निर्वाचन आयोगं फागुन २५ गते कुन्हु जुइगु राष्ट्रपति निर्वाचन व चैत्र ३ गते जुइगु उपराष्ट्रपति निर्वाचनया लागि फागुन १७ गतेनिसे आचारसंहिता लागू यायेत्यःगु दु।

संघीय संसदय् ३३२ व प्रदेशसभाया ५५० म्ह याना ८८२ म्ह मतदाता दुगु निर्वाचनया लागि फागुन १७ निसे चैत्र ५ गतेतक आचारसंहिता लागु जुइ धका आयोगं मंगलबाः छगू सूचं प्रकाशितयासे जानकारी बिःगु खल्।

आचारसंहिता नेपाल सरकार, प्रधानमन्त्री व मन्त्री, प्रदेश सरकार, मुख्यमन्त्री व मन्त्री, संघ, प्रदेश व स्थानीय तहया कर्मचारी, सुरक्षा निकायया कर्मचारी, सरकारी, अर्धसरकारी नाप सार्वजनिक संस्थाया कर्मचारीपिन्त लागु जूइ।

अथे हे राजनीतिक दल व वयागु भ्रातृ संगठन, उम्मेदवार व उम्मेदवारया प्रतिनिधि, मतदान व मतगणना जुइगु थाय् खटे जुइपि उम्मेदवारया प्रतिनिधि, सार्वजनिक पद धारणयापि मनू, सञ्चार प्रतिष्ठान, वया कर्मचारी व पत्रकार नाप मतदातपिन्त आचारसंहिता लागु जुइ।

मंगलबाः सेयर बजाः भचा कुहावःगु दु। थौं ३.८१ अंकय् कुहावया बजाः २०१९.७३ बिन्दुइ कुहावःगु दु।

बजाः न्हिच्छियक थहा कुहवःगु खः। मंगलबाः २६२ धितोपत्रया २८ हजार ६८४ गु कारोबारपाखे ३९ लाख ४६ हजार २४ कित्ता सेयर न्यायेगु मिइगु जुगु खः।

१ अर्ब ३८ करोड ७८ लाख रुपैयाँया कारोबार जूगु खः। जलविद्युत, इन्भेष्टमेन्ट, म्युचुअल फण्ड व ट्रेडिङ बाहेक दक्को उपसूचक कुहावःगु दु। दकलय् अप्पो लघुवित्त उपसूचक ०.८० प्रतिशतं कुहावःगु दु।

थौं दकलय् अप्पो लघुवित्त कम्पनीया सेयर भाः थहावःगु दु। आँधीखोला लघुवित्त, आदर्श लघुवित्त व खप्तड लघुवित्त वित्तीय संस्था सकारात्मक सर्किट लेबलय् कारोबार जूग्ु खः। सिद्धार्थ इन्स्योरेन्स व सर्पोट माइक्रोफाइन्सया भाः न थहावःगु दु।

दकलय् अप्पो कुहावःगु सेयरया भाः प्रिमियर इन्स्योरेन्सया खः। थुकिया भाः ३.८५ प्रतिशतं कुहावःगु खः। युनिभर्सल पावर कम्पनी, शिवम् सिमेन्ट, सानिमा माइहाइड्रोपावर लगायतया सेयर दकलय् अप्पो कारोबार जुगु खः।

रेडियो नेपालं म्हिगः अष्टमीया सुथय् निसे नेपाल संवतया तिथि न प्रसारण यायेगु याःगु दु ।

नेपाल संवत न्हूदँ राष्ट्रिय समारोह समिति ११४३ न रेडियो नेपालय् न प्रसारणय् नेपाल संवतया तिथिमिति प्रसारण यायेमाःगु धका इनाप याःगु खः।

हूदँ समारोह समितिया नायः प्रा.डा.नरेशमान बज्राचार्यं रेडियो नेपालया प्रमुखयात नापलानाः रेडियो नेपालय् दँ जक धायेगु यानाच्वंगुलिं ला (महिना) व तिथि नं धायेमाःगु धासें ज्ञापन पौ लःल्हाःगु खः।

समारोह समितिया नायः प्रा.डा.बज्राचार्यं म्हिगः निसे रेडियो नेपालं नेपाल संवतया दँनिसें ला (महिना) व तिथि (दिं) तकं न्वःवानाः प्रसारण याःगुलि लहनान्युजनाप खँ ल्हानादीसे रेडियो नेपालया टिमया सुभाय् देछानादीगु दु।

राष्ट्रपति निर्वाचनय् उम्मेदवारपिन्स उम्मेदवारी लित कायेगु थौं लिपागु दिं खः। उम्मेदवारी लित कायेगु निति उम्मेदवारपिन्स थौं सुथय् १० बजेनिसे न्हिनय् ४ बजेतक ई बियातःगु दु।

थ्व हे वइगु २५ गते जुइगु राष्ट्रपति पदय् निर्वाचनया लागि च्यागु दलीय गठबन्धनया पाखे नेपाली कांग्रेसया नेता रामचन्द्र पौडेल व नेकपा एमालेया उपाध्यक्ष सुवास नेम्वाङया उम्मेदवार दुगु खः।

उम्मेदवारी लित कायेगु ई क्वचायेवं थौं बहनि ५ बजे हे लिपागु नां प्रकाशित याइ धका राष्ट्रपति नाप उपराष्ट्रपति निर्वाचन कार्यालयया सहायक निर्वाचन अधिकृत अमृता कुमारी शर्मां जानकारी बिःगु दु।

राष्ट्रपति पदया निर्वाचन थ्व हे फागुन २५ गते जुइत्यःगु खः। राष्ट्रपति विद्यादेवी भण्डारीया कार्यकाल थ्व हे फागुन २८ गते क्वचाइगु खः।

नेपाल विद्युत प्राधिकरणं ग्राहकपिन्त याउक व अपूगु सेवा यायेगु निति मोवाइल एप सञ्चालनय् हःगु दु।

ग्राहकपिनिगु खँ न्यनेगु व्यवस्थापन यायेत अपुइगु कथं मोबाइल एम ‘एनई एप’ सञ्चालनय् हःगु दु धका प्राधिकरणं धाःगु दु। थुगु एप छ्यलिइगु निति मोबाइलया ‘प्ले स्टोर’ य् वना ‘NEA Official App’ सर्च यासे डाउनलोड यायेफइ।

थुगु एपपाखे मिटर रिडिङ, बिलिङ, मसहसुल भुक्तानी, चार्जिङ स्टेशनया जानकारी बिइगु नाप विद्युत आपूर्तिसम्बन्धी जानकारी बिइ धका प्राधिकरणं धाःगु दु। सेवा याउक व अपूकः कायेगु निति थुगु एप छ्यलेत प्राधिकरणं सेवाग्राहीपिन्त इनाप याःगु दु।