मेलम्ची खानेपानी आयोजनां स्वनिगलय् थौंनिसे लः वितरण याइगु जुगु दु।

खानेपानीमन्त्री उमाकान्त चौधरीं महाँकालय् च्वंगु काठमाण्डौ उपत्यका खानेपानी लिमिटेडं वितरण केन्द्रपाखे ताचाः चायेका लःत्वनिइगु जुगु दु ।

मेलम्ची खानेपानी आयोजनाया कार्यकारी निर्देशक कमलराज श्रेष्ठया कथं स्वनिगः दुने झीगः दयकेमाःगुलि गुुगः दयेकेगु ज्या क्वचाये धुकुगु दु। मेगु ख्वपया कटुञ्जेय् लःया ट्याङ्की निर्माणाधीन अवस्थाय् दु।

आयोजनाया कथं आरुबारी, महाँकाल चौर, बाँसबारी, पानीपोखरी, बालाजु व यलया खुमलटारय् ट्याङ्की निर्माण याये धुकुगु दु। उगु ट्याङ्कीइ ७४ हजार ५ सय घनमिटर लः सङ्कलन जुइ।

नेवाः न्ह्यलुवाः नाप मानव अधिकारवादी नेता पद्मरत्न तुलाधरया नामं निस्वनातःगु ‘पद्मरत्न मानव अधिकार नाप शान्ति सिरपाः’ थुगु दँय् नेवाः न्ह्यलुवा मल्ल के. सुन्दरयात बीइगु जूगु दु ।

मानव अधिकार दिवसया लसताय् ह्युमेन राइट्स म्याग्नेटिकपाखें याइगु छगू ज्याझ्वलय् उगु सिरपाः लःल्हाइगु ग्वसाः दु ।

मदुम्ह तुलाधरया छेँजःपिनि सक्रियताय् लःल्हाइगु थ्व सिरपाः ५० द्वः तकाया खः ।

काठमाडौं उपत्यका खानेपानी लिमिटेड (केयूकेएल) न कन्ह्यःनिसे मेलम्चीया लः हितिइ वइगु जुगु दु।

खुसिवः वइगुलि खुला तक बन्द जूगु लः आः वितरण यायेत्यःगु खः। केयूकेएलया प्रवक्ता प्रकाश कुमार राई न चाबहिलया महाँकालचौर याउगु लः ट्यांकीपाखे वितरण सुरु यायेगु जानकारी बिःगु दु।

वयकःया कथं कन्ह्यः सुथय् साढे ८ बजेनिसे लः हितिइ छ्वया हइगु जुगु दु धका धाःगु दु। “आः ट्यांकीइ लः वये धुकुगु दु। कन्ह्यः सुथय् निसे वितरण यायेगु जुइ।

आः निन्हु प्यन्हु लिपा हे १७ करोड लिटर लः स्वनिगलय् वितरण जुइ,” धका प्रवक्ता राई न धाःगु दु। केयूकेएलया कथं स्वनिगलय् न्हि करिब ४३ करोड लिटर लःया माग दु ।

मेलम्चीया लः न करिब ४० प्रतिशत आपूर्ति जुइ ।

प्रधानमन्त्री शेरबहादुर देउवां ज्यापु समुदाया परम्परा, कलाकृति व रहनसहनया संरक्षण यायेगु मंका दायित्व खः धका धयादीगु दु।

थौं बिहीवाः ज्यापु संस्कृति विकास कोषं १९ क्वःगु राष्ट्रिय ज्यापु दिवसया लसाताय् येँया बसन्तपुरय् जूगु छगु ज्याझ्वलय् न्ववायेगु झ्वलय् प्रधानमन्त्री देउवां ज्यापु समुदायया धार्मिक, सांस्कृतिक परम्परा, कलाकृति, शिल्प व रहनसहनया संरक्षण यायेगु मंकाः दायित्व खः धका धयादीगु खः।

प्रम देउवाः ज्यापु समुदायया जात्रा, नखः, सांस्कृतिक ज्याझ्वः, कला राष्ट्रया तिसाः खः धका धयादीगु खः। वयकलं धयादीगु दु, ‘स्वनिगः कला, संस्कृति व सभ्यताया बिकासय् ज्यापु समुदायया उल्लेखनीय योगदान दु । ज्यापु समुदायया जात्रा, नखः, सांस्कृतिक गतिविधि, कला, कौशल नेपाःया गौरव खः।

स्वनिगःया ज्यापु समुदायपिनिगु न्युनतम आर्थिक व नैतिक सुविधाया दथुइ थःपिनिगु मौलिक परम्परा व संस्कृतियात ल्यकातःगु ज्याया प्रशंशा यानादीगु खः । प्रधानमन्त्री देउवां कृषि अर्थतन्त्रया विकासय् न ज्यापु समुदायया महत्वपूर्ण भूमिका दू धका धयादीगु खः।

शेयर बजाः थौं बुधवाः न कुहावःगु दु।

शेयर बजाः परिसूचक नेप्से थौं १६ दशमलव ६१ अङ्कं घटे जूया १ हजार ९ सय १७ दशमलव २८ विन्दुइ कुहावःगु दु।

थौं दक्को समूहया शेयर कुहावःगु दु। बजाः कुहावःसा कारोबार रकम धासा थहावःगु दु। २ सय ४६ गु कम्पनीया ८० लाख ९२ हजार कित्ता शेयर १ अर्ब ६५ करोड ४६ लाख रुपैयाँ न कारोबार जुगु दु।

दकलय् अप्पो सानिमा बैंकया प्रमोटर शेयर ६७ करोड रुपैयाँ व शिवम् सिमेन्टया शेयर १३ करोड ८५ लाख रुपैयाँया किनबेच जूगु दु। थौं नदीप लघुवित्तयो शेयर १० प्रतिशत व ग्लोबल आईएमई बैंकया शेयर साढे ९ प्रतिशतं घटे जूगु दु।

समग्र बजाः कुहावसा खप्तड लघुवित्तया शेयर खुगु प्रतिशतं थहावःगु दु ।