डेंगू संक्रमणं २१ म्ह सी धुकुगु दु धका इपिडिमियोलोजी नाप रोग नियन्त्रण महाशाखां धाःगु दु। आःतकया तथ्यां कथं असोज ३ गतेतक संक्रमित जूपि १७ हजार ४९४ म्ह थ्यःगु दु।

आःतकया तथ्यांक कथं दकलय् अप्पो ४ हजार ८७८ म्हेसित संक्रमण पुष्टि जुइ धकुगु दु सा येँ ४ हजार ६७४, ख्वपय् ७१३ म्ह याना स्वनिगः दुने डेंगू संक्रमित जूपि १० हजार २६५ म्ह थ्यःगु दु।

अथेहे, मकवानपुरय् दकलय् अप्पो १ हजार ६१० म्हेसित संक्रमण जुगु दु। दाङय् १ हजार १४९, रुपन्देहीइ ६७९, चितवनय् ४२९, गुल्मीइ २९२, दार्चुलाय् १९२ व काभ्रेय् १५६ म्हेसित संक्रमण पुष्टि जुइ धुकुगु दु।

मेमेगु जिल्लाय् संक्रमित जूपिनिगु ल्याः १०० म्ह स्वया म्हो जुगु धका महाशाखाया तथ्यांकं धाःगु दु।

लुँया भाः थौं तोलां प्यसः थहावंगु दु। लुँ तोलां प्यसः थहावना ९१ हजार ८ सय रुपैयाँ निर्धारण जुगु दु धका नेपाल सुनचाँदी व्यवसायी महासङ्घं धाःगु दु।

अथेहे, वहः तोलां न न्यातका थहावंगु दु। वहः तोला न्यातका थहावना १ हजार १ सय ८० रुपैयाँ न कारोबार जूगु दु धका महासङ्घं धाःगु दु।

सत्ता गठबन्धनया दलपिन्स प्रत्यक्षपाखे सीट भागबण्डाय् सहमति यायेगु निति हाकन छलफल न्ह्याकूगु दु।

सोमबाः समानुपातिकया धलः निर्वाचन आयोगय् बुझे याये धुकुगु दु सा सत्ता गठबन्धनया दलपिन्स प्रत्यक्षय् भागबण्डाया लागि हाकन छलफलय् निरन्तरता बिःगु खः।

सत्ता गठबन्धनया शीर्ष तहया नेतापिनिगु सिट बाँडफाँट कार्यदलया बैठक अः प्रधानमन्त्री निवास बालुवाटारय् जुयाच्वंगु दु।

प्रधानमन्त्री शेरबहादुर देउवां जनताया चाहना कथं नेपाःया संविधानं वंगु इलय् नेपाःया समाजय् छुवाछूत, विभेद व उत्पीडन थे जाःगु सामाजिक विकृति नाप विसङ्गतियात अन्त्य याःगु धका उल्लेख याःगु दु।

नाप वयकलं संविधानं जातीय, भाषिक, धार्मिक, सांस्कृतिक नाप भौगोलिक विविधतायुक्त नेपाःया समाज निर्माण याःगु बृहत् राष्ट्रिय एकताया सूत्रय् आबद्ध याःगु दु धका धयादीगु दु।

च्याक्वःगु संविधान दिवस नाप राष्ट्रिय दिवसया लसताय् सकलं नेपाःमिपिन्त भिंतुना बिइगु झ्वलय् वयकलं देशय् शासकीय सुधारया लागि थीथी इलय् जुगु लोकतान्त्रिक आन्दोलनय् न्ह्यलुवाः जुया भूमिका निर्वाह यायेगु झ्वलय् थःगु अमूल्य जीवन उत्सर्ग यानादीपि सकलं ज्ञातअज्ञात शहीदप्रति उच्च सम्मान यानादीसे श्रद्धाञ्जली अर्पण याःगु दु।

उपराष्ट्रपति नन्दबहादुर पुनं संविधान पालनाय् छु भचा चुनौती खनेदुगु दु धका धयादीगु दु। तर न संविधान कार्यान्वयनया अवस्था सन्तोषजनक दु धका वयकलं धयादीगु दु।

संविधान दिवसया लसताय् भिंतुना बिइगु झ्वलय् वयकलं समृद्ध राष्ट्र व समतामूलक समाज निर्माणया लागि संविधानं पूर्ण पालना, संरक्षण व संवद्र्धन अनिवार्य सर्त जुगु धका उल्लेख यानादीगु दु।

संविधान कथं निकःतक स्थानीय तहया निर्वाचन क्वचाःगु धका धयादीसे वयकलं संविधान गतिशील दस्तावेज जुगलि संविधान दुने च्वना थुकियात अझ न समृद्धि दयका यंकेमाः धका धयादीगु दु।

उपराष्ट्रपति पुनं संविधान कार्यान्वयनय् महत्वपूर्ण पक्षया रुपय् दुगुलि वइगु प्रतिनिधिसभा व प्रदेशसभाया निर्वाचनयात महान् उत्सवय् रुपं कया ब्बति कायेत सकल नेपाःमि दाजुकिजा तता केँहपिन्त इनाप यानादीगु दु।