वइगु प्रतिनिधिसभा व प्रदेशसभा सदस्य निर्वाचनया लागि थौंतक थीथी ४० राजनीतिक दलं दल दर्ता याये धूकुगु दु।

नेकपा (एमाले), लोकतान्त्रिक समाजवादी पार्टी (लोसपा), नेकपा (एकीकृत समाजवादी) लगायत दलपिन्स वइगु निर्वाचनय् भाग कायेत दल दर्ता याये धूकुुगु दु धका आयोगं धाःगू दु।

आयोगं प्रतिनिधिसभा व प्रदेशसभा सदस्यया न्हापां निर्वाचित जुइगु प्रणाली व समानुपातिक निर्वाचन प्रणालीपाखे निर्वाचनय् ब्बति कायेगु निति थ्व हे साउन २२ निसे ३१ गते तक दल दर्ताया लागि आह्वान याःगू खः।

सार्वजनिक बिदाया दिं न आयोगया कार्यालय खुल्ला जुइगु व निर्वाचन नाप सम्बन्धित ज्या नियमित रूपं सम्पादन जुइ धका धाःगु दु।

थ्व हे साउन १९ गतेतक आयोगय् दर्ता कायम जूपि राजनीतिक दलं वइगु प्रतिनिधिसभा व प्रदेशसभा सदस्य निर्वाचनय् ब्बति काये दइगु जूगुलि आयोगय् दल दर्ता यायेमाः।

सुन्दरीजलया खुँसिइ कुतुवना बेपत्ता जूम्ह छम्हेसित प्रहरीं उद्धार याःगू दु।

शनिबाः न्हिनय् २ः३० बजे सुन्दरीजलया खुँसिइ चूलुया कुतुवःम्ह छम्हेसित प्रहरीं उद्धार याःगू दु धका जिल्ला प्रहरी परिसर काठमाडौया प्रहरीं धाःगू दु।

प्रहरीं वयात खुँसि सिथय् ल्ह्वंतय् थाना च्वंगु अवस्थाय् लूइकुगु खः। घटनास्थलय् स्थानीय, नेपाल प्रहरी व नेपाली सेनाया टोलीपि न खटे जूगु खः।

बागमती प्रदेश सभाया सांसद नाप पुर्वमन्त्री डा.अजयक्रान्ति शाक्यया अबुु रत्न काजी शाक्य मन्त।

वयकः थौं शनिवाः ८६ दँय् आकाझाकां मदुगु खः।

मदुम्ह शाक्यया अन्तिम संस्कार थौ हे पशुपति आर्यघाटय् क्वचाःगु दु।

वंगु २४ घण्टाया दुने देयन्यक २६३ म्हेसित कोरोना भाइरस संक्रमण पुष्टि जूगु दु। अथेहे कोरोना सक्रमणं निम्हेसिगु ज्यान वंगु दु।

स्वास्थ्य तथा जनसंख्या मन्त्रालयया कथं ३ हजार १६५ परीक्षण याःगूलि २६३ म्हेसित संक्रमित जूगु धका धाउगु दु। १ हजार ३९९ म्हेसिगु पीसीआर परीक्षण याःगूलि १६२ म्ह व १ हजार ७६६ म्हेसिगु एन्टिजेन परीक्षणय् १०१ म्हेसित संक्रमण पुष्टि जूगु खः।

अथेहे २४ घण्टाय् ५०१ म्ह कोरोना संक्रमणमुक्त जूगु दु।

संस्कृति पर्यटन तथा नागरिक उड्डयनमन्त्री जीवनराम श्रेष्ठं न्हुगु संविधानं आदिबासी जनजातिया यक्को माग सम्बोधन जूगु धका धयादीसे कार्यान्वयनय् दवाव बिइत पत्रकार नाप सञ्चारमाध्यमपिन्त इनाप यानादीगु दु।

नेपाल आदिबासी जनजाति पत्रकार महासंघ (फोनिज) या २३ क्वःगु स्थापना दिवसया लसताय् जूगु ज्याझ्वलय् अथे धयादीगु खः। फोनिजया २३ क्वःगु स्थापना दिवसया लसताय् प्यम्ह पत्रकारपिन्त सम्मान याउगु खः। सम्मानित जूपि वरिष्ठ पत्रकार गोपाल देवान, अनिता गुरुङ, राजु चौधरी, अप्सरा समाल व वान्तावा राई भाषाया पत्रिका ‘बुङ्वाखा’ मासिक खः। सम्मानित जूपि पत्रकारपिन्त हनापौं नाप नगद २० हजार लःल्हाःगु खः। अथेहे फोनिजं संस्थाया स्वम्ह पूर्व अध्यक्षपिन्त न हंगु खः।

फोनिजया संस्थापक अध्यक्ष चन्द्रसिंह कुलुङ, पूर्व अध्यक्ष खिम घले, पूर्व अध्यक्ष मोहनसिंह लामापिन्त हंगु खः। मन्त्री श्रेष्ठं पत्रकारपिन्त हनापौ लःल्हानदीगु खः।

फोनिजया अध्यक्ष गजुरधन राईया सभाध्यक्षताय् जूगु उगु ज्याझ्वलय् आदिबासी जनजाति उत्थान राष्ट्रिय प्रतिष्ठानया उपाध्यक्ष गोकुल घर्ती, जनजाति महासंघया अध्यक्ष गेल्जे शेर्पा, पत्रकार महासंघया अध्यक्ष बिपुल पोखरेल, जनजाति महिला महासंघया शान्ति देवान, नेपाल प्रेस युनियनया अध्यक्ष शिव लम्साल, प्रेस चौतारी नेपालया उपमहासचिव सुरोजंग पाण्डे, प्रेस सेन्टर नेपालया अध्यक्ष विष्णु सापकोटा, समाजवादी प्रेस संगठनया वरिष्ठ उपाध्यक्ष विश्वमणि सुवेदी, फोनिजया संस्थापक अध्यक्ष चन्द्रसिंह कुलुङ, पत्रकार गोपाल देवान, फोनिजया निवर्तमान अध्यक्ष डण्ड गुरुङ, वरिष्ठ उपाध्यक्ष लक्की चौधरी लगायतपिन्स न सुभाय् न्वचु तयादीगु खः।