नेपाल संवत् राष्ट्रिय न्हूदँ समारोह समिति ११४३ या नायः प्रा.डा. नरेशमान बज्राचार्य थौं मंगलवाः सुथय् छगू विज्ञप्ति पितब्यूसें थुगुसीया न्हूदँ तःजिक हनेत सकलसित इनाप यानादीगु दु।

वय्कलं न्हूदँया तयारीया नितिं समारोह समितिं थीथी ज्या न्ह्याकावयाच्वंगु जानकारी बिसें न्हूदँ राष्ट्रिय पर्व जक मजुसे नेपाःया संस्कृति जूगुलिं न्हूदँ व थ्वः लिसे स्वाःगु स्वन्ति नखः स्वन्हुयंकं झ्वःलाक्क न्यायेकेत नं इनाप यानादीगु दु।

लिसें नायः बज्राचार्यं उगु विज्ञप्तिपाखें सकलसित मदुम्ह वाङ्मय शताब्दी पुरुष संस्कृतिविद् युगपुरुष सत्यमोहन जोशी मदुगु दुःखयात थ्व दँय् शक्ति कथं न्ह्यःने यंकाः न्हूदँ ज्याझ्वः न्हापालिपासिबें जनचेतना थनेगु कथं व नेपाःया मौलिक राष्ट्रिय संवत् नेपाल संवत् हलिंन्यंकं च्वनाच्वंपिं नेपाःमिपिन्त भिंतुना बिइगु कथं व नेपाल संवत् राष्ट्रिय संवत् धायेधुंकाः सरकारपाखें यायेमाःगु ज्या याकेगु नितिं दबाब बिइगु कथंया ज्याझ्वः यायेत नं इनाप यानादीगु दु।

थौं शेयर बजाः न घटे जुगु दु। म्हिगः आइतवाः झन्डै १० अंकं घटे जुया शेयर बजाः थौं दशमलव ६१ अंकं घटे जुया १ हजार ८ सय ५८ दशमलव ३३ बिन्दुइ कुहावःगु दु।

थौं बैंक, व्यापार, होटल, निर्जीवन बीमा, म्युचल फन्ड व मेमेगु समूहबाहेकया शेयर घटे जुगु दु। जीवन बीमा, उत्पादन व फाइनान्स समूहया शेयर तसक कुहावःगु दु।

नेप्से सूचक घटे जुगु दिं २ सय १९ कम्पनीया १६ लाख ३१ हजार कित्ता शेयर ५१ करोड ५८ लाख रुपैयाँया कारोबार जुगु दु। दकलय् अप्पो नबिल बैंकया २ करोड ७९ लाख रुपैयाँया शेयर किनबेच जुगु दु।

पिपुल्स पावर कम्पनीया शेयर १० प्रतिशतं घटे जुगु दु। समग्र बजाः घटे जूसा अभियान लघुवित्तया शेयर १० प्रतिशतं थहावःगु दु।

निर्वाचन आयोगं वइगु कात्तिक १८ गते स्वया न्ह्यः राजनीतिक दलपिन्स चुनाव प्रचारप्रसारया लागि कोणसभा व आमसभा याये दइमखु धका धाःगु दु।

निर्वाचन आयुक्त रामप्रसाद भण्डारीं चुनाव जइ स्वया १७ दिं न्ह्यः जक कोणसभा व आमसभा याये दइगु व्यवस्था कथं कात्तिक १८ गतेनिसे जक कोणसभा व आमसभा याये दइ धका धाःगु दु। यदि कात्तिक १८ गते स्वया न्ह्य कोणसभा व आमसभा यातकि चुनावया आचारसंहिता उल्लङ्घन याःगु खनेदतकि उम्मेदवारया मनोनयन खारेज तक जुइफु धका चेतावनी बिःगु दु।

निर्वाचन आचारसंहिताय् मतदानया १७ दिं न्ह्यः जक दल नाप उम्मेदवारं कोणसभा, आमसभा, सेमिनार, गोष्ठी याये दइगु व्यवस्था राजनीतिक दलपिनिगु समर्थनय् तयागु धका आयुक्त भण्डारीं धाःगु दु।

अथेहे आयुक्त भण्डारीं आःतक घरदैलो वनेगु इलय् २५ म्ह तक वने फइ धका धाःगु दु। तर घरदैलोय् वनेगु इलय् बाजं थाना भ्वँय् याये दइ मखु धका धाःगु दु।

सरकारं वाङ्मय शताब्दी पुरुष सत्यमोहन जोशी मदुगु शोकय् कन्ह्यः मङ्गलवाः सार्वजनिक बिदा बिउगु दु।

गृह मन्त्रालयया प्रवक्ता फणिन्द्रमणि पोखरेलं थौं सोमवाः छगु विज्ञप्ति पिकया कन्ह्यः मङ्गलवाः कात्तिक १ गते जोशी मदुगु शोकय् देयन्यक सार्वजनिक बिदा बिइगु निर्णय जुगु दु धका जानकारी बिःगु दु।

शताब्दी पुरुष जोशी १०३ दँय् म्हिगः आइतवाः सुथय् मदुगु खः। वयकःया शोकय् देयन्यक सरकारी कार्यालय, सार्वजनिक सङ्घ–संस्था व विदेशय् दुगु कुटनीतिक नियोगय् राष्ट्रिय ध्वाँय् झुके यायेगु निर्णय जूगु दु धका पोखरेलं धाःगु दु।

मानवशास्त्री ओम गुरुङ मन्त। गुरुङ हरिसिद्दि क्यान्सर अस्पतालय् उपचार यायेगु झ्वलय् ७० दँय् थौं सोमबाः मदुगु खः।

नेपाल आदिवासी जनजाति महासंघया पूर्व महासचिव तक जुयादीम्ह गुरुङ आः नेकपा क्रन्तिकारी माओवादीया सल्लाहकार समितिया अध्यक्ष तक जुयादीगु खः।

वयकः त्रिवि समाजशास्त्र नाप मानवशास्त्र विभागया प्रमुख जुयादीगु इलय् नेपाःया सामाजिक समावेशीकरण सम्बन्धी विस्तृत किताब सोसल इन्क्लुजन एटलस अफ नेपाल सार्वजनिक यानादीगु खः।

विदेशय् च्वनाच्वपि मस्त मवतले गुरुङया शव पाटन अस्पतालय तयातए धका वयकःया निकटस्थपिन्स जानकारी बिःगु दु।