शेयर बजारय् थौं बिहीवाः निगु ल्याखं थहावःगु दु। शेयर बजार परिसूचक नेप्से थौं ११ दशमलव २२ अङ्कं थहावना १ हजार ९ सय ६१ दशमलव शून्य ६ विन्दुइ थ्यःगु दु।

थौं होटल व निर्जीवन बीमाबाहेक दक्को समूहया शेयर सामान्य थहावःगु दु। थौं कारोबार रकम धका म्हो खनेदु। २ सय ४१ गु कम्पनीया ३८ लाख ६५ हजार कित्ता शेयर १ अर्ब ३२ करोड २९ लाख रुपैयाँया कारोबार जूगु दु।

दकलय् अप्पो नबिल बैंकया १४ करोड ४५ लाख रुपैयाँया शेयर किनबेच जूगु दु । नेप्से परिसूचक थहावसा धौलागिरि लघुवित्तया शेयर १० प्रतिशत व श्वेत गंगा हाइड्रो कम्पनीया शेयर ९ प्रतिशतं थहावःगु दु।

नेपाली कांग्रेसया वरिष्ठ नेता रामचन्द्र पौडेलं प्रधानमन्त्रीइ थःगु दाबेदारी स्वाभाविक खः धका धाःगु दु।

नेपाल प्रेस युनियन चितवनं थौं बिहीबाः चितवनय् याःगु पत्रकार सम्मेलनय् वरिष्ठ नेता पौडेलं कांग्रेसया नेतृत्वय् गठबन्धनया सरकार व उकिया नेतृत्व याये दयेमाःगु स्वाभाविक माग खः धका धाःगु खः।

‘गठबन्धनय् बहुमत गाः। गठबन्धनया सरकार जुइ। दल दथुइ सल्लाह जुयाच्वंगु दु,’ धका धयादीसे, ‘जि प्रधानमन्त्रीया स्वाभाविक उम्मेदवार खः । आः प्रधानमन्त्रीया उम्मेदवार जि हे खः।’ 

स्याङ्जा २ य् काग्रेसया उम्मेदवार धनराज गुरुङं ६ हजार ६५ मत हया न्ह्यने लानाच्वंगु दु।

अथेहे एमाले उम्मेदवार पदमा अर्यालं ४ हजार ७६५ मत हःगु दु। गुरुङ व अर्यालया दथुइ १ हजार ३०० मत फरक जुयाच्वंगु दु।

राष्ट्रिय स्वतन्त्र पार्टीका टिकराज गुरुङं १ हजार ५७५ मत हःगु दु। नेकपा एमालें धाँधली जुगु धासे हाकन मतदानया माग यासे १२ दिं निसे मतगणना दिनाच्वंगु खः।

निर्वाचन आयोगं हाकन मतदान मयायेगु निर्णय यायेवं बुधबाः चान्ह्यनिसे जक मतगणना सुरु जूगु खः।

सुनसरी क्षेत्र नम्बर ४ य् कांग्रेस उम्मेदवार ज्ञानेन्द्रबहादुर कार्की विजयी जूगु दु।

सञ्चारमन्त्री तक जुयादीम्ह कार्की एमाले उम्मेदवार जगदीशप्रसाद कुसियैतयात पराजित यासे विजयी जूगु खः।

निर्वाचन आयोगं आधिकारिक रूपं विजयी घोषणा याये धाःसा ल्यःदनिइ। सञ्चारमन्त्री कार्की कुसियैत स्वया ११२ मत अप्पो हया विजयी जूगु खः।

कार्की न ३० हजार ४ सय ८३ मत हःगु खःसा। एमाले उम्मेदवार कुसियैत न ३० हजार ३ सय ७१ मत हःगु खः।

प्रतिनिधिसभा सदस्यतया लागि जुयाच्वंगु सुनसरी क्षेत्र नम्बर ४ य् एमालेया जगदिशप्रसाद कुसियैत न्ह्यने लानाच्वंगु दु।

उगु थासय् नेपाली कांग्रेस व नेकपा एमाले दथुइ कडा प्रतिस्पर्धा जुयाच्वंगु दु ।

लिपागु मतपरिणाम कथं एमालेया उम्मेदवार कुसियैत २९ हजार ९६६ मत हया न्ह्यने लानाच्वंगु दु। अथेहे नेपाली कांग्रेसया ज्ञानेन्द्रबहादुर काकी न २९ हजार ९३९ मत हःगु दु ।