पाल्पा क्षेत्र नं.१ (१) पाखे प्रदेशसभा सदस्यय् नेकपा एमालेया उम्मेदवार राजुप्रसाद श्रेष्ठ निर्वाचित जूगु दु।

श्रेष्ठं १७ हजार ६४२ मत हया निर्वाचित जूगु खःसा वयकःया प्रतिस्पर्धी नेपाली कांग्रेसया श्यामकान्त खनालं १२ हजार २ सय ५२ मत हःगु खः।

अथेहे राप्रपाया डुल बहादुर गाहा न ४३१ व नेशनल मंगोलया पूर्ण बहादुर रुचालं २६० मत हःगु दु धका निर्वाचन अधिकृतया कार्यालयं धाःगु दु।

सोलुखुम्बुया प्रदेश सभा निर्वाचन क्षेत्र–१ य् नेकपा एमालेया वुद्धिकुमार राजभण्डारी निर्वाचित जूगु दु।

नेकपा माओवादी केन्द्रया उम्मेदवार शिव बहादुर बस्नेतयात पराजितयासे राजभण्डारी निर्वाचित जूगु खः ।

राजभण्डारीं १० हजार १२८ व बस्नेतं ६ हजार ८ सय १५ मत हःगु खः।

प्युठानया प्रतिनिधिसभा सदस्यय् नेकपा एमालेया उम्मेदवार सूर्य थापा निर्वाचित जूगु दु।

थापां निकतम प्रतिस्पर्धी सत्ता गठबन्धनकया समर्थन दुम्ह राष्ट्रिय जनमोर्चाया उम्मेदवार दुर्गा पौडेलयात ५ हजार २७४ मतं बूकुगु खः।

थापां ४१ हजार ११८ मत हःगु खःसा पौडेलं ३५ हजार ८४४ मत हःगु खः। थापा नेकपा एमालेया पोलिटब्यूरो सदस्य व प्युठानया इन्चार्ज खःसा पौडेल राष्ट्रिय जनमोर्चाया उपाध्यक्ष खः।

कञ्चनपुर निर्वाचन–२ य् नेपाली कांग्रेसया उम्मेदवार एनपी साउद प्रतिनिधिसभा सदस्यय् निर्वाचित जूगु दु।

निर्वाचन अधिकृतया कार्यालयं याःगु सार्वजनिक कथं साउदं २८ हजार १०० मत हःगु खःसा निकटतम प्रतिस्पर्धी नेकपा एमालेया नरबहादुर धामी २१ हजार ६४५ मत हःगु खः।

अथेहे राष्ट्रिय स्वतन्त्र पार्टीया उम्मेदवार झंकरराज जोशीं ४ हजार ९३१, राष्ट्रिय प्रजातन्त्र पार्टीया अशोकबहादुर सिंहं ३५१० मत हःगु खः।

मकवानपुर क्षेत्र नम्बर २ य् नेकपा एमालेया उम्मेदवार महेश बर्तौला प्रतिनिधि सभा सदस्यय् निर्वाचित जूगु दु।

सत्तारुढ गठबन्धनया उम्मेदवार नेकपा एकीकृत समाजवादीया विरोध खतिवडायात ४ हजार स्वया अप्पो मतं बूकुगु खः।

बर्तौला ८६ हजार ३१ मत कुहावगुलि ३४ हजार ९१६ मत हया विजयी जूगु खः। खतिवडां ३० हजार ३९६ मत हाःगु खः।

खतिवडा थ्व स्वया न्ह्यः निर्वाचनय् लगातार प्यक तक निर्वाचित जुयाच्वम्ह खः। संसदीय निर्वाचनय् विरोध थ्व हे न्हापागु पटक बूगु खः।