वंगु २४ घण्टाया दुने देयन्यक ८८८ म्हेसित कोरोना संक्रमण पुष्टि जूगु दु।

अथेहे कोरोना सक्रमणं छम्हेसिगु ज्यान वंगू दु। स्वास्थ्य तथा जनसंख्या मन्त्रालयया कथं ५ हजार ७३७ म्हेसिगु परीक्षण याःगुलि ८८८ म्हेसित संक्रमण पुष्टि जूगु खः।

३ हजार १५५ म्हेसिगु पीसीआर परीक्षण याःगुलि ४२७ म्ह व २ हजार ५८२ म्हेसित एन्टिजेन परीक्षण याःगुलि ४६१ म्ह याना ८८८ म्हेसित संक्रमण पुष्टि जूगु खः।

वंगु २४ घण्टाया दुने ४७४ म्ह कोरोना संक्रमणमुक्त जूगु दु।

फोहोर ज्वना वंगु गाडी व सुरक्षाकःमिपिन्त रोकेयायेत बञ्चरेडाँडाय् च्वपि दथुइ ल्वापू जूगु दु।

स्थानीय अवरोध जुयाच्वंगु खुले यायेत वःपि प्रहरी व स्थानीयपि दथुइ थाय् थासय् झडप जूगु दु। प्रहरीं स्थानीयपिन्त लिनाछ्वया बञ्चरेडाँडाय् करिब ५० ट्रक फोहोर वांन्छ्वंगु खः।

प्रहरीं लिनाछ्वयेवं स्थानीयपिन्स अप्पां क्यकूगु धका प्रत्यक्षदशी धाःगू दु। फोहोरया गाडी तोडफोड याःगू द्धपनय् खुम्हेसित उजुरी तःगू खः। तोडफोड जूगु गाडी धनीं उजुरी दर्ता याःगु धका जिल्ला प्रहरी कार्यालय नुवाकोटया प्रहरी उपरिक्षक रमेश पाण्डे न जानकारी बिःगू दु।

येँ महानगरं स्थानीयपिन्स गाडी व डोजरय् तोडफोड याःगू द्धपः बिःगू खः। वंगू साउन २३ गते सोमबाः फोहर ज्वनावंगु झीन्यागः गाडी व स्वगः महानगरया डोजर अज्ञात समूह न तोडफोड याःगु खः।

मुदिता सेवा गृहया गुक्वःगु बुन्हि छगू ज्याझ्वः याना हंग दु। उगु ज्याझ्वलय् मूपाहाँ कथं महिला बाल विकास नाप ज्येष्ठ नागरिकमन्त्री उमा रेग्मीं सुकुन्दाय् मत च्याकाः उलेज्या यानादीगुु खः।

ज्याझ्वलय् मूपाहाँ मन्त्री रेग्मीं थःगु नुगः खँ तयेगु झ्वलय् संस्थाया निंतिं सरकारपाखें झिगू लख तका अनुदान बिइगु बचं बियादिगु खः।

अथेहे विशिष्ट पाहाँ कथं महालक्ष्मी नगरपालिकाया मेयर हरिगोविन्द श्रेष्ठ व पाहाँ कथं बागमती प्रदेशया सांसद माधव पौडेल, महालक्ष्मी नगरपालिका ७ या वडाध्यक्ष बाबुराजा महर्जन, १ या वडाध्यक्ष छिरिङ्ग लामा, इमाडोल प्रहरी प्रभागया प्रहरी निरीक्षक अरुण भट्टराई झायादीगु खः।

मुदिताया अध्यक्ष राज्यलक्ष्मी बज्राचार्यं लसकुस यानादीगु उगु ज्याझ्वलय् सल्लाहकार मोतिशान्ति शाक्य, शाक्य सुरेन, पूर्वमन्त्री बुद्धिराज बज्राचार्य, ललितपुर उद्योग बाणिज्य संघया पुलांम्ह अध्यक्ष अजरमान जोशीपिनिगु न उपस्थिति दुगु खः।

आनन्द बज्राचार्यं च्वयादीगु मुदिताया म्येय् सुशील शाही, सबिना मानन्धर व अगिना तण्डुकारपिन्सं न्ह्यब्वःगु खः।

मध्यपुर थिमिइ शनिवाः निसे लायकू भैलः प्याखं सुरु जूगु दु। प्यन्हुयकं जुइगु उगु प्याखंया न्हापागु दिं उपराष्ट्रपति नन्द बहादुर पुनं प्रत्यक्ष अवलोकन यानादीगु खः।

लायकू भैलः नाप महाकाली, बोडेय् निलबाराही, इन्द्रअप्सरा, भस्मासुर व अष्टमातृका गण नाच प्रदर्शन जूगु दु । सापारुया कन्ह्यः कुन्हुनिसे प्यचाः तक थिमिया थीथी त्वालय् प्याखं प्रदर्शन यायेगु परम्परा दु।

थुगु ऐतिहासिक प्याखं प्रवर्द्धन यायेगु उद्देश्यं मध्यपुर पर्यटन विकास व प्रवर्द्धन फोरम समेत गठन याःगू खः।

ने.सं ६३३ सालय् ख्वपय् अनिकाल जूगु इलय् जुजु सुवर्ण मल्लं नवदुर्गा गण प्याखं, बोडेय् निलबाराही, थिमिइ लायकु भैलः व महाकाली प्याखंया सुरुआत यानातःगु धका धाइ।

लुँ तोलां थौं प्यसः कुहावंगू दु। लुँ तोलां प्यसः कुहावया ९७ हजार ४ सय रुपैयाँ तोके याःगू दु धका नेपाल सुनचाँदी व्यवसायी महासङ्घं धाःगू दु।

अथेहे, थौं वहःया भाः न तोलां झीन्यातक कुहावंगु  दु। वहः तोलां झीन्यातका कुहावया १ हजार २ सय ३५ रुपैयाँ न कारोबार जूगु दु धका महासङ्घं धाःगू दु।