प्युठानया प्रतिनिधिसभा सदस्यय् नेकपा एमालेया उम्मेदवार सूर्य थापा निर्वाचित जूगु दु।

थापां निकतम प्रतिस्पर्धी सत्ता गठबन्धनकया समर्थन दुम्ह राष्ट्रिय जनमोर्चाया उम्मेदवार दुर्गा पौडेलयात ५ हजार २७४ मतं बूकुगु खः।

थापां ४१ हजार ११८ मत हःगु खःसा पौडेलं ३५ हजार ८४४ मत हःगु खः। थापा नेकपा एमालेया पोलिटब्यूरो सदस्य व प्युठानया इन्चार्ज खःसा पौडेल राष्ट्रिय जनमोर्चाया उपाध्यक्ष खः।

कञ्चनपुर निर्वाचन–२ य् नेपाली कांग्रेसया उम्मेदवार एनपी साउद प्रतिनिधिसभा सदस्यय् निर्वाचित जूगु दु।

निर्वाचन अधिकृतया कार्यालयं याःगु सार्वजनिक कथं साउदं २८ हजार १०० मत हःगु खःसा निकटतम प्रतिस्पर्धी नेकपा एमालेया नरबहादुर धामी २१ हजार ६४५ मत हःगु खः।

अथेहे राष्ट्रिय स्वतन्त्र पार्टीया उम्मेदवार झंकरराज जोशीं ४ हजार ९३१, राष्ट्रिय प्रजातन्त्र पार्टीया अशोकबहादुर सिंहं ३५१० मत हःगु खः।

मकवानपुर क्षेत्र नम्बर २ य् नेकपा एमालेया उम्मेदवार महेश बर्तौला प्रतिनिधि सभा सदस्यय् निर्वाचित जूगु दु।

सत्तारुढ गठबन्धनया उम्मेदवार नेकपा एकीकृत समाजवादीया विरोध खतिवडायात ४ हजार स्वया अप्पो मतं बूकुगु खः।

बर्तौला ८६ हजार ३१ मत कुहावगुलि ३४ हजार ९१६ मत हया विजयी जूगु खः। खतिवडां ३० हजार ३९६ मत हाःगु खः।

खतिवडा थ्व स्वया न्ह्यः निर्वाचनय् लगातार प्यक तक निर्वाचित जुयाच्वम्ह खः। संसदीय निर्वाचनय् विरोध थ्व हे न्हापागु पटक बूगु खः।

निर्वाचित नेकपा एमालेया उपमहासचिव पृथ्वीसुब्बा गुरुङ लमजुङपाखे प्रतिनिधि सभा सदस्यय् निर्वाचित जूगु दु।

गुरुङं नेकपा माओवादी केन्द्रया महासचिव देव गुरुङयात ३ हजार १८८ मतं बूकुगु खः। गुरुङं ३४ हजार ९६९ हःगु खःसा देव गुरुङं ३१ हजार ७८१ मत हःगु खः।

प्रतिनिधिसभाय् समानुपातिकपाखे १० लाख मत गणना जुइ धुकुगु दु।

उकि मध्ये नेकपा एमाले झण्डै १ तिहाइ काये धुकुगु दु। एमाले न २ लाख ८४ हजार मत काःगु दु सा कांग्रेसं २ लाख ६२ हजार मत काःगु दु।

अथेहे राष्ट्रिय स्वतन्त्र पार्टी न १ लाख ३७ हजार मत काःगु दु। आःतक कुल सदर मत माने याःगु कथं अप्पो मत हःगु झीगु दलमध्ये मेगु दल नेकपा माओवादी केन्द्र व राष्ट्रिय प्रजातन्त्र पार्टी जक थ्रेसहोल्ड कटे याःगु दु।

जनता समाजवादी पार्टी, नेपाल मजदुर किसान पार्टी, जनमत पार्टी, एकीकृत समाजवादी व नागरिक उन्मुक्ति पार्टी शीर्ष झीगु थासय् लानाच्वंगु दु सा ३ प्रतिशत कटे याये फुगु मदुनि।

३ प्रतिशत मत कटे याये मफुगु दल समानुपातिकया सिट बाँडफाँटया प्रतिस्पधा याये दइमखु। उगु दल बाहेक ल्यः दुगु दलया मतगणना याइ।