मध्यपुरथिमिइ मल्लकालीन हताः थे लुमकेगु कथं थौं खाँ पिहाँवइगु जात्रा सुरु जूगु दु।

लाय्कुया तलेजु द्यःया थाय् द्यः छेँय् खड्ग, तरबार, ढाल, युद्धकवज लगायत मल्लकालीन युद्धय् छ्यलिइगु साधन ज्वना युद्ध कला प्रदर्शन याइगु उगु जात्रा क्वचाःगु दु।

दरबारनाव स्वापू दुगु खाँ पिहाँवइगु जात्राय् गुथीयारपिन्स जामा फिना खड्ग, ढाल व तरबार ल्हातय् ज्वना थीथी त्वालय् तत्कालीन युद्धकला प्रदर्शन याइगु खः। तत्कालीन दरबारपाखे पिकाइगु थुगु जात्रा थहनेया त्वाः इनाए त्वाः, निगु पूखु जुया दिगु भैरव तक व क्वहनेया त्वाः रूपय् दथु त्वाः जुया बालकुमारी तक प्रदर्शन याइ।

थुगु जात्रा मोहनीया नवमी कुन्हु तलेजु द्यःया थाय् बिःगु बलि व कोत दुने द्यः व दरबारया राजदण्डयात दुथ्याका देँय् चाःहिकिइ याइ ।

विशेष याना थुगु जात्राय् नायः पःमां (तत्कालीन दरबारका प्रशासक, श्रेष्ठ थर), कर्माचार्य, जोशी, कुटु, प्याथः (प्रजापति), खड्गी समुदायपि दुथ्याइ।

किपा सुरेश खाक्वः श्रेष्ठ

मदिक्क वाः वयाच्वंगु कारण नारायणी लः थहावया त्रिवेणीया गण्डक ब्यारेजय् २२ गु लुँखा चायकूगु दु।

थौं चान्ह्यः नारायणी खुसिइ जलसहत थहावःगुलि जोखिमपाखे मध्यनजर यासे गण्डक ब्यारेजया ३६ गु लुँखा मध्ये २२ गु लुँखा चायकूगु दु धका इलाका प्रहरी कार्यालयया प्रहरी नायब निरीक्षक रजिन रानां जानकारी बिःगु दु।

थौं सुथय् ७ बजे नारायणी खुसिया ब्यारेजय् लःया सतह २ लाख ४० हजार क्युसेक थ्यःगु खः। गण्डक ब्यारेजय् २ लाख ५० हजार क्युसेक लः थ्यःनकि चेतावनीया तह व ३ लाख क्युसेक लः थ्यनकि खतराया तह माने याइ।

लःया सतहं चेतावनीया तह पार याये न्ह्यः हे ब्यारेजया २२ गु लुँखा चाय्कूगु खः। बाढी सूचना केन्द्रं नारायणी खुसिइ जलाधार क्षेत्रय् थप वाः वइगु पूर्वानुमान यासे नवलपरासी व चितवनया तटीय क्षेत्रय् थौं बहनितक सतर्कता नाप सुरक्षित थासय् वनेत इनाप याःगु दु।

असं त्वालय् थौं न्हिनय् पायो पिहावइगु जुगु दु।

मेमेगुु त्वालय् दशमी कुन्हु पायो पिहावइगु खःसा असनय् च्वपिन्स दशमीकुन्हु सुलं च्वनाः एकादशि कुन्हु तिनि चालं यायेगु याइ।

असं त्वालय् उराँयपिन्स पायो पिकायेगु परम्परा दु। उगु पायो थौं हिनय् २ ताः इलय् असंया बाकुननी पायो पिहावइ।

मोहनीया चालं कुन्हु येँया थीथी थासं पायो पिहावःगु दु।

मोहनीया दशमी कुन्हु येँया यतखा त्वालं न पायो दु।

किपा पद्मसागर कक्षपतिया फेसबुकपाखे

मदिक्क वाःवया चित्तवनया नारायणी खुसिइ सतर्कताया तह पार जूगु दु।

जल तथा मौसम विज्ञान विभागया बाढी सूचना केन्द्रं थौं सुथय् ६ः२० बजे बिःगु जानकारी कथं देवघाट बाढी मापन केन्द्रय् लःया सतह सतर्कताया तह पार जूगु दु ।

नारायणी जलाधार क्षेत्रय् अझ न वाः वया च्वंगुलि लःया सतह अप्पोया वंगुलि उगु थासय् जोखिमया सम्भावना दु धका धाःगु दु।