नेपाःया लागि चिनियाँ राजदूत छेन् सोङ्गं प्रधानमन्त्री पुष्पकमल दाहाल प्रचण्डयात नापलाःगु दु। सोमबाः सुथय् सिंहदरबारस्थित प्रधानमन्त्री कार्यालयय् वना नापलाःगु खः।

थौं जुगु खँल्हाबल्हाय् नेपाः व चीन दथुइ जुयाच्वःगु निगु पक्षीय सम्बन्ध व ग्वाहालि अझ क्वातुकेगु बारे खँ जुगु दु धका प्रधानमन्त्री कार्यालयं धाःगु दु।

राजदूत सोङ्गं प्रधानमन्त्री प्रचण्डयात चिनियाँ राष्ट्रपति, उपराष्ट्रपति व प्रधानमन्त्रीपाखे भिंतुना नाप न्हुगु दँया भिंतुना सन्देश न लःल्हागु दु।

प्रधानमन्त्री प्रचण्डं चिनियाँ ग्वाहालि, सद्भाव व भातृत्वया भिंतुना बियादीसे थःगुपाखे राष्ट्रपति सिचिन फिङ व प्रधानमन्त्रीया कार्यकाल सुथालाक्क न्ह्याय् फयेमा धका भिंतुना बियादीगु खः।

कोरोना महामारीया कारणं दिनाच्वंगु ख्वपया सम्यक महादान म्हिगः जुगु दु।

दँय्दसं घ्यःचाकु संल्हू कुन्हु ख्वपय् न्याम्ह दीपंकरयात बुरांख्यलय् बिज्याकाः सम्यक महादान न्यायेकीगु चलन दु । नेपाल संवत ७८७ स जयदेव बज्राचार्यं ३६० रोपनी जग्गा नापं जयकीर्ति महाविहार थथुबही पुनःस्थापना यानाःलि थ्व सम्यक महादान पर्व न्यायेकूगु खँ अनुसन्धानकर्ता सुरेशज्योति शाक्यं कनादीगु दु ।

थुगुसी झिंन्यासःदँ पुलांगु मुच्छलिन्द नागं कुइकाच्वंगु ध्यान मुद्राय् दुगु अति दुर्लभ बुद्धया मूर्ति ख्वप नपाया मेयर सुनिल प्रजापतियात दर्शन याकेगु ज्या नं जूगु खः । उगु मूर्ति नेपाःया भ्वँत, ख्वप नापं अफगानीस्तान, पाकिस्तान व गिलगित पर्वतय् जक दुगु खँ धाःगु दु । थुगुसी निदँ लिपा सम्यक महादान न्ह्याःगुलिं आपालं श्रद्धालुतय्सं ब्वति काःगु खः ।

न्याम्ह सम्यक द्यः ख्वपया अजाजु द्यःत नापं जयदेवया सन्तान दरसन्तानतय्गु मूर्ति नं ब्वयाः उगु सम्यक न्यायेकूगु खः ।

पोखरा दुर्घटना जुगु यती एयरलाइन्सया विमान आइतबाः सुथय् १०ः३२ बजे त्रिभुवन अन्तर्राष्ट्रिय विमानस्थलपाखे ब्बःगु खः।

क्याप्टेन कमल केसी नेतृत्वया चालक दलं ब्बकूगु उगु जहाज १०ः५० बजे लिपागु पटक पोखरा टावरनाप सम्पर्क याःगु खः। सेती खोँचपाखे याःगु सम्पर्कय छगु मिनेट दुने हे दुर्घटना जूगु धका विमानस्थल नागरिक उड्डयन कार्यालयं धाःगु दु।

कार्यालयया छम्ह अधिकारीया कथं क्याप्टेन केसीनाप सम्पर्कय् पोखरा टावरया एयर ट्राफिक कन्ट्रोलरं रनवे ३० य् ल्याण्ड यायेत इनाप याःगु खः। तर, केसीं मेगु रनवे फ्वःगु खः धका उम्ह अधिकारीं धाःगु दु।

‘रनवे थ्री जेरोमार्फत ल्याण्ड यायेत धाःगु खःसा क्याप्टेनं उगु मखु १२ पाखे वये धका मेगु रनवे माःगु खः’, उम्ह अधिकारीं धाःगु दु, ‘मेगु रनवेपाखे मिले यायेगु झ्वलय् हे दुर्घटना जुल।’ दुर्घटना छु जुया जुगु खः धका आःतक न सिइ मदुनि।

तिनख्यलय् थारू समुदायया राष्ट्रिय माघी महोत्सव तःजिक हःगु दु। थारुपिन्स थाकसया ग्वहालिइ स्वदँनिसे माघी महोत्सव हनिइगु याःगु खः।

महोत्सवया उउलेज्या प्रधानमन्त्री पुष्पकमल दाहाल प्रचण्डं यायेगु धाःसा प्राविधिक कारणवस उपस्थित मजुगु धका थाकसया सदस्य सचिव कानुन लाल चौधरीं धाःगु दु।

महोत्सवया उलेज्या यायेगु न्ह्यः थारू संस्कृति, वसः, बाजं, खलः पुचःया ब्यानरनाप वसन्तपुरं झाँकी ¥याली पिकाःगु खः।

पोखराय् यती एयरलाइन्स विमान दुर्घटनाय् पत्रकार त्रिभुवन पौडेल मदुगु दु।

नेपाल पत्रकार महासंघया केन्द्रीय सदस्य जुयादीम्ह पौडेल पोखराया नेपाल प्रेस सेन्टरया बैठक तयारी यानाच्वम्ह खः। उकिया निति पौडेल बैठकया तिथि क्वछिइत येँ वम्ह खः।

माओवादी केन्द्रकया अध्यक्ष नाप प्रधानमन्त्री पुष्पकमल दाहाल प्रचण्डया व्यस्त जुगुलि छन्हु निन्हु लिपा वये धका पौडेल यती एयरलायन्सया जहाजं पोखरा वःगु खः।

जहाजय् च्वपि ७२ म्ह मध्ये ६९ म्ह सी धुकुगु पुष्टि जुइ धुकुगु दु। उकि मध्ये पौडेलया शव सनाखत जुइ धुकुगु दु धका नेपाल पत्रकार महासंघ कास्की अध्यक्ष विमला भण्डारीं जानकारी बिःगु दु।

पौडेल मदुगुलि पत्रकार महासंघं १३ दिं तक केन्द्र, प्रदेश व दक्को शाखाय् शोक माने यायेगु निर्णय याःगु दु। १३ दिं तक शोकसभा बाहेक छु न ज्या मयायेगु निर्णय जुगु दु धका महासंघया महासचिव रोसन पुरीं जानकारी बिःगु दु।