नेवाः भाय्यात बाग्मती प्रदेशय् सरकारी कामकाजि भाषाया रुपय् लागू मयातले दिपाः हे मकासे नेवाःत न्ह्याः वनीगु जूगु दु ।

थौं शनिवाः नेवाः देय् दबू स्वनिगः विशेष प्रदेशया ग्वसालय् जूगु ज्याझ्वलय् नेवाः देय् दबूया केन्द्रीय नायः पवित्र बज्राचार्यनापं स्वनिगः विशेष प्रदेशया नायः श्रीकृष्ण महर्जनपिन्स अथे धयादीगु खः। देय् दबूया केन्द्रीय नायः बज्राचार्य व स्वनिगः विशेष प्रदेशया नायः महर्जनं बाग्मती प्रदेश राष्ट्रभाषा ऐन लागू मजूतले राजनीतिक दल, बाग्मती प्रदेशया सांसदतय्त निरन्तर रुपं खबरदारी याना च्वनेगु नापनापं जनताय् वना नं माःगु कथं थुइकेगु ज्या यायेगु जुइ धयादिल ।

अथे हे यदि भाषाया थुगु अधिकार प्राप्त मजुल धाःसा अथवा ऐन पारित यायेगु ज्या मयात धाःसा आन्दोलन यायेत तकं तयार जुइमाः धकाः धयादिल । बाग्मती प्रदेशय् नेवाः भाय् व तामाङ भाय् सरकारी कामकाजि भाय् कथं लागू याकेगु नीति मदिक्क कुतःया दथुइ प्रस्तावित ऐन प्रदेश सरकारया मुख्य मन्त्रीयात कार्यदलं लःल्हाये धुंकूगु दुसा आः संसदं पारित जुइवं कानुन कथं लागू जुइ ? उकिया नितिं छु यायेगु नापं उगु प्रस्तावित ऐनय् छु छु दु ? सिकेगु निति थौं शनिवाः बैशाख १६ गते शनिवाः नेवाः देय् दबू स्वनिगः विशेष प्रदेशया ग्वसालय् जूगु उगु सहलह जूगु खः।

देय् दबू स्वनिगः विशेष प्रदेशया नायः श्रीकृष्ण महर्जनया सभाध्याक्षय् जूगु उगु सहलह ज्याझ्वलय् बाग्मती प्रदेश सरकारं दयेकूगु कार्यदलया दुजःपिं प्रा.डा. ओमकारेश्वर श्रेष्ठ नापं भाषा आयोगया दुजः भाषाविद् अमृत योञ्जन तामाङपि पाहां कथं झायादीगु खः । वय्कःपिन्सं बाग्मती प्रदेश सरकारयात लःल्हानागु प्रस्तावित ऐनय् नेवाः भाय् व तामाङ भाषायात बाग्मती प्रदेशया सरकारी कामकाजि भाषाया रुपय् लागू यायेगु बारे नापनापं भाषाया ल्याखं सुना नं अपमान यात, विभेदयात धाःसा कानुनी कारवाही यायेफइगु अले सरकारी निकायपाखें नेवाः भाय् व तामाङ भाय्यात लागू यायेगु सवालय् अलताल यात धाःसा उकियात कया कसुरया व्यवस्था तकं यानागु दु धकाः धयादिगु खः।

बुगंद्यःया रथ थौं यलया लुँहितीइ थ्यःगु दु । थौं रथयात मंगलबजार जुया यलया लुँहितिइ थ्यःकूगु खः।

कार्यवाहक राष्ट्रपति रामसहाय प्रसाद यादवं संसदया हिउँदे अधिवेशन क्वचायकूगु दु।

राष्ट्रपति रामचन्द्र पौडेल उपचारया झ्वलय् भारतय् वनाच्वंगु कारण यादवयात कार्यवाहक राष्ट्रपतिया जिम्मेवारी वःगु खः।

वयकलं संविधानया धारा ९३ या उपधारा २ बमोजिम मन्त्रिपरिषदं वैशाख १२ गते याःगु सिफारिसया आधारय् थौं शुक्रबाः चान्ह्यः १२ बजेलिपा संसदया अधिवेशन क्वचागु धका धाःगु दु।

वंगु २४ घण्टाया दुने देयन्यक १०३ म्हेसित कोरोना संक्रमण पुष्टि जूगु दु।

स्वास्थ्य मन्त्रालयया कथं देयन्यक १ हजार ९२५ म्हेसिगु नमुना परिक्षण यागुलि१०३ म्हसित कोरोना सक्रमण जूगु खः।

६२७ म्हेसित पीसीआर परीक्षण यागुलि ५० म्ह व १ हजार २९८ म्हेसित एन्टीजेन परीक्षण यागुलि ५३ म्ह याना १०३ म्ह कोरोना संक्रमण जूगु खः।त

लुम्बिनीया नवनियुक्त मुख्यमन्त्री डिल्लीबहादुर चौधरीं थौं शपथ याःगु दु। बुटवलय् प्रदेश प्रमुखया कार्यालय प्रदेश प्रमुख अमिक शेरचनं मुख्यमन्त्री चौधरीयात शपथ याकूगु खः।

चौधरीं बिहीबाः संविधानया धारा १६८ या उपधारा २ कथं मुख्यमन्त्री नियुक्त याःगु खः। शपथ ग्रहण समारोहय् निवर्तमान मुख्यमन्त्री नाप नेकपा एमाले पोलिटब्युरो सदस्य लिला गिरीनाप गठबन्धनय् दुथ्याःगु राजनीतिक दलया नेता कार्यकर्तापि सहभागी जूगु खः।

सत्ता साझेदार दल दथुइ मन्त्रालय भागबण्डाया खँ मिले मजूगुलि स्वम्ह मन्त्रीपिन्स विना विभागीय मन्त्रीया कथं शपथ याःगु खः। मुख्यमन्त्री डिल्लीबहादुर चौधरीं माओवादी केन्द्रया धनबहादुर मास्की राना, नागरिक उन्मुक्तिया धर्मबहादुर चौधरी व लोकतान्त्रिक समाजवादी पार्टीया सन्तोष पाण्डेपि विना विभागीय मन्त्री नियुक्त जूगु खः।