुं निर्णय याःगु दुसा पत्र माल धकाः थःपिं हे वनाः पौ काः वंगु इलय् नं मनपां पत्र मबिउगु खँ धाःगु दु ।

अथेहे नेवाः देय् दबू येँ महानगर कमिटीं थौं जुइगु विरोध प्रदर्शन ज्याझ्वःयात समर्थन याःगु दु । मनपां येँया स्थानीय जनताया जग्गा कब्जा यानाः दुःख बीगु ज्या याःगुलि उकिया विरोध यायेमाः धासें देय् दबूया येँ महानगर कमिटीं थौंया ज्याझ्वलय् सक्रिय रुपं ब्वति कायेगु निर्णय याःगु खः ।

थौंया ज्याझ्वलय् थः दुजःपिंत ल्हातय् हाकुगु कापः चिनाः ब्वति कायेगु लागिं नं देय् दबुलिं इनाप याःगु दु ।

केन्द्रीय मानन्धर संघं थःगु ७०क्वःगु स्थापना दिवस हंगु दु ।

न्यूरोडस्थित पाक्व पुखुद्यां मानन्धर सनाः खलःया गुथि छेँय् संघका संस्थापक देवीदास मानन्धरउात लुमंकुसें स्थापना दिवसया ज्याझ्वः याःगु खः ।

ज्याझ्वलय् प्रबुद्ध व्यक्तिया रूपं संघं सम्मान ब्यूपिंमध्ये दक्षिण एशियाली खेलकुद अन्तर्गतया ब्वाज्या कासाय् नेपालया लुँया पदक ब्यूम्ह बैकुण्ठ मानन्धर, ललितकला क्याम्पसया पूर्व कुलपति किरण मानन्धर, बौद्ध धर्मया अध्येता ई. गुहेश्वरी राज मानन्धर, शिक्षासेवी वसन्त कुमार मानन्धर, समाजसेवी पञ्चकुमारी मानन्धरलिसें पुलांगु कार्यसमितिया पदाधिकारी व दुजःपिनि ब्वति दुगु खः ।

केन्द्रीय मानन्धर संघया सभापति वीरगन्ज पर्साैनीयाम्ह मनोज कुमार मानन्धरया सभापतित्वय् जूगु ज्याझ्वलय् उपसभापति बद्रीनारायण मानन्धरं थःगु लसकुस न्वचुया झ्वलय् २०७९ माघ २४ व २५ गते जुइत्यंगु ईहि मुना ज्याझ्वलय् इहि याय्मानिपिं मिसामचातय्त सहभागी याकेत इनाप यानादिल ।

बाँकेया नेपालगञ्जय् जुइत्यःगु ‘प्यक्वःगु प्रादेशिक औद्यौगीक, लघु घरेलु नाप कृषि, प्रविधि व्यापार व पर्यटन महोत्सव २०७९’ या तयारी यायेगु लागि सम्र्पक सचिवालय स्थापना याःगु दु।

महोत्सवया जुयाच्वंगुलि नेपालगञ्ज उपमहानगरपालिका वडा नं. १८ या कारकादो नाप सचिवालय स्थापना याःगु दु। सचिवालय कारकादोय् माछापुच्छे्र बैंकया पारीपट्टी सचिवालय तःगुलि नेपाल घरेलु तथा साना उद्योग महासंघ बाँकेया महासचिव जिआर भुसालं जानकारी बिःगु दु।

नेपाल घरेलु तथा साना उद्योग महासंघ बाँकेया ग्वसालय् व सिवालय सेक्युरिटी एण्ड मल्टी प्रपोज कम्पनी प्रा.लि.या ग्वाहालि थ्व हे माघ १० गते निसे २४ गते तक नेपालगञ्ज उपमहानगरपालिका वडा नं. १८ य् सडक डिभिजन कार्यालय कारकादोय् ‘प्यक्वःगु प्रादेशिक औद्यौगीक, लघु घरेलु तथा कृषि, प्रविधि व्यापार नाप पर्यटन महोत्सव २०७९’ जुइत्यःगु खः।