स्वनिगःया नेवाःतय्सं दँय्दसं हना वयाच्वंगु सायाः नखः थुगुसिइ किपुलिइ तःजिक हनेत ताःलाःगु दु ।

किपूया थीथी तणवालं दँय् छकः पाः कयाः हना वयाच्वंगु सायाः नखः थुगुसिइ किपू ९ वडाया बादेय्गां त्वालं पाः कयाः धेंधेंपापां प्याखँ थाचिना देय् चाःहिकूगु खः । सायाः नखः तःजिक हनेत ग्वाहालीयापि दाता व संघ, संस्थातयात बादेय्गां त्वालय् समापन ज्याझ्वः यासे धेंधेंपापां प्याखँ हूपिं, स्यनादीपिं गुरूपिं, आर्थिक ग्वहाली याःपिं व ग्वसाः खलःया समितिइ च्वनां मदिक्क ज्यायापिन्त हंगु खः ।

यें १० नं. क्षेत्रया सांसद राजेन्द्रकुमार केसीया मू पाहाँसुइ न्ह्याःगु ज्याझ्वलय् विशेष पाहाँ किपू नगरपालिकाया उपमेयर शुभलक्ष्मी शाक्य नाप १, ३, ९ व १० वडाध्यक्षपिं हिरालाल महर्जन, सुविन्द्र महर्जन, दिनेश श्रेष्ठ व नरेश महर्जनलिसें बाजं व प्याखँ गुरूपिनी नं ब्वति दुगु खः ।

ग्वसाः खलःया कजि श्रीकृष्ण महर्जनया सभाध्यक्षताय् न्ह्याःगु ज्याझ्वलय् ल्यू छ्याञ्जे निलेश नकःमिं सायाः नखः हनेत चन्दापाखें ९ गू लख ध्यबा मुंगु खँ कंसें ५ गू त्याः लख खर्च जूगु व ल्यं दनिगु ध्यबा अक्षय कोष दयेकाः तयेगु खँ कनादिगु खः।

भारतीय सेनाया प्रमुख जनरल मनोज पाण्डे थौं नेपाः भ्रमणय् वयेत्यःगु दु।

नेपाली सेनाया प्रधानसेनापति प्रभुराम शर्माया ब्बनाय् न्यान्हु भ्रमणया लागि थौं बहनि येँ वयेत्यःगु दु। भ्रमणया झ्वलय् राष्ट्रपति विद्यादेवी भण्डारीपाखे पाण्डेयात नेपाली सेनाया मानार्थ महारथी याःगु दर्ज्यानी चिं लःल्हाइगु ज्याझ्वः दु।

नेपाः व भारत दथुइ सन् १९५१ निसे छगु देय्या सेनाप्रमुखपाखे मेगु देय्या प्रमुखयात मानार्थ महारथीया दर्जा लल्हायेगु प्रचलन दु।

नेपाः च्वनेगु झ्वलय् प्रधानमन्त्री शेरबहादुर देउवा, प्रधानसेनापति शर्मा लगायतपि नाप भेटवार्ता यायेगु ज्याझ्वः दु।

वंगु २४ घण्टाया दुने देयन्यक २०० म्हेसित कोरोना भाइरस (कोभिड–१९) या संक्रमण पुुष्टि जूगु दु।

अथेहे निम्हसिगु ज्यान वंगु दु। स्वास्थ्य तथा जनसंख्या मन्त्रालयया कथं देयन्यक ३५३७ म्हेसिगु नमुना परीक्षण यागुलि २०० म्हेसित संक्रमण पुष्टि जूगु खः।

देयन्कय आःतक २ हजार ६४२ म्ह संक्रिय संक्रमितपि दु।

धर्मोदय सभाया ७७ क्वःगु केन्द्रीय बार्षिक साधारण सभा येँया सीतापाइलाय् थौं शनिवाः जूगु दु।

मूपाहाँ संस्कृति, पर्यटन नाप नागरिक उड्यन मन्त्री जीवनराम श्रेष्ठं लामा भन्ते व आनीपिं याना स्वम्हसित हनापौ लःल्हानादीगु खः ।

धर्मोदय सभाया नायो बौद्ध विद्धान यज्ञमानपति बज्राचार्यजुया सभापतित्वय् न्ह्याःगु खः । संस्थाया महासचिव सागरमान बज्राचार्यं लसकुस न्वचु बिया न्ह्यागु उगु ज्याझ्वलय्  शील प्रदान भिक्षु धम्म शोभन महास्थवीरंं याना बिज्यागु खःसा वसपोलं हे देवाय् मत च्याका ज्याझ्वःया उलेज्या याना बिज्यागु खः ।

ज्याझ्वलय् भिक्षु महासंघ, लामा गुरुपिं व बज्राचार्य गुरुपिंपाखें बौद्ध प्रार्थना वाचन नं याना बिज्यागु खः । प्रदेश सभासद शोभा शाक्य, निर्वाचन आयोगया निर्वाचन अधिकृत जानकीदेवी तुलाधर, सभाया उपाध्यक्ष पदमज्योति, सभाया उपाध्यक्ष ईन्द्र बहादुर गुरुङ्ग लगायतपिन्सं थःथःगु नुगः खँ तयादीगु खः ।

किपाः सुगतरत्न सिन्दुराकार

नेवाः पत्रकार राष्ट्रिय दबू ख्वप जिल्लाय् गुक्वःगु साधारण सभा व प्यक्वःगु अबिधेशन क्वचाःगु दु।

म्हिगः जुगु अबिधेशनं रामगोपाल तमखुयात सर्वसम्मतं अध्यक्षय् ल्यःगु दु। अथेहे, उपाध्यक्षय् सुरेश ख्वाकः श्रेष्ठ, सचिवय् देवेन्द्र प्रजापति, कोषाध्यक्षय् चन्द्र कृष्ण (गोपाल) श्रेष्ठयात ल्यःगु खः।

सदस्यय् श्याम कुमार था, प्रकाश मल्ल, हरि सुन्दर छुकां, रेणु त्वानावासु व विरेन्द्र खाइजुयात ल्यःगु खः।

मध्यपुरया शंखधर पार्टी प्यालेसय् जूगु उगु ज्याझ्वलय् सञ्चार ख्यलय् बियादीगु योगदानयात कदर यासें पत्रकार कृष्ण प्रजापतियात फोटो पत्रकार रत्न श्रेष्ठं थः मां व अबुया नामय् नीस्वनादीगु हरीलाल–श्रीलक्ष्मी श्रेष्ठ लुमन्ति पत्रकारिता सिरपा व १० द्वः तका देछाःगु खः।