नांजाःम्ह बरिष्ठ आख्यानकार मथुरा सायमिया न्हूगु ताहाः बाखं सफू “चिप–निप“या चिखिफ्येनेज्या वंगु शनिबार जÞूमपाखें जुगु दु।

६५ म्ह मयाक पाहाँपिसं ब्वति काःगु उगु ज्याझ्वलय् सफूया चिखिफ्येनेज्या नांजाःम्ह बरिष्ठ बाखंच्वमि राजा शाक्यं यानादीगु खः। उगु ज्याझ्वलय् राजा शाक्य, मथुरा सायमि लिसें बिशिस्ट पाहाँपिं मल्ल के सुन्दर, डा.बालगोपाल श्रेष्ठ, डा. रीना तुलाधर, प्रमिला सायमि, पूर्णकाजी ताम्राकार व राकेश महर्जनपिसं थःथःगु नुगःखँ तयेगु लिसें सफूया समालोचना यानादीगु खः।

शिकागोय च्वनच्वनादीम्ह बाखंच्वमि केशरमान ताम्राकारं ज्याझ्वः न्ह्याकादीगु उगु ज्याझ्वलय् सफूया प्रकाशन थः मां हीरा देवी ताम्राकार व अबुजु भिक्षुरत्न ताम्राकारया नामं न्यादं न्ह्यः निस्वनातःगु भिक्षु हीरा फॉउण्डेशनपाखें याःगु खः।

उगु फॉउण्डेशनं आःतक न्याम्ह साहित्यकारपि पूर्णकाजी ताम्राकार, पुष्परत्न तुलाधर, सुगतदास तुलाधर, हितकर बीर सिंह कंसाकार व सुवर्णमान तुलाधरयात भिक्षु हीरा साहित्य सिरपाः लल्हाये धुंकूगु दु।

ईङवा हाइड्रोपावर लिमिटेडं सर्वसाधारणपिनिगु लागिु प्राथमिक सेयर (आईपीओ) थौंनिसे बिक्री खुल्ला याःगु दु। कम्पनीं जारी पुँजी ६० करोड रुपैयाँया ३० प्रतिशत अर्थात् १०० रुपैयाँ अंकित भाः १८ लाख कित्ता आईपीओ निष्कासन याःगु दु।

कम्पनीं स्थानीयपिन्त जारी पुँजीया १० प्रतिशत अर्थात् ६ लाख कित्ता व वैदेशिक रोजगारी वनाच्वपि नेपाःपिनिगु लागि १ लाख २० हजार कित्ता आईपीओ निष्कासन याना बाँडफाँट याये धुकुगु दु।

कम्पनीं आयोजना प्रभावितयात छुटे याना ल्यदनिइगु व वैदेशिक रोजगारीइ वनाच्वपि नेपाःपिनिगु लागि छुटेयाना ल्यःदनिइगु सेयर थपे याना सर्वसाधारणपिन्त १०० रुपैयाँ अंकित भाः १२ लाख ६८ हजार ६३९ कित्ता आईपीओ निष्कासन याःगु खः।

आईपीओ थौंनिसे वैशाख १७ गते तक आवेदन बिइफइ। उगु इलय् न माग कथं आवेदन मवसा वैशाख २७ गतेतक आवेदन बिइगु ई तयातःगु दु।

बारा क्षेत्र नम्बर २ या प्रतिनिधि सभा उपनिर्वाचनय् जनता समाजवादी पार्टी (जसपा) अध्यक्ष उपेन्द्र यादव विजयी जूगु दु।

न्यागु दलीय गठबन्धनया मंकाः उम्मेदवार यादव ५ हजार ८१ मत अन्तरं विजयी जूगु खः। यादवं २८ हजार ४१५ मत हया विजयी जुगुलि वयकःया निकटतम प्रतिस्पर्धी जनमत पाटीया शिवचन्द्र प्रसाद कुशवाहा २३ हजार ३३४ मत हःगु खः।

अथेहे नेकपा एमालेया उम्मेदवार पुरुषोत्तम पौडेल १० हजार २१६ मत, रास्वपाया उम्मेदवार रमेश खरेलं २ हजार ८२९ व आमजनता पार्टीया उम्मेदवार अरुण ज्ञवालीं २ हजार ७३८ मत हःगु दु धका निर्वाचन अधिकृतया कार्यालयं धाःगु दु।

ह्यगृब भैरबनाथ व ३२ पानेजु संघं थुगु पालय् किपूया प्यंगःथामय् स्वां तय्मयकिगु जूगु दु। प्यंगःथामय् बुगंद्यःया प्रतिमूर्ति व याकः मिसाया मूर्ति दयकूगु विरोधय् अथे घोषणा याःगु दु।

किपूया सुखी गःछें समाज टोल समितिं २०७९ मंसिर १५ गते मूर्ति पलिस्था यागुलि ह्यगृब भैरबनाथ व ३२ पानेजु संघं लिखित असहमति याःगु खः। पानेजु संघया लिखित सहमति मदुगु न्हापानिसे उगु थासय् छु न मूर्ति मदुगुलि बुगंद्यःया प्रतिनिधिपात्र जलपानेजुपिन्स दँय् दँसं थतित्वालय् खालि तुतिइ न्यासिवना याकःमिसायात स्वां बिइ यकेगु जीवित परम्पराया विरुद्ध मूर्ति स्थापना यागुलि थुगुसिनिसे स्वां तये यकिइमखु धका संघया अध्यक्ष यज्ञरत्न शाक्यं जानकारी बिःगु दु।

संघं वंगु पुस २ गते बैठक च्वना किपूया प्यंगःथामय् बुगंद्यःया प्रतिमूर्ति व याकः मिसाया मूर्ति दतलय् स्वां तवनिइ निर्णय याःगु खः। सुखी गःछें समाज टोल समितियात पुरातत्व विभागं निकः तकः पौं च्वया मूर्ति चिइकेत धाःगु खः। अय्न मूर्ति हटे मयागुलि स्वां तवनिइ मखु धका शाक्यं धाःगु दु। बुगंद्यःया भोतो जात्रा न्ह्यः यलया मंगलबजार सोह्रखुट्टे फल्चाय् साइत स्वया पिहावंगु साइतया प्यन्हु न्ह्इः बुगंद्यःया प्रतिनिधि कथं जल पानेजुं खालि तुतिइ न्यासि वना किपूया याकःमिसायात बुगंद्यःया स्वां बिइयकिइगु जीवित परम्परा जुयावया च्वंगु खः ।

संघया अध्यक्ष शाक्यया कथं बुगंद्यःया नित्य पूजा कर्म यायेत गुठी संस्थानं  वंशजया आधारय् २४ म्ह शाक्य थरया व न्ह्यम्ह बज्राचार्य थरया पुजारीपिन्त नियुक्त याना धार्मिक नाप ऐतिहासिक परम्परा दु। शाक्यया कथं किपूया मूर्ति स्थापनाया विरोधय् दक्को पुजारीपि एकमत जुगु दु।

सेयर बजार परिसूचक नेप्स थौं दोहोरो अंकं थहावःगु दु। थौं मंगलबाः बजाः परिसूचक नेप्से १७.३६ अंकं थहावना १९०५.६८ अंकय् बन्द जूगु दु।

मंगलबाः म्युचुअल फण्ड बाहेक दक्को उपसूचक थहावंगु दु सा कारोबार रकम न थहावंगु दु। बजाःयात लिड याइगु बैंकिङ उपसूचक न ०.९९ प्रतिशतं थहावंगु दु सा होटल नाप पर्यटन उपसूचक दकलय् अप्पो १.९२ प्रतिशत व उत्पादनमूलक उपसूचक १.८२ प्रतिशतं थहावंगु दु।

शिवम् सिमेन्ट दकलय् अप्पो ७ करोड ९ लाखया कारोबार जुगुलि कालिञ्चोक दर्शन लिमिटेडया ३ करोड १ लाख व नबिल बैंकया करिब २ करोड ७० लाख रुपैयाँया कारोबार जूगु दु। सेयर बजारय् कुल २१७ गु कम्पनीया सेयर कारोबार जूगुलि १६८ कम्पनीया सेयर भाः थहावःगु दु।

अथेहे ४४ गु कम्पनीया सेयर भाः कुहावःगु दु सा न्याःगु कम्पनीया सेयर भाः स्थिर जूगु दु। तारागाउँ रिजेन्सी होटलया सेयर भाः दकलय् अप्पो ८ प्रतिशतं थहावःगुलि खप्तड लघुवित्तया सेयर भाः ७.८५ प्रतिशत व सिद्धार्थ प्रिमियम इन्स्योरेन्स कम्पनीया सेयर भाः ४.५१ प्रतिशतं थहावःगु दु।