दोलखाय् जुयाच्वंगु मतगणनाय् नेकपा एमालेया उम्मेदवार बालकृष्ण शिवाकोटी व नेकपा माओवादी उम्मेदवार गंगा कार्की दथुइ कडा प्रतिस्पर्धा जुयाच्वंगु दु।

ओराङ क्षेत्रया मतगणना एमाले उम्मेदवार शिवाकोटी माओवादीया कार्की स्वया ३६ मतं न्ह्यने लानाच्वंगु दु। शिवाकोटीं आःतक ३३ हजार ९३९ व कार्की न ३३ हजार ९०३ मत हये धुकुगु दु।

ओराङया मत ल्यायेगु न्ह्यः कार्की ११४ मतं न्ह्यने लानाच्वंगु खः।

लुँ वहःया भाः लगातार थहावना च्वंगु दु। लुँ तोलां थौं न्यासः थहावःगु दु।

लुँ तोला थौं न्यासः ९९ हजार ५ सय रुपैयाँ न कारोवार जुगु दु धका नेपाल सुनचाँदी व्यवसायी महासङ्घं धाःगु दु।

अथेहे, वहः तोला न थौं नीन्यातका थहावःगु दु।

वहः तोलां नीन्यातका थहावना १ हजार ३ सय ७० रुपैयाँ न कारोबार जुगु दु धका महासङ्घं धाःगु दु।

शेयर बजार थौं सामान्य थहावःगु दु। शेयर बजार परिसूचक नेप्से थौं आइतवाः २ दशमलव १६ अङ्कं थहावना १ हजार ९ सय ६३ दशमलव २२ विन्दुइ थहावःगु दु।

थौं फाइनान्स, विकास बैंक, उत्पादन व माइक्रोफाइनान्स समूहया शेयर सामान्य घटे जूसा मेमेगु समूहया शेयर थहावःगु दु। नेप्से सामान्य थहावःगु दिं २ सय ४३ गु कम्पनीया ३६ लाख ९४ हजार कित्ता शेयर १ अर्ब ५६ करोड १७ लाख रुपैयाँया कारोबार जूगु दु।

दकलय् अप्पो नबिल बैंकया १९ करोड ८० लाख रुपैयाँया शेयर किनबेच जूगु खः। थौं दकलय् अप्पो धौलागिरि लघुवित्तया शेयर १० प्रतिशत नाप खप्तड लघुवित्त व ओरियन्टल होटलया शेयर खुगु प्रतिशत स्वया अप्पो थहावःगु दु।

समग्र बजाः थहावःसा नेस्डो समृद्ध लघुवित्तया शेयर खुगु प्रतिशत व नबिल बैंकया शेयर साढे ३ प्रतिशतं घटे जुगु दु।

दोलखाया प्रदेश सभा २ य् नेकपा एमालेया भरतबहादुर केसी निर्वाचित जूगु दु।

मुख्य निर्वाचन अधिकृतया कार्यालय दोलखाया कथं केसी १९ हजार ४१४ मत हया प्रदेश सभा सदस्यय् निर्वाचित जूगु खः।

निकटत प्रतिद्वन्द्वी नेपाली कांग्रेसया बर्मा लामां १७ हजार ५९५ मत हःगु खः।

नेकपा एमालेया नेता नाप काभ्रे २ पाखे निर्वाचित सांसद गोकुल बाँस्कोटाया ख्वपय् च्वंगु छेँय् न्ह्यने शंकास्पद वस्तु लुइवं नेपाली सेनां डिस्पोज याःगु दु।

प्रेसर कुकरय् तयातःगु शंकास्पद खनेदुगुलि उगु वस्तु सेनाया बम डिस्पोजल टोलीं निष्क्रिय यासे जिल्ला प्रहरी परिसर, ख्वपया एसपी प्रजित केसीं धाःगु दु। उगु कुकरय् च्वंगु विष्फोटक पदार्थ मखु धका नेपाली सेनाया सहायक रथी नारायण सिलवालं धाःगु दु।

सिलवालया कथं शंकास्पद वस्तु नाप नेपाःया राष्ट्रिय ध्वाँय् व भचा पर्चा लुगु खः । प्रहरीया कथं छगु पर्चाय् कार्य मोर्चाया नामय् ‘स्वनिगलय् तधःपि नेतापि लिना छ्वयेगु’ धका उल्लेख यानातःगु दु।