नेपाःया पुलांगु संचारमाध्यम रेडियो नेपालं न्ह्याकाच्वंगु एफएम संचारमाध्यमय् नेपाल संवत छ्यलेत इनापयासें नेपाल संवत राष्ट्रिय न्हूदँ समारोह समितिं ज्ञापन पौ लःल्हाःगु दु ।

समारोह समितिया नायः प्रा.डा.नरेशमान बज्राचार्यं रेडियो नेपालया कार्यकारी निर्देशक बुद्धिबहादुर केसीयात वय्कःया ज्याकुथिइ ज्ञापन पौ लःल्हाःगु खः ।

ज्ञापन पौ लःल्हानाकासें कार्यकारी निर्देशक केसीं रेडियो नेपालय् २०६८ सालनिसें नेपाल संवत धकाः प्रसारण यानाच्वनागु खःसा महिना त्वःफिनाच्वंगु खँयात स्वीकार यासें वय्कलं याकनं हे रेडियो नेपाल व्यवस्थापन समितिया मुँज्याय् थ्व खँयात कयाः नेपाल संवतया महिना नं धायेगु खँ निर्णय यायेगु बचं बियादीगु दु ।

येँ महानगरपालिकाया १२ क्वःगु नगर सभा अधिवेशन पुस २९ गतेया लागि आव्हान यायेगु निर्णय जूगु दु।

महानगरया प्रमुख बालेन्द्र शाह (बालेन) या अध्यक्षताय् बालाजु बाइसधाराय् च्वंगु सभा कक्षय् च्वंगु कार्यपालिकाया ११ क्वःगु बैठकं उगु निर्णय याःगु खः। बैठकं सहरी योजनाविद् इञ्जिनियर तपेन्द्रबहादुर खड्कायात सहरी योजना आयोगया उपाध्यक्ष पदय् नियुक्त यायेगु निर्णय याःगु दु। विधायन समितिपाखे बैठकय् पेश याःगु खुगु कार्यविधि व निर्देशिका मस्यौदा बैठकं स्वीकृत याःगु दु।

स्वीकृत जुगु कार्यविधि नाप निर्देशिका ‘येँ महानगरपालिका छात्रवृत्ति कार्यविधि, २०७९’, ‘पुनर्ताजगी विदा सम्बन्धी कार्यविधि, २०७९’, ‘येँ महानगरपालिका आय ठेक्का कार्यविधि, २०७९’, ‘येँ महानगरपालिका वहाल व्यवस्था निर्देशिका,२०७९’, ‘येँ महानगरपालिका मेलमिलाप केन्द्र सञ्चालन निर्देशिका, २०७९’, ‘येँ महानगरपालिका कल सेन्टर (सम्पर्क केन्द्र) सञ्चालन निर्देशिका, २०७९’ खः।

अथेहे विविधय् छलफल यासे बैठकं चःमती जग्गा एकीकरण आयोजनाया म्याद क्वचाःगु व आयोजनाय् भचा जक ज्याः ल्यःदनिइगु ज्या यायेत मनोहरा जग्गा एकीकरण आयोजनायात चःमतीइ ल्यःदनिइगु ज्या यायेत जिम्मेवारी बिइगु निर्णय याःगु दु। अथेहे हलियकं फैलै जुगु कोविडयात सम्भावित जोखिमपाखे चुस्त व प्रभावकारी व्यवस्थापनया लागि ज्या यायेगु निर्णय याःगु दु।

तिंख्यःया चकं दबुली भूमिगत पार्किङ दयेकेगु धकाः येँ महानगरपालिकां याःगु तयारी विरुद्ध सम्पदा अभियन्ता व येँया स्था–नीय जनतापिन्स येँ मनपाय् ज्ञापनपौ बिःगु दु ।

महानगरपालिका ज्याकू पिने करिब घौत्या धर्ना बियाःलि वयां लिपा मनपा ज्याकुथी वनाः ज्ञापनपौ बिःगु खः ।उगु ज्ञापनपौ मनपाया मेयर बालेन साहयात बीगु धकाः ज्याझ्वः दुगु खःसां मेयर साह ज्ञापनपौ कायेत मवःगुलिं उपमेयर सुनिता डंगोलयात लःल्हाःगु खः । ज्ञापनपौ लःल्हाना कासें उपमेयर डंगोलं जनचाहना अःखः तिंख्यलय् भूमिगत पार्किङ मदयेकेगु खँ धयादिल । वय्कलं स्थानीयवासीया सुझाव मदयेक गुगुं नं कथंया ज्या मन्ह्याकेगु प्रतिवद्धता नं प्वकादीगु खः ।

‘अकुपाई टुँडिखेल’पाखें ब्यानर सहित प्रदर्शन यासें मनपा ज्याकू घेराउ याःगु खः । उपमेयर डंगोलं आः काठमाडौं प्लाजा, धरहराय् दयेकाच्वंगु भूमिगत पार्किङं फुक्कं समस्या ज्यंकीगु जूगुलिं थप संरचना आवश्यक मजू धासें तिंख्यः ऐतिहासिक लिसे सांस्कृतिक ल्याखं नं महत्वपूर्ण जूगुलिं थुकिया संरक्षण यायेमाःगु बिचाः नं प्वंकादिल ।

नगर विकास कोषयात थुकिया सम्भाव्यता अध्ययन यायेगु जिम्मेवारी महानगरं बियागु धासें वय्कलं उगु अध्ययन लिपा डीपीआर यायेमाः कि म्वाः धइगु खँया निर्णय जुइगु जानकारी नं बियादिल । थुकिया प्रि–फिजि बिलिटी अध्ययनया नितिं महानगरं टाउन डेभलपमेन्ट फन्डयात जिम्मेवारी बियागु खँ कँसें वयां लिपा जक डीपीआर यायेगु वा मयायेगु धइगु निर्णय जुइगु व डीपीआर लिपा नं दयेकेगु कि मदयेकेगु धइगु निर्णय जुइगु खँ कनादिल ।

वंगु कार्तिकय् येँ मनपाया कार्य पालिका बैठकं तिंख्यलय् ‘ट्रिपल बेसमेन्ट’ पार्किङ व लः हाकनं रिचार्ज जुइगु विस्तृत परियोजना प्रतिवेदन (डीपीआर) दयेकेगु निर्णय याःगु खः । येँ मनपाया उगु निर्णययात कयाः विवाद ब्वलनाच्वंगु दु । सूत्रतय्सं धाःकथं अन पार्किङ दयेके मजिउ धकाः तःगू हे थासं दबाब वःसां नं मेयर साह धाःसा अझ नं लिचिउगु मदुनि ।

यलया दरवार क्षेत्रय् सवारी साधन प्रवेशलिसें पार्किङ निषेध जूगु दु । आवंलि यल दरवार क्षेत्र दुने छुं नं कथंया सवारी दुहांवनेगु लिसें पार्किङ याय् मदइगु जूगु खः ।

यल दरवार क्षेत्रयात व्यवस्थित व मर्यादित दय्केत धासें वंगु आइतबाःनिसें लागू जुककथं यल महानगरं थ्व नियम लागू याःगु खः । वंगु आइतबाः नगर प्रहरी प्रमुख सिताराम हाछेथुलिसें नगर प्रहरीया टोलीं पर्चा वितरणलिसें सरसफाइ ज्याझ्वः यानाः कार्यक्रम सुरुवातया जानकारी स्थानीय सर्वसाधारणयात ब्यूगु खः । महानगरया वैठकं दश बुँद निर्णय यासें थ्व कार्यक्रम लागू याःगु नगर प्रहरी प्रमुख हाछेथुं जानकारी बियादिल ।

कार्यक्रम अन्तर्गत विश्व सम्पदाय् सूचिकृत यल दरबार क्षेत्रय् मोटर साईकललिसें चार पाङग्रे सवारी प्रवेश निषेध लिसें सवारी पार्किङ नं याय् दइमखु । स्थानीय वासिन्दाया सवारी साधन दुतयंके दइगु जूसां पार्किङ धाःसा याय् मदइगु हाछेथुं धयादिल । लिसें उगु क्षेत्रय् धुम्रपान, मद्यपान, साईकल स्टन्ट याय्गु, चिया, कःनि आदि मीगु, तौल मेसिन तय्गुलिइ नं पंगु दु ।

धार्मिक महत्वया आकृति, वस्तु अले चिन्हय्, धार्मिक आस्थाय् ध्वइगु कथं गय्गु आदि नं आवंलि याय् मदइगु जूगु दु । उच्छृङ्खल तरिकां टिकटक वा मेगु भिडियो दय्के, अनुमति बिना फोटो सुट, म्यूजिक भिडियो वा छुं नं कथंया भिडियो सुटिङ व ज्याझ्वः याय्त नं महानगरपालिदकां रोक तःगु दु ।

थुगु नियमय् अटेर याःसा सुरुइ चेतावनी कथं न्यासः दां पुइकेगु वा लिपा १५ सय तक्क पुइकेगु हाछेथुं धयादिल । स्थानीय सम्पदाया संरक्षण व सम्वध्र्दनया लागिं सकलें जाय्त आम नागरिकयात नं हाछेथुं आह्वान यानादिल ।

नेपाल टेलिकमं पूर्वनिर्धारित तालिका कथं पुस १७ गतेनिसे सुरू जुइ धका धाःगुसा ‘फाइभ–जी सेवा’या ट्रायल स्थगित याःगु दु।

टेलिकमं न्ह्याकूगु प्रणाली कथं फाइभजी चले जुइगु मोबइलया ल्याः म्हो जुगुलि ट्रायल स्थगित याःगु खः । टेलिकमं फाइभ–जीको परीक्षणया लागि आन्तरिक रुपं तयारी अन्तिम चरणय् थ्यकूगु दु सा छु भचा प्राविधिक विषयया कारण फाइभ–जीया ट्रायक स्थगन जुगु दु धका प्रवक्ता शोभन अधिकारीं धाःगु दु। टेलिकमं १ जनवरीनिसे फाइभ–जी परीक्षण यायेगु धासे तयारी यानावःगु खः।

आः टेलिकमं थप तयारी यायेगु फाइभ–जीया परीक्षणकाल सुरु यायेगु तयारी याःगु खः। परीक्षणया लागि टेलिकमं उपकरण, प्रविधि जडाननाप जनशक्तियात तालिमनाप बिइ धुकुगु खः। सामान्य मोबाइल इन्टरनेट स्वया याकन फाइभजी इन्टरनेट औद्योगिक, सेवामूलक, नवप्रवर्तनात्मक व उच्च व्यवसायिक क्षेत्रय् छ्यलिइगु डाटा सुविधा दु ।

फाइभ–जीया परीक्षण याये न्ह्यः टेलिकमं थुकिया व्यवसायिक प्रयोगया सम्भावनाबारे न थप अध्ययन व छलफल याइ।