कलाकार मानकृष्ण वाःवाः मन्त । कलाकार मानकृष्ण जँलास्ये ल्वय् जुगुलिं ताः ई न्ह्यः निसें वासः यानाः छेँ आराम यानाच्वगु खः।

वयकः थौं सुथय् मदुगु खः। नेपालभाषाया संकिपाय् अभिनय यानादिम्ह “वाःवाः” इमेज च्यानलया ख्वताबजि टेलिसिरियलय् “देयपाः बिइला” धइगु डायलगं तसकं लोकह्वाःगु खः।

वयकः जनबहाया भजन पुचःया नं सक्रिय ब्यक्ति खः। वयकःया अन्तिम संस्कार थौं मंगलवाः न्हिनय् शोभाभगवती लुुँतिइ जुइत्यंगु दु ।

निगु देय्या लागि नियुक्त जूपि राजदूतपिन्स थौं सोमबाः शपथ काःगु दु।

म्यानमारया लागि नेपाली राजदूत हरिश्चन्द्र घिमिरे व मलेसियाया लागि नेपाली राजदूत डिल्लीराज पौडेलं राष्ट्रपति विद्यादेवी भण्डारी समक्ष पद व गोपनीयताया शपथ ग्रहण याःगु दु।

शपथ समारोहय् नेपाः सरकारया उच्च पदस्थ कर्मचारीपिनिगु न ब्बति दुगु खः।

वंगु २४ घण्टाय् दुने थप १७९ म्हेसित कोरोना संक्रमण पुष्टि जूगु दु। अथेहे छम्हेसिगु ज्यान वंगु दु।

स्वास्थ्य तथा जनसंख्या मन्त्रालयया कथं ४ हजार ९५९ म्हेसिगु परीक्षण याउगुलि १७९ म्हेसित संक्रमण पुष्टि जुगु खः।

स्वास्थ्य मन्त्रालयया कथं २ हजार ६०० म्हेसिगु पीसीआर परीक्षण याःगुलि १२७ म्ह व २ हजार २५९ म्हेसित एन्टिजेन परीक्षण याःगुलि ५२ म्हेसित संक्रमण जूगु दु धका मन्त्रालयं धाःगु दु।

अथेहे कोरोना भाइरसया सक्रिय संक्रमितपि २ हजार २७१ म्ह थ्यःगु दु। वंगु २४ घण्टाय् १७१ म्ह संक्रमणमुक्त जूगु दु।

येँ महानगरपालिकां पालिकादुने दुगु दक्को सामुदायिक विद्यालयया बाः पुलेत पौं छ्वःगु दु।

विद्यालयया सम्पती बाः बिया आय आर्जन यानाच्वंगु धासे १० प्रतिशत कर पुलेत विद्यालयय् परिपत्र याःगु दु धका शिक्षा अधिकृत रामप्रसाद सुवेदीं जारी याःगु पतिइ उल्लेख याःगु दु।

भाषा आयोगया सिफारिस कथं नेपालभाषा व तामाङ भाषायात वाग्मती प्रदेशया सरकारी कामकाजि भाषाया रुपय् लागू यायेगु नितिं वागमती प्रदेशया सोमवाः च्वंगु मन्त्रिपरिषदया मुँज्यां स्वम्ह सदस्यया कार्यदल निस्वनेगु निर्णय याःगु दु ।

भाषा आयोगया सिफारिस कथं ज्या न्ह्याकेत वागमती प्रदेशया राजधानी हेटौंडाय् च्वंगु मन्त्री परिषदया मुँज्यां उगु कथं खँ क्वःछिउगु खः । कार्यदलय् औपचारिक रुपं सु सु च्वनादीगु दु धइगु खँ मंगलवाः तकया दुने सार्वजनिक याइ धकाः धाःगु दु । नेवाः देय् दबू स्वनिगः विशेष प्रदेश, नेपाल तामाङ घेदुङया वागमती प्रदेश व नेवाः देय् दबूयाया वागमती प्रदेश समितिपाखें मदिक्क थुगु मुद्दायात ल्ह्वंना दबावमुलकनिसें थीथी ज्याझ्वः याना वयाच्वंगु खः।

मुख्य मन्त्री राजेन्द्रप्रसाद पाण्डें छुं दिं न्ह्यः बियादीगु बचं कथं हे आः कार्यदल दयेकेगु ज्या यानादीगु धैगु तसकं बांलात धकाः नेवाः देय् दबू स्वनिगः विशेष प्रदेशया नायः श्रीकृष्ण महर्जनं धयादीगु दु । आः नेपालभाषा व तामाङ भाषायात कामाजि भाषाया रुपय् लागू याकेगु नितिं नं नेवाः व तामाङत मदिक्क जाना वनेमाःगु अवस्था दु धकाः नं वयकलं धयादीगु दु ।