लुँ तोलां थौं स्वसः थहावंगु दु। नेपाल सुनचाँदी व्यवसायी महासंघया कथं लुँ तोलां स्वसः थहावना छापवाल लुँ तोलां ९४ हजार रुपैयाँ न कारोबार जूगु दु धका धाःगु दु।

अथेहे वहः तोलां झीतका थहावंगु दु। वहः झीतका थहावना तोलां १ हजार १२५ रुपैयाँ कारोबार जुगु दु धका धाःगु दु।

सिक्लेस हाइड्रोपावर लिमिटेडं बुधबाःनिसे आयोजना धितोपत्रय् प्राथमिक सार्वजनिक निष्कासन (आईपीओ) बिक्री खुल्ला याइगु जुगु दु।

कम्पनीं आयोजना प्रभावित क्षेत्रय् च्वपिनिगु लागि धितोपत्रया सार्वजनिक निष्कासन याना आः सर्वसाधारणया लागि आवेदन माग यायेत्यःगु खः।

कम्पनीं प्रतिकित्ता १०० रुपैयाँ अंकित भाः ११ करोड ५० लाख रुपैयाँया ११ लाख ५० हजार कित्ता सेयर सार्वजनिक निष्कासपाखे बिक्री यायेत्यःगु खः।

उकि मध्ये ३ प्रतिशत अर्थात ३४ हजार ५०० कित्ता सेयर कम्पनीया कर्मचारीपिन्त व ५ प्रतिशत अर्थात ५७ हजार ५०० कित्ता सेयर सामूहिक लगानी कोषया लागि सुरक्षित यायेत्यःगु खः।

ल्यः दनिइगु १० लाख ५८ हजार कित्ता सेयरया लागि सार्वजनिक निष्कासन मार्फत आवेदन माग यायेगु तयारी यागु दु। कम्पनीं आईपीआ याकन २ भदौ व उगु इलय् पर्याप्त आवेदन मवःसा १२ भदौ तक थप याइगु जुगु दु।

स्वनिगः अटो प्रा.लिं नखःया लसताय् इलेक्ट्रीक बाइक व स्कुटीइ थीथी अफर ब्यूगु दु । स्वनिगः इन्भेस्टमेन्ट ग्रुप अन्तर्गतया स्वनिगः अटो प्रा.लिं. महाराजगंज नारायण गोपाल चोकय् चायेकूगु शोरुमपाखें इलेक्ट्रीक बाइक व स्कुटीइ अफर ब्यूगु खः ।

शोरुमया उलेज्यालिसें नखःया लसताय् शोरुमपाखें जुइगु प्रत्येक खरीदय् ८ हजार तका क्यासब्याकया सुविधा ब्यूगु दु । लिसें प्योर कम्पनीया हेलमेट, टिसर्ट, क्याप, कीचेन व विनचिटर उपहारया अफर नं तयातःगु दु ।

पुलांगु पेट्रोलया बाइक वा स्कुटीलिसे एक्सचेन्जया यायेबलय् पुलांगु साधनया रीसेल भावय् ८ हजार तका थप नं बीगु जूगु दु । थुगु अफरत वइगु अक्टोबर २६ तक लागू जुइ ।

छुं दिं न्ह्यः तिनि हे छगू ज्याझ्वः यासें स्वनिगः अटोया शोरुम उलेज्या याःगु खः । स्वनिगः इन्भेस्टमेन्टया नायः सुरेश प्रधानं रिबन चानाः शोरुमया विधिवत् उलेज्या यानादीगु खः ।

स्वनिगः अटोया प्रमुख कार्यकारी अधिकृत विनय श्रेष्ठं थःपिन्सं उच्च गुणस्तर व उच्च क्षमताया भारतीय इलेक्ट्रीक स्कुटी व बाइक हयागु धयादिल । थुकिया परफमेन्स व क्वालिटीया ल्याखं भाः नं अप्वः मजूगु प्रमुख कार्यकारी अधिकृत श्रेष्ठया धापू दु ।

‘जिमिके भारतया प्योर कम्पनीलिसें ग्रिन फ्यूचर कम्पनीया इलेक्ट्रीक स्कुटी व बाइक दु । ग्रिन फ्यूचरया ट्र्याकसन स्कुटीइ ला ब्याक गियर तकं दु, स्कुटी व बाइकया क्वालिटीया ल्याखं थ्व बाइक तसकं दं’ अधिकृत श्रेष्ठं धयादिल ।

आः थुगु शोरुमय् १५सःनिसें २२सः वाटतक्कया स्कुटी व बाइक उपलब्ध दु । उगु स्कुटी व बाइकया मू १ लाख ९९ हजारनिसें ३ लाख ९९ हजारतक्क दु । याकनं हे इलेक्ट्रिक साइकल नं हयेत्यनागु श्रेष्ठं जानकारी बियादिल ।

थःपिन्सं न्यूनतम ब्याजदरय् फाइनान्सया सुविधा तकं बियाच्वनागु स्वनिगः इन्भेस्टमेन्टया शेयर होल्डर कजि दिपक तुलाधरं जानकारी बियादिल ।

याकनं हे कम्पनीया शाखात विस्तार यानावनेगु योजनाय् थःपिं दुगु व येँया पुलांगु बस्ती दुने शाखाया नितिं थाय् स्वयाच्वनागु तुलाधरया धापू दु । वयां लिपा येँया मेमेगु थाय् व ख्वपय् नं शाखा विस्तार यायेगु योजनाय् थःपिं दुगु तुलाधरं धयादिल ।

संस्कृति, पर्यटन नाप नागरिक उड्डयन मन्त्री जीवनराम श्रेष्ठं सुरक्षागार्डयात ज्वंगु घटनायात कया सत्यतथ्य थुइका जक प्रतिक्रिया बिइत इनाप याःगु दु।

लाइनय् च्वनेत इनापयाम्ह सुरक्षागार्डयात मन्त्रीं तपिक आदेश बिया प्रहरीं ज्वकूगु धका आलोचना जुयाच्वम्ह मन्त्री श्रेष्ठं घटनाबारे सत्यतथ्य थुइका जक प्रतिक्रिया बिइत इनाप याःगु दु।

वयकलं सामाजिक सञ्जाल फेसबुकपाखे उगु घटनाय् लाइनय् मच्वसे मखुसे थःगु अङ्गरक्षकयात दुर्व्यवहार याःगु कारण धका दाबी यानादीगु खः। मन्त्री श्रेष्ठं दक्को नेता व मन्त्री खराब खः धका धायेकेगु षड्यन्त्र जुयाच्वंगु धयादीसे थुगु पाखे सजक जुइत इनाप याःगु दु। मन्त्रीनाप विवाद जुइवं सुरक्षागार्डयात न्यान्हुया निति कूगु दु।

वयकलं थःथगु फेसबुकय् च्वयादीगु दु, ‘छायाँ सेन्टरय् जुगु घटनाबारे पब्लिकपाखे वःगु प्रतिक्रियाय् जिगु गम्भीर ध्यानाकर्षण जूगु दु । पब्लिकया प्रतिक्रिया स्वाभाविक खः, तर उगु घटना लाइनये मच्वसे मखु जितः व जिगु सेक्युरिटीयात दुर्व्यवहार याःगुलि सेक्युरिटीं थःगु निकाययात जानकारी याःगु खः। घटनाबारे सत्य तथ्य थुइका जक प्रतिक्रिया बिइत व दक्को नेता व मन्त्री खराब खः धइगु भाष्य निर्माण यायेगु षड्यन्त्रप्रति चनाखो जुइत इनाप याये।’