इतुंबहाःया भाष्करदेव संस्कारित केशचन्द्रकृत पारावत महाविहारं प्यंगू दशक न्ह्यः खुया यंकूगु कलात्मक त्वरं लित हःगु दु।

वि.सं. २०४२ सालय् तंगु कलात्मक सालभाञ्जिका (यक्षिणी) त्वरं अमेरिकां नेपाः लित हःगु खः। पुरातत्व विभागं अमेरिकां लित हःगु त्वरं आइतवाः सार्वजनिक याःगु खः ।

सार्वजनिक याःगु त्वरंया क्वय् त्वधुलाच्वंगु प्राचीन यक्षया मूर्ति दु । त्वाःदःगु उगु त्वरंया च्वय्पाखे दनाच्वंम्ह यक्षिणी दुगु खःसा उकियात हे त्वाःथलाः त्वरं खुया यंकूगु खँ धाःगु दु ।

उगु इलय् यक्षिणीया स्वंगू काष्ठकलाया मूर्ति खुया यंकूगु खः । त्वरंलिसें प्रस्तर कलापाखें निर्माण यानातःगु निम्ह साधुया दथुइ दनाच्वंम्ह शिवया मूर्ति नं नेपाः लित हःगु दु । सन् १९५५ य् कंगः अजिमा द्यःया न्ह्यःने च्वंगु पःखालं उगु मूर्ति खुया यंकूगु खः ।

थुपिं निगुलिं मूर्ति नेपाः हयेगु निंतिं ‘मेट्रोपोलिटन म्युजियम अफ आर्ट’य् तयातःगु खःसा मूर्ति नेपाःया खः धइगु प्रमाणित जुइवं संग्रहालयं हे बीमा व ढुवानी खर्च यानाः नेपाःयात लित बिउगु खः ।

सभामुख अग्निप्रसाद सापकोटां राष्ट्रपति विद्यादेवी भण्डारीपाखे पुनः बिचाः यायेत लित छ्वंगू नागरिकता विधेयक ऐन २०६३ यात संशोधन याना दयकूगु विधेयकबारे परामर्श न्ह्याकूगु दु।

आइतबाः राष्ट्रपतिं संदेशसहित लित छ्वंगु नागरिकता विधेयक सोमबाः संघीय संसदय् थ्यंगू दु। वया लिपा सभामुखं थुगु विधेयक न्ह्यने यकेगु सन्र्दभय् सरकारया बिचाः व तयारी बिषय गृहमन्त्री बालकृष्ण खाँड व कानुन न्याय तथा संसदीय मामिलामन्त्री गोविन्दी बन्दीनाप छलफल याःगु दु।

सरकारं राष्ट्रपतिया संदेशबारे सदनयात जानकारी बिइगु कार्यसूची तयेगु निति मंगलबाः प्रतिनिधिसभाय् राष्ट्रपतिया संदेशबारे जानकारी बिइगु कार्यसूची तय याःगु दु।

राष्ट्रपतिया संदेशबारे सदनयात जानकारी बिइवं न्ह्यने यकेगु विषय सत्तारुढ गठबन्धनय् दुगु दलपिनिगु छगु हे धारणा जुइ फुगु मदुनि।

सरकारया नेतृत्व यानाच्वंगु नेपाल कांग्रेस फास्ट ट्रयाकय् नागरिकता विधेयक पारित यायेमाःगु पक्षय् दू सा गठबन्धनय् दुगु मेगु दलपि राष्ट्रपतिं छ्वया हःगु संदेशया सन्दभय् छु यायेगु एकीककृत धारणा तय यायेमाःगु पक्षय् दु।

पिपुल्स पावर लिमिटेडं ३१ साउन मंगलबाःनिसे धितोपत्रया प्राथमिक सार्वजनिक निष्कासन (आईपीओ) बिक्री खुल्ला याःगू दु।

कम्पनीं आयोजना प्रभावित क्षेत्रया बासिन्दापिन्त आईपीओ निष्कासन याये धूका सर्वसाधारणया लागि सार्वजनिक निष्कासन खुल्ला याःगू खः। प्रतिकित्ता १०० अंकित मूल्यया २४ करोड ६७ लाख ४० हजार रुपैयाँ बराबरया २४ लाख ६७ हजार ४०० कित्ता साधारण सेयर निष्कासन बिक्री खुल्ला याःगु खः।

उकि मध्ये २ प्रतिशत अर्थात ४९ हजार ३४८ कित्ता सेयर कर्मचारीपिनिगु लागि व ५ प्रतिशत अर्थात १ लाख २३ हजार ३७० कित्ता सेयर सामूहिक लगानी कोषयात सुरक्षित याःगु दु। ल्यः दनिइगु २२ लाख ९४ हजार ६८२ कित्ता सेयरया लागि सर्वसाधाणपिन्स आवेदन बिइ फइगु जुगु दु।

लगानीकर्तापिन्स न्यूनतम १० कित्तानिसे अधिकतम ५० हजार कित्ता सेयरया लागि आवेदन बिइफइ। आईपीआ याकन ५ भदौ तक व उगु इलय् न माग कथं आवेदन मवंसा १४ भदौ तक थप जुइ।

बञ्चरेडाँडाय् थौं सुथय् स्थानीयपिन्स फोहोर ज्वना वंगु गाडी रोके याःगू दु। येँया फोहोर ज्वःना वंगु गाडी स्थानीयपिन्स रोके यासे प्रहरी व सवारी चालकपिन्त जबरजस्ती मयायेत माइकिङ याःगु दु।

उमिसं महानगरं स्थानीयपिनिगु माग प्रति गैर–जिम्मेवार जूगु धासे ‘५० हजार मनू स्यायेत स्वःगु’ धका द्धपः बिःगु खः। माइकिङयासे प्रहरीयात स्थानीयपिन्त मुखुगु मुद्दा खारेज यायेत व दमन रोके यायेत न माग याःगु दु।

थौं मंगलबाः येँ न वंगु गाडीं फोहोर वान्छ्वं फुगु मदु। आः नुवाकोटय् ककनी गाउँपालिका व धादिङया धुनीवेशी नगरपालिका क्षेत्रय् सतक मनूत च्वना च्वंगु दु सा डाँडा–डाँडाय् मिसा व बूरा बूरीपि च्वना च्वंगु दु।

येँ महानगरपालिकां म्हिगः सोमबाः बन्चरेडाँडाय् प्रहरी परिचालन याना फोहोर विसर्जन याःगु खः। २ सय ५० स्वया अप्पो प्रहरी परिचलान याना २ सय ३ गाडी फोहोर विसर्जन याःगू खः।

वइगु मंसिर ४ गते जुइगु प्रतिनिधि सभा व प्रदेश सभा चुनावया लागि निर्वाचन आयोगं आह्वान याःगू दल दर्ता यायेगु थौं लिपागु ई खः।

सरकारं चुनावया मिति घोषणा यायेवं आयोगं वंगु साउन २२ गतेनिसे दल दर्ता आह्वान याःगू खः। थ्व हे साउन १९ गतेतक आयोगय् दर्ता कायम दुगु राजनीतिक दलं प्रतिनिधि सभा व प्रदेश सभा सदस्य चुनावय् भाग काइपिन्स आयोगय् दल दर्ता यायेमाः।

आयोगय् साउन १९ गतेतक १ सय १६ दल दर्ता जूगु दु। उकि मध्ये चुनावय् भाग कायेत आःतक आयोगय् ६२ दल दर्ता जूगु दु धका सहप्रवक्ता सूर्यप्रसाद अर्यालं जानकारी बिःगू दु।

प्रमुख दलमध्ये नेपाली कांग्रेसं आःतक दर्ता याःगु मदुनि।