बिश्वकीर्तिमानी सगरमाथा आरोही कल्पना महर्जनं महालक्ष्मी नगरपालिकाय् बालविवाह विरुद्ध अभियान न्ह्याकूगु दु।

आरोही महर्जनं यल महानगरपालिका स्थापना जूगु १०० क्वःगु दँ व संस्कृतिविद्ध वाडमय शताब्दी पुरुष डा. सत्यमोहन जोशीया १०० दँया लसताय् महर्जनं तिब्बतपाखे सफलता पूर्ण आरोहण यायेगु झ्वलय् सगरमाथाय् न्ववागु शिक्षाया माध्यमं बाल बिवाह रोकथाम अभियानयात निरन्तर यायेगु झ्वलय् महालक्ष्मी नगरपालिका दुने झीन्यागु सरकारी ब्बने कुथिया प्रध्यानाध्यापकपि नाप छलफल यायेगु झ्वलय् थुगु अभियानको न्ह्याकूगु खः।

थुगु अभियानया लागि महालक्ष्मी नगरपालिकाया प्रमुख शिक्षा अधिकृत चिरिञ्जीवी पौडेलं ग्वाहालि यानादीगु खः।

नेकपा एकीकृत समाजवादीया अध्यक्ष माधवकुमार नेपालं सरकारय् सहभागी जुइ फइगु लँ क्यःगु दु।

गैरभौगोलिक कमिटीया नेतापि नाप थौं बिहीबाः भर्चुअल माध्यमपाखे सम्बोधन यायेगु झ्वलय् अध्यक्ष नेपालं पार्टी सरकारय् सहभागी जुइ फइगु संकेत क्यंगु दु। ‘अध्यक्ष कमरेडं संकेत सरकारय् सहभागी जुइ कथं लँ क्यःगु दु, उकियात सुझाव कयाच्वंगु दु’, भर्चुअल बैठकय् सहभागी छम्ह नेतां धाःगु दु।

वयकःया कथं, अध्यक्ष नेपालं पुष्पकमल दाहाल प्रचण्ड नेतृत्वया सरकार दयके धुका विकसित घटनाक्रमबारे जानकारी बियादीगु खः।

तर प्रधानमन्त्री प्रचण्ड नापं एमाले व माओवादी नेतापि निगु सरकारय् सहभागी जुइमाःगु प्रस्तावय् पार्टी छलफल यायेगु धका अध्यक्ष नेपालं धाःगु दु।

नेपाःया लागि भारतया राजदुत नवीन श्रीवास्तव भारतीय ग्वाहालिं दयेकाच्वंगु नेपालभाषा परिषदया छेँ निरीक्षण यानादिगु दु।

उगु इलय् राजदुत श्रीवास्तवं परिषदया निर्माणाधीन छेँया सिधःगु ग्राउण्ड फ्लोर अवलोकन यानादिगु खः। वय्कःयात इन्टाकया प्रतिनिधिपिं पारोमिता डे सरकार व अनिता ताम्राकारं विस्तृत जानकारी बियादीगु खः।

उगु इलय् परिषदया साहित्यिक ज्याखँ बारे छ्याञ्जे पुष्परत्न तुलाधरं धयादीगु खः ।नेपालभाषा परिषदया छेँ २०७२ या तःभुखाचं क्षति जूगु खःसा भारत सरकार, नेपाल सरकारया पुनर्निर्माण प्राधिकरण व पुरातत्व विभाग जानाः न्हूकथं दयेकाच्वंगु खः ।

थन झी कवि चित्तधर हृदयया व्यवस्थित संग्रहालय नं दइ ।

सत्ता साझेदार दलया बैठक थौं च्वनिइगु जुगु दु। प्रधानमन्त्री निवास बालुवाटारय् थौं सत्तासाझेदार दलया अध्यक्षपिन्स बैठकय् सरकारया नीति व कार्यक्रम, मन्त्रीपरिषद् विस्तार, न्हापागु मन्त्रीपरिषद् बैठकं यागु निर्णयया प्रभावकारी कार्यान्वयन, मुख्यमन्त्रीया भागबन्डा लगायतया विषय छलफल यायेत्यःगु खः।

नाप सरकारय् सहभागी दलं छु मन्त्रालय कायेगु व ग्वम्ह कायेगु धइगु विषय न विस्तृत छलफल यायेत्यःगु खः।

ऐतिहासिक नापं सांस्कृतिक कथं महत्वपूर्ण चन्द्रागिरी नगरपालिका वडा नं. १२ या नेवाः वस्ती बलम्बुइ झिंस्वक्वःगु नेवाः एकता दिवस तजिक हनिइगु जुगु दु। बुधवाः बलम्बुइ पत्रकारपि नापलायेगु ज्याझ्वलय् नेवाः देय् दबू चन्द्रागिरी नगर समितिया नायः नारायण महर्जनं उगु खँ कनादीगु खः । वय्कलं वइगु पुष १६ गते दर्जनौं सांस्कृतिक बाजा नापं स्वनिगःया थीथी लागां द्धलंद्धःम्ह मनूत गुर्जुधाराय् मुना सांस्कृतिक बाजा सहित जुलुस पिकया बलम्बुइ वनिगु जानकारी बियादिगु खः।

उकिया नितिं थीथी लागाय् प्रचार प्रसार यायेगु ज्या जुयाच्वंगु खँ न्ह्यथसें वइगु शुक्रवाः बलम्बुइ सुकुन्दा ¥याली पिकाये त्यनागु नं कनादिगु दु। महर्जनं प्रेस विज्ञप्तिइ धयातःगु दु ‘थुगुसी झिंस्वक्वःगु नेवाः एकता दिवस तःजिक हनेगु नितिं नेवाः दबू चन्द्रागिरी नगर समिति व ज्यापु महागुथि चन्द्रागिरी नगर समितिया स्थानीय व्यवस्थापन व स्थानीय संयोजनय् जूवनाच्वंगु दु ।

नेवाः दबू केन्द्रया संयोजनय् नेवाः स्वायत्त राज्य मंकाः संघर्ष समितिइ दुथ्याःगु घटकत, नेवाः समाजया थीथी जातीय संघ संस्था, नेवाः अभियान न्ह्याका वयाच्वंगु संघ संस्था नापं दुथ्याका १३ क्वःगु नेवाः एकता दिवस हना मंकाः ग्वसाः खलःया ग्वसालय् जुइत्यःगु खः। बलम्बुइ जुइगु नेवाः एकता दिवसय् स्वनिगःया थीथी थासं ब्बति कायेत्यःगु दु। संघीय लोकतान्त्रिक गणतन्त्र नेपाः दुने पहिचानया आधारय् नेवाः स्वायत्त राज्य सुनिश्चित यायेगु हे नेवाः राजनीतिक आन्दोलनया मू आज्जु खः । मंकाः संघर्ष समितिया ग्वसालय् नेपाल संवत ११३० पोहेलाथ्व नवःमिया दिनय् येँया दशरथ रंगशालाय् लखौं लख नेवाःत मुना जनस्तरपाखें नेवाः स्वायत्त राज्य घोषणा याःगु खः ।

थिमिया बोडेय् जूगु नेवाः राष्ट्रिय राजनीतिक सम्मेलनया क्वःछिना कथं नेवाः दुने परम्परांनिसें दयावयाच्वंगु जातीय, क्षेत्रीय, सांस्कृतिक, धार्मिक अनेकता व विविधता दथुइ एकता क्वातुकेत पोहेलाथ्व नवःमिया दिं नेवाः एकता घोषणा याःगु खः । थ्व हे ऐतिहासिक दिंयात लुमंकाः नेवाः एकता दिवस हना वयाच्वंगु जुल ।

अन्तर्राष्ट्रि श्रम संगठन अभिसन्धि १६९ (आइएलओ १६९) नापं आदिवासी अधिकार सम्वन्धि संयुक्त राष्ट्र संघीय घोषणा पत्र (युएनड्रिप २००७) लगायत थीथी अन्तर्राष्ट्रिय सन्धी महासन्धीपाखें आदिवासीतय्त बियातःगु अधिकार सुनिश्चित याना कार्यान्वयन यायेमाः, भाषा आयोगया सिफारिस कथं वाग्मती प्रदेशय् नेपालभाषायात कामकाजि भाषाया रुपय् कार्यान्वयन यायेमाः, स्वनिगलय् आदिवासी नेवाःतय्गु वसोवासया समस्या समाधान यायेमाःगु नेवाःतय्गु सामुहिक भूमि, नेवाः संस्कृतिनाप स्वानाच्वंगु भूमि रक्षा यायेमाःगु नापं समग्रतय्त नेवाः भूमियात रक्षा यायेमाःगु सः थ्वयेकेगु याइ ।

थुगु ज्याझ्वलय् नेपाल आदिवासी जनजाति महासंघया नेतृत्व, आदिवास जनजाति आयोगनिसें भाषा आयोगया प्रतिनिधि तकं सहभागी जुइ ।’ देय् दबू चन्द्रागिरी नगर समिति व ज्यापु महागुथि चन्द्रागिरी नगर समितिया मंकाः ग्वसालय् उगु पत्रकार सम्मेलन जूगु खः । ज्यापु महागुथि चन्द्रागिरी नगर समितिया नायः धनवीर महर्जन, देय् दबू स्वनिगः विशेष प्रदेशया नायः श्रीकृष्ण महर्जनपिनिगु न उपस्थिति दुगु खः।