येँ महानगरपालिकाया नीति कार्यक्रम व बजेट सर्वसम्मतं पास जूगु दु। महानगरपालिकाया मेयर बालेन्द्र साह (बालेन) न नगर सभा वैठकय् निर्णयार्थ पेश यागुलि बजेट व नीति कार्यक्रम संशोधन यासे पास याःगु दु।

महानगरया १३ क्वःगु नगर सभाया न्हापागु बैठक असार ६ गते च्वःगु खः।असार १० गते नगर सभा बैठकय् उपप्रमुख सुनिता डंगोलं, आर्थिक वर्ष २०८०÷०८१ या लागि बजेट व विनियोजन विधेयक पेश याःगु खः।

महानगरपालिकां २५ अर्ब ५४ करोड ७८ लाख २० हजार रुपैयाँया बजेट हःगु खः। उकि मध्ये चालुपाखे ८ अर्ब ६१ करोड ५३ लाख २८ हजार रुपैयाँ व पुँजीगतपाख १६ अर्ब ९३ करोड २४ लाख ९२ हजार रुपैयाँ विनियोजन याःगु खः।

असार २१ गते बजेट पास यायेत सःतूगु वैठकय् नेपाली काँग्रेसपाखे निर्वाचित जनप्रतिनिधिपि नाप माक्वः सहलह मजूगु धासे ले पर्याप्त छलफल व यकति कथं बजेट विनियोजन याःगु धासे विरोध यायेवं २६ गते तक या लागि स्थगित याःगु खः।

बजेटय् वडाध्यक्ष व नगर सभा सदस्यपिन्स तःगु संशोधन यासे पारित याःगु खः।

बुद्ध एयर झापाया चन्द्रगढी ब्बयेमाःगु जहाज प्राविधिक समस्याया कारण त्रिभुवन अन्तर्राष्ट्रिय विमानस्थलय् हे लिहावया अवतरण याःगु दु।

त्रिभुवन विमानस्थल कार्यालयया कथं बुद्धया ९५५ उडान नम्बरया जहाज इण्डिकेसनय् समस्या वयेवं हे येँ लिहावःगु खः।

अमेरिकी सहायक विदशेमन्त्री डोनाल्ड लू येँ थ्यकं वःगु दु । विदेश मन्त्रालयया मध्य नाप दक्षिण एसिया सम्बन्धी मामला स्वइम्ह लू दक्षिण एसियाली देशय् भ्रमण यायेगु झ्वलय् थौं येँ थ्यकंवःगु खः।

थौं हे परराष्ट्रमन्त्री एनपी साउद नापलायेगु ज्याझ्वः दु। वया लिपा अमेरिकन चेम्बर अफ कमर्सया छगू दुजः संस्था नापलायेगु ज्याझ्वः दु।

लक्ष्मी बैंक व सनराइज बैंक मर्जर लिपा थौं (असार २९ गते) निसे एकीकृत करोबार सुरु याःगु दु। मर्जर लिपा लक्ष्मी सनराइज बैंक लिमिटेडया नामय् एकीकृत कारोबार सुरु जूगु खः।

थुगु निगु बैंक १ः१ स्वाप रेसियोय् मर्जर जूगु खः। मर्जरय् वनेगु सहमति असार ३ गते स्वीकृत जूगु खः। थौं निसे एकीकृत कारोबार यायेत निगुलि बैंकं थःथःगु शाखाया कार्यालय असार २७ व २८ गते निन्हुया लागि बन्द याःगु खः।

मर्जरलिपा लक्ष्मी सनराइज बैंकया केन्द्रीय कार्यालय आः लक्ष्मी बैंक दुगु भवनय् च्वनिइगु दु। प्रमुख कार्यकारी अधिकृत (सीईओ) धाःसा अजय विक्रम शाह जूगु दु।

शाह न्हापा लक्ष्मी बैंकया सीईओ न खः।

चितवनया दासढुङ्गाय् बस दुर्घटना जूया २६ म्ह यात्रुपि घाःपाः जूगु दु। उकि मध्ये १७ म्हेसित मेडिकल कलेज व च्याम्हेसित भरतपुर अस्पताल चितवनय् उपचार यानाच्वंगु दु।

नारायणगढ–मुग्लिन सतक खण्ड अन्तर्गत चितवनया भरतपुर महानगरपालिका वडा नम्बर–२९ दासढुङ्गामा थौं सुथय् ५ः१५ बजेति बस दुर्घटना जूगु खः।

जिल्ला ट्राफिक प्रहरी कार्यालय चितवनया कथं झापाया काँकडभिट्टां येँ वयाच्वंगु बाग्मती प्रदेश ०१–००६ ख ५२३७ नम्बरया बस अनियन्त्रित जूया दुर्घटना जूगु खः। बस सतकं कुतुवना सिमाय् थाःगु खः ।

बस सिमाय् थानां त्रिशूली खुसिइ कुतुवनेगु पाखे बचे जूगु दु धका ट्राफिक प्रहरीं धाःगु दु।