निर्वाचन आयोगं थौं संसदय् प्रतिनिधित्व याइपि दलपि दथुइ छलफल यायेत्यःगु दु।

निर्वाचन आचारसंहिता व तयारीबारे प्रतिनिधि सभा व प्रदेश सभाय् प्रतिनिधित्व यानाच्वंगु १२ दल दथुइ छलफल यायेत सःतागु दु धका आयोगया प्रवक्ता शालिग्राम शर्मा पौडेलं जानकारी बिःगु दु।

आयोगं पालिका चुनावय् आचारसंहिता कार्यान्वयनया अवस्थाय् मूल्याङ्कन उासे दलपिनिगु सुझावया आधारय् आचारसंहिता दयकेगु तयारी याःगु दु। प्रतिनिधि सभा व प्रदेश सभाया चुनाव वयेत ९० दिं जक ल्यः दनिइ।

नेपाल भाषा मिसा खलःया स्वीस्वकःगु बुदिं थीथी सिरपाः लःल्हासें तःजिक हंगु दु। ज्याझ्वलय् मञ्जुका स्मृति अक्षय कोषया ‘कमला लुमिन नेपालभाषा सिरपाः’ नेपाःया न्हापांम्ह मिसा न्यायाधिस मय्जु सत्यभामा माथेमायात लःल्हाःगु खः।

माथेमायात हनेगु झ्वलय् खलःया संरक्षक सुबर्णकेशरी चित्रकारं पलिगा न्यय्कादिलसा समाजसेवी पञ्चबिर सिं तुलाधरं हनापौ लःल्हानादिल । अथे हे, तका सिरपाः दाता लुमिन कुमार श्रेष्ठं लःल्हानाद्यूगु खः। आख्यानकार मथुरा कृष्ण साय्मिं नीस्वनातःगु ‘रमा–कौशल्या लुमन्ति सिरपाः डा. चन्द्रहिरा कंसाकार व बरिष्ठ सिस्टर सानु केशरी तुलाधरयात लःल्हाःगु खः।

थुगु सिरपाः स्वास्थ्य लागाय् अले मिसापिनिगु निम्ति समाजय् म्हितावयाच्वंगु भूमिकायात कदर यासे दँय् छम्ह अतः गायाः नर्स व डाक्टरयात बीगु क्वःछिनातःगु खःसा वंगु निदँ तक कोरोनाया हुनिं दिनाच्वंगु खः। अथेजुयाः थुगुसी व थगुने यानाः निदँया सिरपाः छक्वलं ब्यूगु खः। उगु हे ज्याझ्वलय्  खलःया थजि जः प्रमिलादेबि बज्राचार्य, धर्मशोभा तुलाधर व ललितादेबि श्रेष्ठयात नं हंगु खःसा येँ महानगरपालिका १५ वडाया वडाध्यक्ष ईश्वरमान डंगोललगायतया सदस्य जनप्रतिनिधिपिं व नेवाःदेय् दबूया नायः पबित्र बज्राचार्ययात नं ख्येँय् सगं बियाः भिंतुना देछाःगु खः।

ज्याझ्वलय् तका सिरपाः दाता लुमिन कुमार श्रेष्ठं आकिवंनिसेंया सिरपाःया नितिं अक्षय कोष स्वरूप निगू लखया चेक खलःया नायः धर्मशोभा तुलाधरयात लः ल्हानादिल । अथे हे मिसा सम्बन्धि अनुसन्धान ज्याया लागि छगू लख व नीद्वः तका बरिष्ठ सिस्टर सानुकेशरी तुलाधरं थः मदुम्ह भौ एडना भेरुवेलया नामं नीस्वनेत लः ल्हानादिल । सभाय् डान्स कल्चरल आर्ट सेन्टरपाखें हुलाप्याखं नं न्ह्यब्वःगु खः।

समाजसेवी येँ महानगरपालिका १२ या मदुम्ह रामबहादुर डंगोलया स्मृती ग्रन्थया विमोचन जूगु दु ।

शनिबाः याःगु छगू ज्याझ्वलय् येँ महानगरया निवर्तमान प्रमुख विद्यासुन्दर शाक्य, येँ क्षेत्र नं. ९ या एमालेपाखेंया सांसद कृष्णगोपाल श्रेष्ठ, महानगरया उपप्रमुख सुनिता डंगोल, बागमती प्रदेश सदस्य डा. अजयक्रान्ती शाक्यलिसें नं मंकाः कथं सफूया विमोचन यानादिल ।

व झ्वलय् महानगर पूर्व प्रमुख शाक्यं डंगोलया योगदानबारे चर्चा याःगु खः । ज्याझ्वलय् नेपाली कांग्रेसया नेतालिसें पूर्व मन्त्री तीर्थराम डंगोल, कामपा वडा २२ या वडाध्यक्ष चिनीकाजी महर्जनलिसेंया उपस्थिती दुगु खः।

थेरवाद बुद्ध धर्मया विकास यायगु ज्याय् आपालं योगदान बिया बिज्याम्ह भिक्षु अमृतानन्द महास्थवीरया योगदानयात लुमंका स्वीनिक्वःगु गुणानुस्मरण आनन्द कुटी बिहारय् २०७९ साल भाद्र ५ गते आइतवाः छगू ज्याझ्वः जुगु दु।

थेरवाद बौद्ध धर्मया धर्मानुशासक भिक्षु बोधिसेन महास्थवीरया विशिष्ट पाहांसुइ न्ह्याःगु थुगु ज्याझ्वलय् भगवान बुद्ध प्रतिमूर्ति व भिक्षु अमृतानन्द महास्थवीरया किपा सम्मुख देवा च्याका संस्कृति पर्यटन मन्त्री जीवन राम श्रेष्ठं उलेज्या यानादीगु खः ।

भिक्षु कौडण्य महास्थवीरं अमृतानन्द महास्थवीरया थेरवाद बौद्ध धर्म विकास यायगु ज्याय् मदुम्ह अमृतानन्द महास्थवीरं यानादीगु योगदान व व्यत्तित्वबारे कना बिज्यागु खः । उगु ज्याझ्वलय् आनन्द कुटी विद्यापीठया ब्वमिपिन्सं एसइइया परीक्षाय् अप्पो ल्याः हःपिं ब्वमिपिन्त मन्त्री श्रेष्ठं सिरपा नं लःल्हानादीगु खः।

उगु ज्याझ्वलय् येँ महानगर १५ वडाध्यक्ष ईश्वरमान डंगोल भिक्षु धर्ममूर्ति, भिक्षु राहुल महास्थवीर लगायत भिक्षु व गुरुमापिनिगु नं सहभागिता दुगु खः। आनन्द कुटी विद्यापीठया प्रिन्सीपल बज्राचार्यपाखें उगु ज्याझ्वलय् श्रद्धेय भिक्षु अमृतानन्दपाखें आनन्दकुटि बिद्यापीठया स्थापनाया ज्याय् वियादीगु योगदानया खँ कनादीगु खः।

किपा सुगतरत्न सिन्दुराकार

किपुलिइ छखाः छेँ–छम्ह स्नातक ज्याझ्वःकथं किपूया सामुदायिक कलेजय् स्नातक तह अध्ययनय् शतप्रतिशत छुट व किपू अस्पतालय् वासः यायेगुलिइ ५० प्रतिशत छुट सेवा लागू जुइगु जूगु दु।

किपू नगरपालिकाय् म्हिगः भाद्र ५ गते सहमति जुगु कथं किपूया स्थायी बासिन्दापिन्त उगु सेवा, सुविधा लागू यायेत्यंगु खः। किपू नगरपालिकां स्थायी बासिन्दायात स्तानक तह अध्ययनय् निःशुल्क सेवा, सुविधा बिइगु नितिं स्वंगू सामुदायिक कलेज मंगल बहुमुखी क्याम्पस, सहीद स्मारक कलेज व जनाधार क्याम्पसनापं सहमति याःगु खःसा पचास प्रतिशत छुट सेवाया नितिं फेक्ट नेपालपाखें संचालित किपू अस्पतालनापं म्हिगः आईतवाः छगू ज्याझ्वःया दथुइ सहमति पत्रय् ल्हाःचिं तःगु खः। स्नातक तह अध्ययनय् मानविकी, शिक्षा व ब्यवस्थापन संकाय अध्ययन याइपिं किपूया स्थायी बासिन्दा ब्वंमिपिन्त थुगु शैक्षिक दँनिसें ६० प्रतिशत नगरपालिकापाखें व ४० प्रतिशत कलेजपाखें खर्च यायेगु सहमतिइ न्ह्यथनातःगु दु।

अथेहे स्वास्थ्य उपचारय् थ्व स्वया न्ह्यः किपुलिइ च्वपिन्त १५ प्रतिशत छ्यापं व स्वास्थ्य बिमा सुविधा बियाः वयाच्वंगु खःसा थुगुसिइ निसें छुं छुं सेवाबाहेक मेगु आपालं सेवाय् बच्छि छुट बीगु सहमति पतिइ न्ह्यथनातःगु दु। कलेज व अस्पतालनापं जूगु सहमति पतिइ किपू नगरपालिकाया मेयर राजकुमार नकःमि व फेक्ट नेपालया कार्यवाहक अध्यक्ष डा. भरतकुमार प्रधानं ल्हाःचिं तयादीगु खः।

नगरपालिका ज्याकूया सभा हलय् जूगु ज्याझ्वलय् नगरया सल्लाहकारपिं, उपमेयर शुभलक्ष्मी शाक्य, प्रमुख प्रशासकिय अधिकृत राजेन्द्र कार्कीलिसे थीथी समितिया दुजःपिं, जनप्रतिनिधिपिं व कर्मचारीपिनिगु न ब्बति दुगु खः।