वंगु २४ घण्टाया दुने देयन्यक थप २८६ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं १ हजार ८१६ म्हेसित पीसीआर परीक्षण याःगुलि २०२ म्ह व १ हजार ६०७ म्हेसित एन्टीजेन परीक्षण याःगुलि ८४ म्ह याना २८६ म्ह संक्रमण पुष्टि जुगु खः।

अथेहे २४ घण्टाया दुने ४७९ म्ह कोरोनामुक्त जुगु दु। अथेहे देयन्यक ४ हजार ३४८ म्ह सक्रिय संक्रमितपि दु।

निगु देय्या लागि नियुक्त जूपि राजदूतपिन्स थौं आइतबाः शपथ काःगु दु।

ब्राजिलया लागि नेपाली राजदूत निर्मलराज काफ्ले व कोरियाया लागि नेपाली राजदूत प्रा.डा. ज्योति प्याकुरेल(भण्डारी) न राष्ट्रपति विद्यादेवी भण्डारीसमक्ष पद व गोपनीयतया शपथ ग्रहण याःगु दु।

शपथ समारोहय् नेपाल सरकारया उच्च पदस्थ कर्मचारीपिनिगु न सहभागिता दुगु खः।

नेपाली कांग्रेस नेता प्रदीप गिरियात अन्तिम श्रद्धाञ्जली अर्पण यायेत नेकपा एमालेया अध्यक्ष केपी शर्मा ओली पशुपति आर्यघाटय् वंगु दु।

वयकलं आर्यघाटय् वना गिरिया शवय् श्रद्धाञ्जली अर्पण याःगु खः।

केन्द्रीय मानन्धर संघं धाः बाजं ब्बज्या याःगु दु। येँ महानगर दुने मानन्धर समुदायया च्यागु त्वालय् च्वंगु धाः बाजं ब्बज्या जुगु खः।

उगु ज्याझ्वलय् चस्वांद्वँ मानन्धर सनाःगू खलः, थँहिटी मानन्धर गुठी, दैसाः टोल मानन्धर समाज, न्यागःमणि फेदी मानन्धर संघ, मानन्धर सानाःगू खलः न्हूसाः, पाक्व पुखूद्याँ सनाः खलः, भिंद्यः गुठी कालिमाटी व लायकूसाः मानन्धर समाजं ब्बति काःगु खः। उगु ज्याझ्वलय् वाग्मती प्रदेशया खानेपानी, ऊर्जा तथा सिंचाइ मन्त्री माननीय बसन्त मानन्धरं पुर्खापिन्स लःल्हाना थकूगु मौलिक बाजं न संस्कृति संरक्षण यायेत ग्वाहालि जुगु दु धका धयादीगु खः।

वीरगञ्ज पर्सौनीया प्रतिनिधित्वयासे केन्द्रीय मानन्धर संघय् सभापति जूयादीम्ह मनोज कुमार मानन्धरया सभाध्यक्षताय् जुगु उगु ज्यझ्वलय् येँ महानगरपालिका वडा नं. १७ या वडाध्यक्ष नाप महानगरया प्रवक्ता नवीन मानन्धर, १३ या ध्रुवनारायण मानन्धर, २० या राजेन्द्र मानन्धर, लेखा प्रमुख बुद्धरत्न मानन्धर, सम्पदा विभाग उपप्रमुख श्रीजु प्रधान, च्याःगु त्वाःया कजि नाप बाजं गुरुपिनिगु न सहभागिता दुगु खः।

ज्याझ्वः केन्द्रीय मानन्धर संघया सञ्चार उपसमिति व युवा तथा क्षमता विकास उपसमितिं संयोजन याःगु खः।

नेकपा माओवादी केन्द्रया अध्यक्ष पुष्पकमल दाहाल प्रचण्डं प्रदीप गिरिया व्यक्तित्व निस्वार्थ रुपं समाजसेवाय् समर्पित जुइत  प्रेरणा बियाच्वनिइ धका धयादीगु दु।

नेपाली कांग्रेसया केन्द्रीय कार्यालय सानेपाय् वना मदुम्ह नेता प्रदीप गिरिप्रति बिचाः हायेकेगु झ्वलय् प्रचण्डं धाःगु दु,‘राजनीति फोहोरी कासा मखु, समाज सेवाया, जनताया सेवा व राष्ट्र सेवाया माध्यम खः धइगु प्रेरणा प्रदीप गिरिपाखे कायेमाः।’ प्रचण्डं गिरिया योगदानपाखे प्रेरणा कायेमाः व समाजवादया लागि यायेमाःगु चिन्तनपाखे शिक्षा कया न्ह्यावनेमाः धका बःबिइमाः।

‘आः  वयकः झी नाप मदु, वयकःया अभाव न्ह्यावलय् जुइ नेपाली समाजय् ।’