नेवाः पत्रकार राष्ट्रिय दबू काभ्रे कचाः न प्यक्वःगु महाधिबेसनपाखे निर्वाचित जूपि न्हुगु ज्यासना पुचःयात भिंतुना देछायेगु ज्याः जुगु दु।

काभ्रे बहुमुखी क्याम्पसय् छगु ज्याझ्वः दथुइ न्हुगु ज्यासना पुचःयात भिंतुना देछागु खः। उगु ज्याझ्वःया मूपाहाँ काभ्रे बहुमुखी क्याम्पसया अध्यक्ष लामेदर कायस्थं न्हुगु ज्यासना पुचःयात हनापौं काभ्रे कचाःया नायः सोमकाजी शाक्यं स्वामां क्वखायेका हने ज्या याःगु खः।

ज्याझ्वलय् दबूया केन्दिय नायः नृपेन्द्रलाल श्रेष्ठं पत्रकार दबूया न्हापागु पुर्ण बैठकं दबूया कार्य योजना कनादीगु खः। धर्मादित्य धर्माचार्यं पत्रकारिता शुरु याःगु ने स १०४५ बुद्ध धर्मयात कया मातृभाष शताब्दी दिवस हनेगु जुइ धका धयादीगु खः।

राष्ट्रपति विद्यादेवी भण्डारीं अर्थतन्त्रयात सुदृढीकरण यायेगु निति गम्भीर पलाः न्ह्याकेमाः धका धयदीगु दु।

शुक्रबाः संघीय संसदय् मंकाः बैठकय् सम्बोधन यानादीसे राष्ट्रपति भण्डारीं आर्थिक अवस्था जटिल मोडय् अर्थतन्त्रया सूचक सुधारया संकेत खनेदुसा थकिइ दिगोपनाय् आस्वस्त जुइ फुगु अवस्था मदु धका धयादीगु दु।

मौद्रिक तरलताया समस्या, लगानीउा लागि माःगु स्रोतया अभाव व बाह्य कारणया तक उत्पादन क्षेत्र मजबुत जुइ फुगु मदु धका धयादीगु खः।

अर्थतन्त्रय् गुलि न समस्या थहाः क्वहाः जूगु विश्व अर्थतन्त्र, कोभिड महामारीया कारणपाखे वःगु खः धका धयादीसे राष्ट्रपति भण्डारीं न्ह्यने धयादीगु दु, ‘अय्न थुगु कारण क्यना लिचिलेगु सुविधा झीकेमदु।’

वयकलं अर्थतन्त्रय् प्रभाव याइगु आन्तरिक बाह्य कारणया समग्र अध्ययन याना सरकारया वृत्त नीतिइ संरचनागत सुधार यायेमाः धका धयादीगु खः।

कर्णाली प्रदेश सरकार ‘जनयुद्ध दिवस’या सरकारी बिदा बिइ धुका आः बाग्मती सरकारं न बिदा बिइगु निर्णय याःगु दु।

बाग्मती प्रदेश सरकारं माघ २४ गते च्वंगु मन्त्रिपरिषद बैठकया निर्णय कथं फागुन १ गते जनयुद्ध दिवसया लसताय् बिदा बिइगु निर्णय याःगु खः।

बाग्मती प्रदेश, आन्तरिक मामिला नाप कानुन मन्त्रालयया प्रवक्ता अनुशिल सापकोटां जारी याःगु सुचं कथं, ‘जनयुद्ध दिवसया लसताय् सम्बत २०७९ फागुन १ गते सोमवारया दिं बाग्मती प्रदेशयकं सार्वजनिक बिदा बिइगु निर्णय जुगुलि सबन्धित सकसित जानकारीया लागि थुगु सुचं प्रकाशित यानागु दु।’ 

राष्ट्रपति विद्यादेवी भण्डारीं थौं सङ्घीय संसदया मंकाः बैठकयात सम्बोधन याइगु जुगु दु।

थौं न्हिनय् ३ बजे सङ्घीय संसद् भवन न्हुगु बानेश्वरय् राष्ट्रपतिपाखे सम्बोधन याइगु ज्याझ्वः दु। राष्ट्रपतिं याइगु सम्बोधनयात प्रधानमन्त्री पुष्पकमल दाहाल प्रचण्डं प्रतिनिधि सभा व राष्ट्रिय सभाय् बिस्क बिस्क टेबल याइ।

वया लिपा निगुलि सदनं धन्यवादया प्रस्ताव पारित याइगु सङ्घीय संसद् सचिवालयया सहायक प्रवक्ता दशरथ धमलां जानकारी बिःगु दु।

नेपाःया संविधान धारा ९५ कथं थौं राष्ट्रपति भण्डारीं सङ्घीय संसद निगुलि सदनया मंकाः बैठकयात सम्बोधन यायेत्यःगु खः।

येँ महानगरपालिकाया निर्वतमान मेयर विद्यासुन्दर शाक्यं थः मेयर जूयागु इलय् यानागु आधुनिक लँय् मत जडान यायेगु सहमतिइ कार्यान्वयन यायेत्यःगुलि मेयर बालेन्द्र शाहयात सुभाय् बिःगु दु।

शाक्यं थौं विहीबाः लहनान्युजयात नाप खँल्हानादीसे पुलागु सहमतियात महानगरपालिकां मू मू थासय् च्वंगु लँय् मत तयेगु ज्या यायेत्यःगुलि सुभाय् देछानादीगु खः । ‘येँ च्वंगु लँय् झः झः धायेकेगु निति स्वदँ न्ह्यःया सहमति कार्यान्वयन यायेत्यःगुलि थः लय्ताःगु दु धका धयादीसे मेयर शाहयात सुभाय् दु।’ शाक्यं धयादीगु दु।

महानगरपालिकां मू मू थासय् च्वंगु लँय् मत तयेगु निति महानगरपालिका, नेपाल विद्युत प्राधिकरण व सडक विभाग दथुइ वंगु २०७७ मंसिर २५ गते विहीबाः सहमति जूगु खः। सहमति कथं ज्या यायेगु निति मंगलबाः स्वगू हे निकाय दथुइ सम्झौता यानागु खँ धका महानगरपालिकां धाःगु खः।

सम्झौताय् लँय् मत तयेगु निति ११ करोड ९९ लाख ७४ हजार ९ सय २५ रुपैयाँ लागत अनुमान याःगु खः। थ्व स्वया न्ह्यः तत्कालीन भौतिक पूर्वाधार नाप यातायातमन्त्री वसन्तकुमार नेम्वाङ्ग व तत्कालीन मेयर शाक्यया उपस्थितिइ तत्कालीन प्रमुख प्रशासकीय अधिकृत राजेश्वर ज्ञवाली, तत्कालीन प्राधिकरणका का.मु कार्यकारी निर्देशक हितेन्द्रदेव शाक्य, तत्कालीन विभागया महानिर्देशक केशवकुमार शर्मा दथुइ उगु सहमति जूगु खः।

महानगरपालिकां ६० प्रतिशत व प्राधिकरणं ४० प्रतिशत लगानीइ लँय् मत तयेगु सहमतिपत्रय् उल्लेख यानातःगु दु। प्राधिकरणं ४० प्रतिशत बिइगु ध्यवा न महानगरपालिकां बिइगु व उगु रकमय प्राधिकरणं याइगु लगानी न समायोजन यायेगु सहमति जूगु खः। सहमतिइ धयातःगु दु,‘उगु ज्याया लागि लागत अनुमान तयार यायेगु, प्रविधिया छनौट यायेगु व निर्माण यायेगु ज्या सुपरीवेक्षण यायेगु लगायतया ज्या प्राधिकरणं यायेगु व आयोजनाया निर्माण ज्या लिपा भिंकेमाःगु लँ व फुटपाथ लगायतया ज्या विभागं याइ।’

लँय् मत तयेगु, सञ्चालन विषय समन्वय, अनुगमन नाप रिपोटिंग यायेत स्वंगू हे कार्यालयया प्रतिनिधि दुथ्याका आःयागु संयन्त्रयात निरन्तरता बिइ, उगु संयन्त्रं लँ सम्भाव्य विस्तार थाय् म्हसिका अध्ययन याना ४५ दिं दुने प्रतिवेदन पेश यायेगु सहमतिपत्र धयातःगु दु।