सरकार साझा न्यूनतम कार्यक्रम तय यायेत गठन याःगु कार्यदलं थौंनिसे प्रारिम्भक मस्यौदा च्वयेगु ज्या याःगु दु।

उपप्रधान नाप अर्थमन्त्री विष्णु पौडेल नेतृत्वया कार्यदलं सरकारय् दुथ्यागु दलया नेतापिनिगु समावेश यासे मस्यौदा तयार याइगु जुगु दु। राष्ट्रिय स्वतन्त्र पार्टी (रास्वपा)या महामन्त्री नाप कार्यदल सदस्य मुकुल ढकालं प्रारम्भिक चरणको छलफल क्वचाय् धुकुगु धका धयादीसे थौं आइतबाः निसे प्रारम्भिक मस्यौदा च्वयेगु ज्या सुरु जुगु दु धका धयादीगु दु ।

छु न दलयात आपत्ती जुइ मखु व याये मफइगु कथं साझा न्यूनतम ज्याझ्वलय् दथ्याइ धका धाःगु दु। पुस १४ गते च्वंगु सत्ता साझेदार दलपिनिगु बैठकं सरकारया साझा न्यूनतम कार्यक्रम तय यायेगु निर्णययासे उकिया संयोजकय् उपप्रधान नाप अर्थमन्त्री विष्णु पौडेलयात क्वछिगु खः। कार्यदलयात न्यान्हुया दुने शीर्ष नेतापिन्त मस्यौदा लःल्हाःगु दु।

कार्यदलं प्रारम्भिक मस्यौदायात शीर्ष नेतापिन्त अन्तिम रुप बिइ। अर्थतन्त्र सुधार, विकास निर्माण, याकन सरकारी सेवा, रोजगारी सिर्जना, सर्वसुलभ स्वास्थ्य सेवा, भ्रष्टाचार न्यूनीकरण लगायतया विषययात साझा कार्यक्रमय् दुथ्याकूगु दु धका नेतापिन्स धाःगु दु।

झिंस्वक्वःगु नेवाः एकता दिवस बलम्वुइ तःजिक हःगु याःगु दु ।

नेवाः देय् दबूया नायः पवित्र बज्राचार्यया सभाध्यक्षताय् जुग उगु ज्याझ्वलय् उमेश स्थापितं नेवाः एकता दिवसया औचित्ययात कयाः थःगु नुगः खँ तयादीगु खः।

उगु ज्याझ्वलय् चन्द्रागिरी नगरपालिकाया उपप्रमुख बसन्ती श्रेष्ठ आदिवासी जनजाति महासंघया नायः क्याम्सेर शेर्पा, नेपाल आदिवासी आयोगया नायः राम बहादुर थापामगर, वागमती प्रदेशया सभासद रमा आले मगर लगायत वक्तापिन्सं थःथःगु नुगः खँ तयादीगु खःसा लोककवि राजभाई जकःमिं नेवाः एकता दिवसया विषयवस्तुयात कःघाना च्वयातःगु चिनाखँ नं ब्वना न्यंकादीगु खः।

बलम्वुया थीथी सांस्कृतिक व संगीतकःमिपिन्सं म्ये हाला व हुलाप्याखँ ल्हुला क्यनेगु नं याःगु खः ।

थौ पोखरा अन्तर्राष्ट्रिय विमानस्थल सञ्चालनय् हइगु जुगु दु। प्रधानमन्त्री पुष्पकमल दाहाल प्रचण्डं थौं सुथय् ११ बजे विमानस्थल उलेज्या याइगु जुगु दु दु धका पोखरा अन्तर्राष्ट्रिय विमानस्थलया निर्देशक बिक्रम गौतमं धाःगु दु।

वयकःय कथं फेब्रुअरी २३ निसे न्हि १८ घौं उडान जुइ धका धाःगु दु। अन्तर्राष्ट्रिय विमानस्थल उलेज्या जुगु लसताय् पोखरा महानगरपालिकां थौं सार्वजनिक बिदा बिःगु दु।

थौं सुथय् न्हापागु उडानपाखे विमानस्थलय् अवतरण याइपि जहाजया चालक दल नाप यात्रुपिन्त स्वांमा क्वखाना लसकुस याइगु जुग दु। अमरसिंह चोकनिसे विमानस्थलतक थीथी जातजातिया साँस्कृतिक झाँकीयासे र्याली न पिकाइगु तयारी दु।

विमानस्थलया परिकल्पना याना जग्गा अधिग्रहण सुरु याम्ह तत्कालीन अञ्चलाधीश शंकरराज पाठकयात न हनिइगु जुगु दु।

नेपाल संवतया प्रवर्तक शंखधर साख्वाःया झ्वाताः येँ महानगरपालिका २० वडाय् परोपकार ताँक्वय् पलिस्था याइगु जूगु दु ।

छुं दिं न्ह्यः जक येँ महानगरपालिकां बेवारिस अवस्थाय् लुगु शंखधरया झ्वाताः बेवारिस कथं परोपकारया ताँ क्वय् शंखधर पार्क स्यंकाः लँपु दयेकेगु झ्वलय् सतक विभागं वांछ्वया तःगुलिं उगु हे थासय् उगु झ्वाताः लानाच्वंगु धका न्हूदँ समारोह समितिया दुजः मनरत्न शाक्यं जानकारी बियादीगु दु।

शाक्यं महानगरपालिकाया नगर प्रहरी बलं उगु झ्वाताः आः येँ महानगरपालिकाय् सुरक्षित यानातःगु खँ धयादीगु दु । वय्कलं उगु शंखधरया झ्वाताः न्हापा गन खः अन हे पलिस्था यायेगु कथं २० वडाया वडाध्यक्ष राजेन्द्र मानन्धरनाप सहलह जुइ धुंकूगु व छन्हु निन्हु दुने हे नगर प्रहरी बल सुरक्षित यानातःगु शंखधरया झ्वाताः वडा ज्याकुथिइ हयेगु धका खँय् नगरपालिकानाप सहमति जुइ धुंकूगु दु धका धयादीगु दु।

येँ महानगरपालिकाया नगर प्रहरी प्रमुख राजुनाथ पाण्डेविरुद्ध उजुरी वयेवं छानविन समिति गठन याःगु दु।

पाण्डे न छम्ह मिसा नगर प्रहरी हवल्दारं थःत दुर्व्यवहार याःगु धासे मंसिर ९ गते प्रमुख प्रशासकीय अधिकृत वसन्त अधिकारी व उपमेयर सुनिता डंगोलयात निवेदन बिःगु खः।

पाण्डे न मचा बूगु अवस्थाय् मिसा नगर प्रहरी हवल्दारया चरित्रय् पतिं धस्वाकूगु खः व तथानाम ब्बःबिउसे ‘छं जिगु मचां बूइकुगु खःला? जागिर नयेगु मन दु सा मचायात छेँ हे त्वःता वाः, मन मदुसा राजीनामा बिउ’ धका दुर्व्यवहार याःगु द्धपः पीडित पक्ष बिःगु दु।

मंगलबाः महानगरपालिका सामाजिक विकास विभागया प्रमुख गोपालप्रसाद पोखरेल संयोजकत्वय् स्वम्ह सदस्यीय समिति गठन याःगु दु धका महानगरया प्रवक्ता नविन मानन्धरं जानकारी बिःगु दु। मानन्धरया कथं न्याय प्रशासन विभागया कर्मचारी सुमित्रा लामिछाने व सहरी योजना आयोगया उपनिर्देशक कुमारी राई सदस्य दुगु समिति गठन याःगु खः।

न्ह्यन्हुया दुने पाण्डेयात छानविन यान समितिं प्रमुख प्रशासकीय अधिकृतयात प्रतिवेदन लःल्हाइगु जुगु दु। मिसा नगर प्रहरी हवल्दारया निवेदन वयेवं महानगरं पाण्डेयात स्पष्टीकरण न्यंगु खः। पाण्डे न पुस ५ गते थःम्हेसिगु गल्ती मदु धका स्पष्टीकरण बिइ धुकुगु दु।