राष्ट्रिय समाचार समिति (रासस) या २२ म्ह पत्रकारपिन्त हटे यायेगु धाःसे नेपाल पत्रकार महासंघ व पेशागत पत्रकार संगठनपिन्स विरोध याःगु दु।

ताः ईनिसे करारय् ज्या यानाच्वपि व ज्यालादारीइ कार्यरत पत्रकारपिन्त थ्व हे वइगु कात्तिक १ गतेनिसे हटे यायेत्यःगु धासे नेपाल पत्रकार महासंघया केन्द्रीय कार्यालयय् पत्रकारया नेतापि मंकाः कथं बैठक च्वंगु खः। बैठकं पत्रकारपिन्त हटे यायेत्यःगु विरोधय् असोज २८ गते १ बजे महासंघं रासस केन्द्रीय कार्यालयय् प्रदर्शन यायेगु निर्णय याःगु दु।

महासंघया केन्द्रीय सदस्य रामकृष्ण शर्मा न श्रमजिवी पत्रकारपिन्त हटे यायेत्यःगु विरोधय् चरणबद्ध आन्दोलन यायेगु धका धाःगु दु।

समाजवादी प्रेस संगठनया कार्यवाहक अध्यक्ष विश्वमणि सुवेदी, नेपाल प्रेस युनियनया उपाध्यक्ष जीवन भण्डारी, प्रेस चौतारी नेपालया महासचिव हिरामान लामा, प्रेस सेन्टरया महासचिव सन्तोष पौडेल, प्रेस चौतारीया प्रदेश प्रतिष्ठान इन्चार्ज मोहन बास्तोला लगायतपिन्स श्रमजीवी पत्रकारपिन्त गु न हालतय् लिकाये दइ मखु धका धाःगु दु।

येँ महानगरपालिकां थापाथली क्षेत्रया अनधिकृत संरचना हटे यायेगु सुरु याःगु दु।

महानगरं अधिकार सम्पन्न बागमती सभ्यता एकीकृत विकास समितिनाप समन्वय याना थापाथलीनिसे यूएन पार्कया ताँ तक (सुकुम्बासी बस्ती नापं) निर्माण जूगु अनधिकृत संरचना हटे यानागु दु धका महानगर प्रहरी उपरीक्षक दिनेश अर्यालं जानकारी बिःगु दु।

अर्यालया कथं उगु थासय् च्वंगु निर्माण जुयाच्वंगु क्रियापुत्री भवन, ओम शान्तिया भवन, रुद्रेश्वर मन्दिरया पुजारी भवन लगायतया संरचना अनधिकृत जुगुलि हटे यानागु धका धागु दु।

नेपाःया लागि नवनियुक्त अमेरिकी राजदूत डिन थम्पसन नेपाः थ्यकं वःगु दु। राजदूत ¥याण्डी बेरी थःगु प्यदँया कार्यकाल पूरा याना स्वदेश लिहावनेवं नवनियुक्त राजदूत थम्पसन नेपाः थ्यकं वःगु खः।

येँया अमेरिकी राजदूतावासया कथं बिहीबाः नेपाः थ्यकं वम्ह राजदूत थम्पसन छु दिं आराम लिपा नेपाः सरकारसमक्ष थःगु ओहोदाया प्रमाणपत्र पेश याइगु जुगु दु।

राजदूत बेरी नामिबियाया लागि अमेरिकी राजदूत नियुक्त जुगु थःगु प्यदँया कार्यकाल क्वचायका वंगु आइतबाः स्वदेश लिहावःगु खः। वयकः लिहावःगु निन्हु लिपा शुक्रबाः जक थम्पसनं नेपाःया लागि नवनियुक्त अमेरिकी राजदूतया शपथ ग्रहण याःगु खः।

थम्पसन थ्व स्वया न्ह्यः अमेरिकाया लागि दक्षिण नाप मध्य एसियाली मामिला व्युरोया उपसहायक सचिवया जिम्मेवारी कयातःगु खः।

मधेशया मुख्यमन्त्री लालबाबु राउतं सत्तारुढ गठबन्धन दलपाखे मन्त्रिपरिषदया नेतापिन्त हटे यायेगु तयारी याःगु दु।

प्रधानमन्त्री शेरबहादुर देउवां संघीय मन्त्रिपरिषदपाखे जसपाया मन्त्रीपिन्त बर्खास्त यायेवं राउत न मधेश सरकारया मन्त्रिपरिषदय् नेपाली कांग्रेस, नेकपा माओवादी केन्द्र व एकीकृत समाजवादीया नेतापिन्त हटे यायेगु तयारी यायेत्यःगु दु।

न्याःगु दलीय गठबन्धनया मन्त्रीपिन्त हटे यायेगु विषय छलफल जुयाच्वःगु दु। प्रदेश सरकारय् कांग्रेसया स्वम्ह, एकीकृत समाजवदीया निम्ह व छम्ह राज्यमन्त्री, माओवादीया छम्ह मन्त्री व छम्ह राज्यमन्त्री दु।

शताब्दी पुरूष सत्यमोहन जोशीया हाकन स्वास्थ्यय् गडबड खनेदुगु दु।

किष्ट मेडिकल कलेज नाप शिक्षण अस्पतालया प्रमुख प्रा.डा. सुरज बज्राचार्यया कथं जोशीया म्ह्यय् अक्सिजनया मात्रा घटे जुइवं आईसीयूलय् तया हाकन उपचार याःगु दु।

स्वास्थ्य अवस्था छु भचा सुधार जुइवं बुधबाः वयकःयात आईसीयू न क्याबिनय् सारे याःगु खः। थौं हाकन स्वास्थ्यय् गडबड जुइवं क्याबिन न आईसीयूलय् यकूगु खः ।

आः जोशीया प्रतिमिनेट ३० लिटर हाइफ्लो अक्सिजन बियाच्वंगु दु।