येँ महानगरपालिकां दरबारमार्गय् याकन हे व्यवस्था मयासा दरबारमार्ग विकास बोर्डं चरणबद्ध आन्दोलन यायेगु चेतावनी बिःगु दु।

थौं शुक्रबाः बोर्डं येँ छगु पत्रकार सम्मेलन यासे येँ महानगरपालिकां दरबारमार्गय् चिइकूगु पार्किङ तत्काल कायम यासा महानगरबिरुद्ध आन्दोलन यायेगु चेतावनी बिःगु दु। बोर्डं ताःईनिसे दबारमार्गया वडा कार्यालय व ट्राफिक प्रहरीया समन्वयय् सतकय् छगु लाइन पार्किङ याउगु व छगु लाइन पार्किङं ट्राफिक व्यवस्थापनय् छु न समस्या मवःगु धका धाःगु खः।

बोर्डनाप छलफल व संवाद मयासे पार्किङ हटे यायेगु निर्णय बोर्डं माने मयायेगु धका धाःगु दु। पत्रकार सम्मेलनय् न्ववासे बोर्डया पूर्वअध्यक्ष गोपाल कक्षपतीं स्मार्ट पार्किङ तया व्यवस्थित यासे पार्किङ जुयाच्वंगुलि महानगरपालिकां छक्वलं बन्द याःगु धका धाःगु खः। वयकलं महानगरं बोर्डनाप याकन हे सहलह ब्याकां पार्किङ व्यवस्था याकन हे यायेमाः धका धाःगु दु।

राष्ट्रियसभा उपाध्यक्षया निति थ्व हे वइगु माघ २३ गते चुनाव जुइगु दु।

थौं शुक्रबाः च्वंगु बैठकय् राष्ट्रियसभा अध्यक्ष गणेश तिमल्सिनां निर्वाचन कार्यक्रम प्रकाशित यायेत निर्देशन बिःगु दु।

राष्ट्रियसभा उपाध्यक्ष पद २०७८ फागुन २१ गतेनिसे खाली जूगु खः।

गोलाप्रथाय् प्यदँया कार्यकालय् तत्कालीन उपाध्यक्ष शशिकला दाहालया कार्यकाल २०७८ फागुन २१ गते क्वचाःगु खः।

येँ महानगरपालिकाय् न्हुपि नगर प्रहरीपिन्त स्वलानिसे तलब काये मखुगु धका धाःगु दु।

प्रदेश निजामती कानुन दयकेमखुगु कारण नगर प्रहरी भर्ना याये मफुगुलि महानगरं दच्छिनिति १६२ म्ह नगर प्रहरी तयेगु कथं युनिक सेक्युरिटी कम्पनीनाप ४ करोड ३२ लाख ४० हजारय् सम्झौता याःगु खः।

कम्पनीपाखे १३० म्ह नगर प्रहरीपिन्स ज्या यानाच्वंगु दु। कम्पनीं छ्वपि ३५ म्ह स्वया अप्पोसित महानगरं अयोग्य धका लितछ्वया हःगु खः। नगर प्रहरीइ ज्या यानाच्वपिन्स न तलव व पोशाक काये खगु मदुनि । सम्झौता कथं कम्पनीं लच्छिया २० हजार ५३२ बिइमाः। अथेहे पोशाक, चुस्ता, सिटी कड, रेनकोट, गमबुट, टर्च लाइट, ज्याकेट दक्को महानगरं उपलब्ध यायेमाः।

उमित न कम्पनी. तलब बिगु दु, न महानगरं पोशाक बिःगु दु । छम्ह नगर प्रहरीया कथं पोशाक, चुस्ता, बुट बिइ धका भर्ना याउगु खःसा आःतक बिःगु मदुनि। अय् जुया नगर प्रहरीया नामय् छपु गाः जक दु। येँ महानगरपालिका च्वयातःगु फ्लोरोसेन्ट ज्याकेट फिना ड्युटी याना च्वंगु दु।

लुँ तोलां थौं १ हजार १ सय रुपैयाँ कुहावःगु दु।

लुँ तोलां थौं १ हजार १ सय रुपैयाँ कुहावया १ लाख ५ हजार ८ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु ।

अथेहे थौं वहःया भाः स्थिर जुगु दु। वहः तोलां म्हिगः थे १ हजार ३ सय ८० रुपैयाँ न कारोबार जुगु दु धका महासङ्घं धाःगु दु ।

क्षत्रपाटी निःशुल्क चिकित्सालयया ६६ क्वःगु बार्षिकोत्सवया लसताय् संस्थापक कम्पाण्डर बद्री मालीया झ्वाताः छगु ज्याझ्वः दथुइ येँ महानगरपालिका प्रबक्ता नाप १७ या वडा अध्यक्ष नविन मानन्धरं यानादीगु दु। क्षत्रपाटी निःशुल्क चिकित्सालयया अध्यक्ष डा. मनोजमान श्रेष्ठया सभाध्यक्षताय् जुगु उगु ज्याझ्वलय् अस्पतालय् ताः ईनिसे सेवायानाच्वपि कर्मचारीपिन्त सम्मान नाप हनापौं लःल्हागु खः।

क्षत्रपाटी निःशुल्क चिकित्सालय २०१३ साल माघ २३ गते झीतका ध्यवां सुरु जुगु नेपाःया न्हापागु सामुदायिक स्वास्थ्य संस्था खः । तत्कालिन सञ्चार, यातायातमन्त्री गणेश मान सिंहं २०१६ साल माघ २३ गते श्रीपञ्चमीया दिं कुन्हु भवनया सिलान्यास यानादीसे औपचारिक रुपं उलेज्या यानदीगु खः।

बार्षिकोत्सव ज्याझ्वलय् न्ववायेगु झ्वलय् मूपाहाँ येँ महानगरपालिकाया प्रबक्ता नाप १७ वडाया अध्यक्ष मानन्धरं शहरी क्षेत्रय् जनतापिनिगु स्वास्थ्य उपचारय् क्षत्रपाटी निःशुल्क चिकित्सालयया तधःगु भूमिका निर्वाह याःगु दु धका धयादीगु खः।

अस्पतालया अध्यक्ष डा. श्रेष्ठं थःगु प्यदँया कार्यकालय् अस्पतालय् यक्को हे लुमके बहःजु ज्या जुगु दु धका धयादीसे माऊ बद्री भवन तयार जुयाच्वगु नाप मेगु भवन बीर गणेशमान सिंहया नामय् दयकेगु प्रस्ताव न्ह्यने हयागु दु धका धयादीगु दु। प्रविधिमैत्री अत्याधुनिक भेन्टिलेटरनाप न्हुगु अस्पताल दयकाच्वनागु व येँ  महानगरपालिका नाप मेमेगु थास न ग्वाहालि वयाच्वंगु दु धका धयादीसे वयकःपिन्त सुभाय् न देछानादीगु दु।

माऊ बद्री भवन दयकेगु निति तत्कालिन मेयर बिद्यासुन्दर शाक्यया नेतृत्वया कार्यपालिकां ५ करोड ५० लाख बजेत बिनियोजन यानाबीगु खः।

थौं कन्ह्यः निगु अत्याधुनिक भवनय् स्वास्थ्य सेवा बियावयाच्वंगु दु सा न्हुगु अत्याधुनिक माऊ बद्री भवन निर्माण जुयाच्वंगु दु।

अथेहे क्षत्रपाटी निःशुल्क चिकित्सालयया २१ म्ह संस्थापकपि मदुपि बद्रीमान माली, हर्ष बहादुर माली, महाबिर माली, बद्रीमान मानन्धर, हर्ष नारायण महर्जन, तुलसी नारायण मानन्धर, रामहरि कृष्ण मानन्धर, हेमदेव मानन्धर, शम्भूलाल मानन्धर, सुरेन्द्र बहादुर पाँडे, इन्द्रमान मानन्धर, मुकुन्दराज जोशी, मोतिमान श्रेष्ठ, नाती पोडे, हरिहरराज लोहनी, मान बहादुर श्रेष्ठ, बहादुर कृष्ण मानन्धर,  सिद्धिलाल श्रेष्ठ, गणेश प्रसाद रेग्मी व बद्री नारायण मानन्धरया किपातय् स्वां दछायेगु ज्या जुग खः।